祝伊欣

引用:

原帖由 祝伊欣 於 2016-7-25 11:06 PM 發表
(10) 心燒的安慰

我陷入沉思，黑白雙方膠著嘅狀態維持咗好一陣，教授就提議畀我「一首歌嘅時間」去諗步棋，如果過時都未行到，就直接判輸，唔好嘥時間「做嘢」咁話喎。 於是我响手機求其㧻咗一隻有五分幾鐘長嘅歌，Boystown Gang版《Can’t Take My Eyes off You》：

You're just too good to be true
Can't take my eyes off you
You'd be like heaven to touch
I wanna hold you so much
At long last love has arrived
And I thank God I'm alive
You're just too good to be true
I can't take my eyes off you

Pardon the way that I stare
There's nothing else to compare
The sight of you leaves me weak
There are no words left to speak
But if you feel like I feel
Please let me know that is real
You're just too good to be true
I can't take my eyes off you

     棋藝不精，技不如人，有乜計丫，用拖字訣都無用，棄權，好歹都勉強算係主動丫嘛。 Da da, da da, da da da da，歌仔播到呢段Horns輕快吹出嘅過渡段，我就忍唔住跟住節奏撻起手指、頭擰擰起上嚟，再望住教授，企鵝登陸咁嘅姿態起身轉咗個圈，左搖右擺手舞足蹈咁跟住唱段chorus：

I love you baby
And if it's quite all right
I need you baby
To warm the lonely nights
I love you baby
Trust in me when I say
Oh pretty baby
Don't bring me down I pray
Oh pretty baby
Now that I've found you stay
And let me love you, baby
Let me love you...

順便送上YouTube link ：
https://www.youtube.com/watch?v=uuvPvUmEzoE

祝伊欣

(11)  戀戀不必捨？      少少酒精原來並唔能夠麻醉神經。 事後，Jessie攰到大昏迷，估計佢返宿舍之前應該隊咗唔少落肚。 而我徹夜半醒，無心睡眠，成晚個腦禁不住回帶，recap Jessie曾經講過嘅說話⋯⋯     「伊欣，你覺唔覺，『光輝BB』真係好正呀，呢，『馬B』身手成個『衞斯理』咁，人又風趣幽默，上咗『光輝BB』一堂，我已經愛上佢喇，哈哈！」 真的嗎，Jessie？ 當其時，我仲以為你係講笑嘅添。  「（你兇書呆子）妖，你講返廣東話得唔得呀？」⋯⋯「我簡單咁『翻譯』一下啦。 『愛』，就係發乎『內心』，再付諸『行為』嘅一種體現；換言之，『愛』唔係齋『講』齋『嗡』嘅，係要『做』出嚟嘅⋯⋯」  教授幫Jessie「翻譯」呀？ 嗰日我仲沉醉喺前一晚嘅「初吻」，烏下烏下，都無為意過呢個咁微妙嘅互動。佢嗰句「愛」嘅體現，都係密語嗎？  「唉，伊欣，好深呀教授講嘢，語帶二三四五關咁，就嚟mid-term喇，我都未落筆撩個功課大綱出嚟。⋯⋯」語帶多重關，正係教授絕技，傻妹嚟嘅，聽到一頭霧水，先至係正常。 哦⋯⋯咁唔怪之得⋯⋯ 「咦，文滌生教授！咁啱嘅，你又要搵馬教授呀？」 即係話，我推咗Jessie一齊食晚飯同溫書嘅提議之後，佢就去搵馬教授「問功課」喇？     我愈諗，愈不自覺咁極盡斷章取義之能事，只覺得幅拼圖就快畀我砌好出嚟咁。  「我同Joseph散咗喇。」係喎，自從嗰晚夜行彌敦道之後，Jessie好似開始有啲唔同咗。 無幾耐，直頭飛埋Joseph。 仲有，份mid-term Test，因咩事要無情情改做assignment丫？  原來Jessie仲有一份Marking Scheme添⋯⋯ 莫非，馬教授同Jessie獨處嘅時候唔小心畀佢睇到份卷，為咗唔好有手尾，所以先至同department商量改用習作代替期中試嚟評分？ 「我仰慕佢、鍾意佢，⋯⋯嗰一刻我哋先啱啱迷迷糊糊搞完嘢。 之後我好蠢咁問咗句：『咁我哋算係咩關係？』佢答我：『親密關係。』我屌。」啊⋯⋯，Jessie講緊嘅，原來就係馬教授嗎？ 佢哋係幾時搭上㗎？ 原來，「我」，只不過係教授「睇中」嘅「其中一個」嗎？ 「我識㗎啦，第一日出嚟『行』咩。」點解Jessie從來無話畀我知？唔⋯⋯ 我自己咪一樣收埋喺心，師生戀，地下情，係咁㗎啦。  「教授⋯⋯教授⋯⋯我唔介意默默做個『第三者』㗎⋯⋯」「係Professor Ma呀。嗚⋯⋯ 你唔好話畀其他人知呀伊欣⋯⋯」 我頭痛欲裂，好似畀心魔煎熬住咁，心如刀割－唔通，所謂「愛」係幻象嚟㗎咩？我同教授咁多日嘅相處，唔通係「假」㗎咩？ 馬教授，原來你一直都一腳搭兩船嗎？ 我從來無要求過你定位一下我哋之間嘅關係，所以你以為我同你一樣，都可以隨時放得低嗎？      「⋯⋯寫小說，同愛情一樣，易學難精。你哋只可以放膽去『寫』－用『心』，傾『情』咁去寫，以《紅樓夢》『滿紙荒唐言，一把辛酸淚』嘅姿態，將自己完全豁出去。 但以詩書教子弟，莫將成敗論英雄呀。此外嘅所有嘢，包括搵唔搵到『知音』，就絕非單憑你『個人意志』就能控制得到嘅嘢喇。 ⋯⋯『寫作』同任何一範藝術一樣，成日有庸人話想『學』，但永遠只係識捉住啲『高手』，模仿佢嘅『外形』，出盡吃奶嘅力去學人家『面頭』嗰一浸；佢哋忽略咗，人哋所呈現出嚟嘅『面』，係建基於無形嘅『底』之上嘅。只見其『面』，不見其『底』，只學『皮毛』，不理『精髓』，最終結局就係四個字：『似我者傻』－所以，同學仔，千祈唔好以為聽我馬光輝教嗰幾『招』，只要照辦煮碗，就必能成功呀！今個學期教過你哋嘅所謂『寫作技巧』，到你哋真正落筆之時，嘻，you’ll know Art is a lie that makes us realize the truth...  and in the end you’ll find out the last rule of all is “to forget the rules”。」      係嘅，教授啱嘅，但係我頂唔順喇。 今堂已經係尾二一堂，但係下星期只係用嚟收「功課」同埋填Course Evaluation問卷，即係實際上今日係最後一堂，以上就係教授嘅總結。 而Jessie仲喺房宿醉緊，我亦係神不守舍，遲到又早退。 。。。。。。。。。。。。。。。。。      呢個時候，有四個人响心入面獨白：      「咦，點解欣欣今朝咁唔開心咁嘅，今堂遲到又早走添？ 仲有坐佢隔籬個room mate Jessie，今堂直頭無返添。」     「今堂直頭無返添，但係我個頭仲係好痛－好痛，又不及心痛咁痛。 我好掛住文教授呀。 如果尋晚我收唔切口，講咗畀伊欣知嗰個人係你，佢實搵你尋仇都似喇⋯⋯屈咗馬教授食死貓，都係為咗保護你。咁你呢教授，你又有無諗過我嘅感受呀？」     「教授，你有無諗過我嘅感受呀？櫻花樹下嘅承諾，情話，你都唔記得咗喇咩？ 我真係好鍾意你。」     「我真係好鍾意你㗎，Jessie。無奈我哋相逢太晚，我已經係有婦之夫，畀唔到名份，承諾你，畀唔到幸福你。長痛不如短痛，我都唔想咁決絕㗎。」     「決絕啲，清楚啲，我要知道真相，我要聽馬教授親口講我知，到底係咩事，到底佢想我點做。」     「到底佢想我點做，真係要斷絕來往嗎？ 我真係要咁傻，繼續舂個頭埋去火堆呀？ 文教授係一隻無腳嘅雀仔，李卓詩，你聽住，千祈唔好犯賤，千祈唔好搲爛自己塊面。」     「已經搲爛自己塊面喇，哈，『性』『愛』分家？今次真係千年道行一朝喪，情場浪子鬼見愁。」 。。。。。。。。。。。。。。。。。     夜晚，Music Bar之內，我坐喺bar枱前面，猶豫緊好唔好將眼前打咗幾次、刪完又增、改完再改嘅message send畀馬教授。Live band正响隔籬奏起另一首歌： If I should stay I would only be in your way So I'll go but I know I'll think of you every step of the way And I... will always love you, ooh Will always love you ...     「伊欣？ 做咩你自己一個喺度飲悶酒？⋯⋯老馬呢？」     我心頭一震，唔敢即刻回頭望；聲音好熟悉，但係並唔係馬教授喎。 「咦，湯少你呀。⋯⋯你睇真啲，呢杯橙汁嚟㗎咋，我無飲酒呀。嚟飲悶酒嘅人係你咋啩？」「哦，我諗住嚟飲杯『水』咋。 你啱唔啱丫，請你飲杯？」湯少一面講，一面坐到我側邊。     「飲水」呀？ 係咪又係馬教授「考」緊我，畀杯「毒藥」我飲呀？ 我用力啜咗一大啖溝咗唔知幾多威士忌嘅橙汁，酒量向來淺嘅我即刻見暈暈地咁。 呢個時候，飲「水」抑或飲「酒」，同到底「澡雪精神」同「浴火重生」兩個邊個比較好啲，似乎屬於同一個層次嘅問題。  「唔使客氣，你一杯『清水』，我一杯『橙汁』，一樣可以叫『cheers』。 哈，今天應該很高興～～」 湯少柔聲接道：「『今天應該很高興』⋯⋯ 七個字，咦，伊欣同學啱啱創作咗世界上最短嘅sad story喎。」 Time can never mend The careless whispers of a good friend To the heart and mind Ignorance is kind There's no comfort in the truth Pain is all you'll find I'm never gonna dance again Guilty feet have got no rhythm Though it's easy to pretend I know you're not a fool I should've known better than to cheat a friend And waste a chance that I've been given So I'm never gonna dance again The way I danced with you ... 「心情唔好，仲聽埋呢啲歌，等於漏煤氣閂窗，弊咯。」 「嘻，黃子華嘅金句呀。咁，你話應該聽啲咩音樂好呢湯少？古典，大樂隊，啱唔啱呀？」 「我唔啱㗎－too much Sex (Sax-ophone) and Violence (Violins)喇，哈。」     我顧此失彼，問東答西，模糊間又聽到湯少食字。 Live band而家唱緊嘅係《Careless Whisper》，把色士風相當令人意亂情迷，令我不自覺挨近身邊嘅人，哄個頭埋去索吻。

～第十一章完～

[ 本帖最後由 祝伊欣 於 2016-7-27 11:12 PM 編輯 ]

祝伊欣

(12)  仲夏夜之夢－大結局      另一邊廂，Jessie同文教授正享受緊「最後的約會」－啱啱响一間酒吧嘅地庫度一齊欣賞完地下俱樂部搞嘅繩縛表演（Shibari）。 呢種帶痛嘅淒美，令人深感「釋放」，適宜幫準備分手嘅情侶鼓起勇氣講句「莎揚娜拉」。散場後，佢哋沿住曲折嘅樓梯行返上Music Bar，Jessie行去洗手間方向時，撞到馬教授。      「伊欣，我係湯少呀。」我擘大眼，又見到馬教授正同Jessie一齊企咗响不遠處，終於忍唔住行過去攤牌： 馬教授望住我行前：「伊欣，你同湯少？」 我指住Jessie，望住馬教授：「教授，你同Jessie？」 Jessie瞪大雙眼，一臉愕然咁問我：「伊欣，你同馬教授？」 Jessie估唔到，原來伊欣「蜜運」嘅對象就係「馬教授」，搞到尋晚情急之下講咗個大話，似乎搞出唔少誤會，但係又唔想畀馬教授知道自己咁樣「屈」咗佢。 文教授見到呢邊混亂嘅情況，又行埋過嚟：「咩事呀，老馬？」 Jessie：「無事呀，文滌。」馬教授：「我唔知發生咩事喎，滌記。」 我對住Jessie點一點頭，再講：「你唔好自己鬱埋喺心度，講畀教授知你有幾鍾意佢，唔捨得佢，仲有快啲去家計會驗下⋯⋯」 Jessie一臉緊張，迫不及待閘住我嘅一輪嘴：「伊欣，伊欣⋯⋯」 文教授即刻震驚地望住Jessie：「Jessie，你⋯⋯」 同時，馬教授亦震驚地望住文教授：「滌記，你⋯⋯」 Jessie對住文教授點點頭：「文滌，我知我好傻，我⋯⋯」 馬教授亦對住伊欣講：「伊欣，我⋯⋯」 一片混亂間，我似乎理清咗少少頭緒：「馬教授，我⋯⋯」 同時，湯少拉一拉馬教授衫袖：「老馬，我⋯⋯」 。。。。。。。。。。。。。。。。         「哇，黐線㗎，」我驚醒，「發埋咁嘅夢都有嘅？」 我坐起身，喺床上靜靜地消化咗陣，不禁打個冷顫：夢入面原來都會發噩夢，發春夢，夢中夢中夢，我究竟而家係醒咗丫抑或仲發緊夢㗎？      我再揉揉雙眼，對面床嘅Jessie仲瞓得好沉。 咦，而我書枱上面有張筆記吹跌咗落地喎，我馬上執返起佢，瞥眼見到係我溫習宋詞嗰時抄寫嘅蘇軾《永遇樂》：    明月如霜，好風如水，清景無限。 曲港跳魚，圓荷瀉露，寂寞無人見。    紞如三鼓，鏗然一葉，黯黯夢雲驚斷。 夜茫茫，重尋無處，覺來小園行遍。    天涯倦客，山中歸路，望斷故園心眼。 燕子樓空，佳人何在，空鎖樓中燕。    古今如夢，何曾夢覺，但有舊歡新怨。 異時對，黃樓夜景，為余浩嘆。      呆滯之際，我又恍恍惚惚見到「馬教授」喺面前溫柔提醒：「伊欣，學期完喇，你份『愛』的『功課』呢？」然後飄然遠去。 我順住窗口遠眺出去，一片晴天。 樓下棵櫻花樹，並無開到櫻花，只有兩隻蝴蝶飛過，停响樹枝之上同對方玩遊戲咁，無憂無慮、自由自在。 。。。。。。。。。。。。。。。。      「嗯，我已經做好你畀嘅『愛的功課』喇。 篇小說，叫做《戀戀馬教授》，十二章，啱啱好，請笑納。」

～第十二章完～

～ 全 篇 完 ～

[ 本帖最後由 祝伊欣 於 2016-8-1 07:49 PM 編輯 ]

祝伊欣

引用:

原帖由 鋒馬故如雲 於 2016-7-26 08:36 PM 發表


少女「經遲」。。
—日最衰啲麻甩佬。。唉~
麻甩佬又話 「—日最衰條撚」 :smile_42:
條撚又話 「關我撚事咩？」 :smile_42:，咁到底關乜事呢？。。 少女含醜半帶矜持 ，「我。。想你中出喺我裏 ...

嘿，雲哥哥，我知道下下就你「意思」嘅話，你又唔過癮嘅。 睇完大結局，唔好鬧我「玩嘢」呀

（玩3P？你就想喇 ）

。。。。。。。。。。。

最多補返張「馬教授與伊欣小秘書」嘅幕後花絮你睇喇：

祝伊欣

引用:

原帖由 dolcePastiche 於 2016-7-26 10:11 PM 發表
樓主師妹你好

做咗cd rom一輪, 真係唔好意思, 而家先嚟忍唔住留言支持一下... keep it up, 期待大結局:smile_o12::smile_o12:

甜美師姐你好 多謝支持－遲到好過無到呀，嘻

祝伊欣

引用:

原帖由 湯浴火重生 於 2016-7-27 01:31 AM 發表
一邊聽住《Can’t Take My Eyes off You》一邊寫呢篇留言。嘻，話哂都係我首飲歌，雖然依欣只係「飛機撞紙鳶」咁喺手機度點到，但都叫湯佬忍唔住「汁都撈埋」。

「黑貓都係貓，白馬都係馬，賤人亦係人，後門又係門，咁，錯愛都係愛丫⋯⋯」

睇到呢段，心已經酸。我睇文最鍾意睇到呢啲位，簡潔有力，一矢中的。

仲有最後一次更新就完結，先講一句：依欣，寫得好，期待破蛹成蝶。

欵，咁又唔只係「飛機撞紙鳶」咁簡單嘅。

你quote嘅嗰句，亦係伊欣肺腑之言，並唔係文字遊戲。湯兄識貨，知音呀～

再次多謝湯兄鼓勵，承你貴言，真的「成蝶」了。

祝伊欣

故事完畢，嘻，多謝收睇《戀戀馬教授》。

聽日得閒，先再寫幾句花絮啦，各位晚安。

:smile_o13::smile_o13::smile_o13:

祝伊欣

有事忙，幾日無上到嚟添。 見到樓上迪迪同甜美師姐嘅留言，好開心，嘻。 《戀戀》故事雖然連載完，但係我仲想寫篇後記，到時先慢慢一併回覆你哋


適逢「妮妲」逼近本港，夜啲掛八號波呀。 有啲mood，所以又蒲頭寫兩句。


向來覺得，颱風改個鬼婆嘅名，就好似一個exotic嘅符號、一個災難性嘅女人，總係零舍震撼啲：响狂暴旋轉的長髮之中，佢哋別有一渦嫵媚，隱約浮現出一啲同愛情有關嘅原始記憶。  失戀／得戀，就係一場颱風嘅蹂躪：她是他的一場宿命（反之亦然）。 正如，天要下雨，遠洋有颱風來襲，避都避唔嚟的。


今晚，妮妲準備拂過珠江口岸外嘅城市，或者會似一個好「李私煙」嘅成熟豔婦咁，朱唇半啟，有颱風眼一樣嘅心胸、嘯風般嘅長髮，雲唇如雨吻，沖洗大地，留低一地水窪、滿街瘡痍，將留低一陣愛恨交纏嘅旋風紀錄。 颱風一樣的女人，帶嚟嘅係一團雲濃雨烈嘅爭議－到佢已經喺華南登陸、消失於無形時，你會發現，你忘記唔到佢，但一胸暴烈、滿地潮濕，早响你心中烙下不滅的傷痕，留低一段刻骨銘心嘅回憶。

祝伊欣

  後記（當埋前言）


     《戀戀馬教授》，其實係一個「少甜多趣」嘅「愛情故事」，甚至談唔上觸及「師生戀」本質上嘅「禁忌」，只不過咁啱線，故事「取景」於大學校園咁解啫（同時，校園背景對伊欣嚟講比較熟悉，裝置都有原形參照，可以順手拈來嘛）－ 一來，「大學生」已經被視為有獨立思想嘅成年人，情慾自主；二來「師生戀」作為昔日嘅「禁忌之戀」，到今時今日早已經唔再係乜嘢驚世駭俗不能接受嘅事，加上呢個「長青」主題早有無數小說、電影用過，伊欣更意不在拾人牙慧，而比較想「掛羊頭賣狗肉」，用「舊題」翻出小小新意思。


     話返轉頭，雲哥哥「出題」畀我寫呢篇「幻想喜劇」，都算屎忽撞棍，注入多少「時代性」－皆因今年五月，香港補習界咁啱得咁「橋」有單幾轟動嘅「新聞」，一個「馬姓名師」捲入性醜聞，花生炒到一地都係。當時有啲人唔知係貪方便抑或刻意淡化／美化件事，用「師生戀」將單嘢定位，我係唔同意嘅－「戀」係兩個人之間一段相當深刻嘅「交流」，如果純粹係其中一方利用對方嘅弱點，呃蝦條（兼趙完鬆），更甚者以「愛」為名欺騙感情，咁都可以算係「戀」嘅，豈不是褻瀆咗真正嘅「師生戀」？


     《戀戀馬教授》呢個故仔入面嘅男女主角，作家兼客席教授「馬光輝」、大學生「祝伊欣」，喺一個學期嘅「小說寫作入門」班相遇。 結局最尾揭盅，「祝伊欣」驚覺原來由最一開始時（嘬住包朱古力奶，仰望住仲開緊花嘅櫻花樹），到上堂學寫文，到戀上馬教授⋯⋯一切一切「刻骨銘心」般嘅感受都只不過係場「美夢」。  所以，與其話我sell嘅係師生戀嘅掙扎奮鬥，不如準確啲話：故事中男女主角所「忌諱」嘅，係「虛擬／夢想世界」中愛情無法喺現實成「真」嘅「矛盾」，即係「在錯的時間遇上對的人」，嗰種總之無辦法開花結果，只能唏噓遊走於真實同虛妄邊界間，無人能「證」嘅「愛情」。


     夢與醒，真和假，生同死，從來唔係兩面極端，向來有好多交叠互涉點。 渾渾噩噩嘅人可以醉生夢死，人生如夢；調返轉，响一個「極真實」嘅「夢境」之中，人又可以真切咁「體會」過「愛」－幻夢雖然係「假」嘅，但過程、得着、感受則係「真」嘅。就好似故事末，伊欣執起嘅嗰篇蘇軾詞：「古今如夢，何曾夢覺？」－諗到呢度，人生似乎就唔需要太執着拘泥於啲乜鬼二元對立論，我哋亦都唔使太介意自己曾經「發夢」，因為對比起「人生在世」嘅呢場「大夢」，所有「夢中夢」都一樣，當虛幻係真實，任君選擇。


     咁所以呢，《戀戀馬教授》喺意識上並唔「鹹」，但因為重筆寫「愛情」，當然亦一點不「淡」，只係當伊欣諗到大家如果入得嚟坐，將「性福」交托畀我（嘻），無得J嘅話就有啲愧對各位看倌，先至偶或灑返多少鹽花上面咁。  實際上，「愛情」正係本篇重心－因為「愛」，會令其中嘅「性」變得有意思、有趣，脫離獸性多於人性嘅活塞運動呢個層面（正如「馬教授」所講「小說不愛情，可以判死刑」）。 咁當然，伊欣絕對唔係道德撚，無「主張」過唔可以齋「扑嘢」而唔「談情」，現實之中我都知道呢啲男女各取所需嘅事周不時都會發生，只不過「戀戀」整篇故事嘅核心、故事中嘅馬教授同祝同學所領略嘅係另一套：「性」係手法、過程、花絮、bonus，「愛」先至係終極目的。


     另一方面，伊欣亦都藉「小說寫作班」呢個背景題材，探討下寫小說嘅方法，抒發下少少「文學觀」，兼順便同大家分享一啲自己敬仰嘅作家、心愛嘅作品咁。所以，故事裏面祝伊欣嘅「文學偶像」「雅舍主人」梁實秋，現實中的確係我嘅偶像嚟嘅。 正如第三章「情迷月色下」提及過，秋秋當年因為政治環境，不幸被魯迅批鬥過－魯迅當然係勁人，名氣又大，就導致一啲人先入為主，以為畀佢鬧過嘅都係「壞人」，包括秋秋。身為秋秋嘅忠實讀者，我當然無孔不入，一搵到位就想出啲綿力還原下呢段歷史囉。


     而喺第七章「性愛研習crossover」同第九章「衝．突」裏頭出現過嘅「mid-term試卷」，亦係伊欣謹向四位作家致意嘅用心小製作： 劉以鬯，香港文學史上玩「意識流」嘅第一人，代表作《酒徒》、《對倒》，文學界中當然無人不知，事實上，法國（及西方）電影界極之推崇嘅王家衞，正正亦係劉以鬯嘅書迷，經常用電影鏡頭重現佢心愛嘅迷幻篇章。   也斯，真正香港本土嘅作家、文學家、學者，喺我啱啱升大學Year 1嗰年因癌症過身，當時我比較鍾意六合神遊嗰味濃烈浪漫嘢，未識欣賞佢，就喺佢過身前一年嘅一個新書發佈會上居然走去搵坐佢隔籬嘅葉輝簽書而對佢「視而不見」⋯⋯無幾耐我終於「睇得明」而且愛上佢嘅作品，但斯人已逝，每當諗起自己當年有眼無珠，都深感悵然若失呀，唉。   村上春樹，唔使多講啦，佢嘅小說，超現實嘅氣氛、深刻嘅人性、雋永嘅對白、聲影文字嘅交織，無盡咁引人入勝。唔知道佢幾時，會好似里安納度比卡超都係要經過N屆奧斯卡提名先得到影帝殊榮咁，先真係攞到諾貝爾文學獎呢？    黃碧雲，唔係嗰個議員喎，本土巾幗女作家，唔單止响文字故事取勝，更加係濁世中一股清泉，曾經獲提名「年度作家」，但因為拒絕要從689手中接過獎座，毅然放棄呢個榮譽，寧願唔要，呢種風骨，令我為之心折。



     《戀戀馬教授》，十二章，結構上「起承轉合」嘅斧鑿痕迹，好明顯喇，嘻，新手之作，多謝大家包容先。 上半場，第一、二章（「小說寫作訓練班」、「教授出題」），除咗情節同角色嘅鋪墊，主要着墨刻畫男主角「馬教授」嘅形象：脫俗豪邁、不拘小節、感情豐富、智慧深邃。 呢股強烈嘅魅力，令本來就浪漫勇敢嘅伊欣，不顧一切咁愛上。 點解真心傾慕一個對象，就唔會畀「世俗」嘅刻板觀念，例如年齡差距，成為愛情枷鎖？（當然從另一角度睇，「世俗障礙」先至係愛情中必需嘅燃料）。呢一點，伊欣就意圖喺第三章「情迷月色下」、第四章「你試過未？」為大家解答：古今愛情都係咁，梁韓之戀正正猶如馬教授同祝伊欣嘅「翻版」，佢哋點樣「撻着」，點樣「神交」，感受到彼此靈魂貼近靈魂，繼而由「靈」而「慾」，渴望靈慾合一。對於佢哋嚟講，相知相戀，就係兩個人之間嘅事，外人不足為道，亦無須明白。



（－第四章「你試過未？」）


     然後，第五章「表露心跡」、第六章「啱啱遇着剛剛」，亦即最關鍵兩章，因為課堂上嘅「論文」同師生二人豁出去、正式發生關係，係全篇故事第一個高潮，而且係首段清晰「露出」伊欣文學觀、愛情觀嘅篇章。  劇情方面，Jessie同文教授正式交接，引發之後多條發展線索；湯少粉墨登場，成為一抹伏筆；而場景跳出學校走到彌敦道，就係從地理至時空咁，產生時代感，增添愛情張力：教授年紀比伊欣大一輩，正係文迪留言指出「長樂街Peter仔」嘅「年代」；而伊欣雖然無經歷過嗰段時空，屬於翁子光《微交少女》嘅「年代」，但恰好戲中「少女」嘅阿媽（溫碧霞飾），正係映射返昔日嘅「靚妹仔」。 兩個「時代」嘅人，原來有微妙嘅牽繫，正好呼應返前兩章所寫嘅「古今事穿梭不斷」。

祝伊欣

  後記（當埋前言）－續


     頭六章啲「彈」，其實都差唔多畀雲哥哥拆Q晒喇，下半場嘅，比較多轉折位，就留畀伊欣解話兩句啦。  第七章「性愛研習crossover」，Jessie同伊欣兩個女仔嘅「閨蜜」式對話，所寫嘅其實係「兩性關係」中，性與愛，名與實嘅一啲睇法：伊欣被問到戀情對象時，聽到「男朋友」呢個term，當下霎時呆一呆，反映出個傻妹只管去愛，根本從未過問、要求過「名分」，甚至乎竟然未曾認真諗過，佢同馬教授之間嘅「關係」，叫做乜嘢；另一邊廂，Jessie以為自己可以勝任「SP」（Sex Partner）角色，肉慾行先，亦能夠好似潮流咁，分開性同愛，點知對着自己傾慕嘅文教授，不自覺「沉船」。有咗咁嘅「討論」，開始令佢哋挖深啲去反思，於是順理成章，有第八章「夜長夢多」同第九章「衝．突」，矛盾繼續加劇。




     「必須很久很久⋯⋯」三句，係台灣女詩人夏宇（嘻，又「天要下雨」喇）嘅詩句；伊欣雖則決定咗全情去愛，但仍然對未知嘅領域，心存疑問恐懼，需要理清。「衝．突」章，Jessie為咗想平息自己嘅「內心風暴」（真心鍾意咗文教授），嘗試將佢同文教授之間嘅性關係調整去純粹利益嘅層面－對於文教授嚟講，就係「有閪屌」，對Jessie嚟講，則為換取測驗標準答案、搏靚grade。



     到第十章「心燒冷靜」，開頭文、馬兩位亞Sir麻甩閒談，暗示文教授不久前決定同Jessie「斬纜」，但內心其實好矛盾，仍然關心Jessie；因此，引起咗「蝴蝶效應」－後來一連串嘅誤會大爆發；另一邊，伊欣只係叻「捉兒人」啫，並唔擅長「捉棋」，所以同馬教授短聚期間，「用腦」過度（唱完歌仔之後又因為有做愛做嘅事，而消耗唔少體力），直接間接咁令夜晚同Jessie「談心」時，一聽到「教授」兩個字就諗錯隔籬，誤會叢生，結果攬住Jessie齊齊崩潰。



     結尾兩章，第十一「戀戀不捨？」，唔止係伊欣徹夜recap拼湊嘅景象，仲有四個人嘅獨白，都示範咗每一個情人都有「胡思亂想」同「斷章取義」嘅高超能力。湯少再次出場，「技術上」添上曖昧一筆，music bar之內響起一曲《Careless Whisper》，正係講三角關係嘅，因此呢度有雙重意思：苦惱伊欣聽到首歌，諗到嘅係馬教授、Jessie同自己，但係湯少聽到首歌，好可能諗到嘅係老馬、自己同伊欣。 咁最終伊欣有無「點錯相」，「強吻」到湯少呢？應該係無嘅，因為湯少叫停咗：「伊欣，我係湯少呀。」











     所以，最後就好似樓上「甜美師姐」點評所講，臨尾一鑊，五個角色聚埋一齊，「煙花大爆花」，各有誤會，各有所思，正待一次過講清講楚。值得玩味嘅係，到底湯少最拉一拉老馬衫袖，佢想講嘅，到底係咩呢？咁伊欣就唔㧻破，留畀大家「玩」下喇。


     最後，再次多謝「馬教授」傾囊相授，無你，就無呢篇《戀戀馬教授》喇。  伊欣亦都衷心多謝所有讀過呢篇故仔，同埋留過言支持鼓勵嘅師兄姐，畀我初嘗到寫小說嘅樂趣。



。。。。。。。。。。。。。。。。。。

象徵／密碼小註腳

「蝴蝶」：係伊欣心目中，中國文學裏面最美麗嘅一個「象徵」。早喺三千年前一篇〈莊周夢蝶〉，由莊子變身主持咗文學飛行大典，影響後世所有詩人文人。

「任性嘅櫻花」：本意係「遲來的春天」、發生得不合時宜嘅美事（對於馬教授而言係一段「遲大到」嘅愛情）。本應初春先至盛放嘅櫻花，竟然到「仲夏」時節仲掛响度，亦都暗示咗成個故事係超現實嘅（夢）。

承上，「蝴蝶＋戀戀＋花」：典出柳永《蝶戀花》嘅：「為伊消得人憔悴。」（「消」通「值」，可譯做：為「你」，落得憔悴亦係值得。）

「Course」： 故事入面嘅小說班「課程」，同時亦解「過程」；莎士比亞《仲夏夜之夢》有句：真愛之途永不平坦。（The course of true love never did run smooth.）