那天在車上回程時，其實我有提起那件晚裝一事，我有問她會唔會買，Lucy在考慮，我打趣說。

我: 買左妳著得掂咩?
她: 哼，我今日就開始減肥。  ( 她聽起來就以為我笑她身型不夠好，托不起。 )
我: 我意思係…… 妳買左，妳隻手彎唔到去拉拉鏈啊，而我唔係次次都企係門口幫妳架，HAHA…….. ( 我在哈哈大笑，Lucy尷尬不己。最後當然換來被打。 )

那晚裝會重現嗎?可以說的是，那件晚裝，原來我日後還是有機會再見一次。

*****************************************************

距離最後一次考試的日子不遠，我和朋友仍是玩的玩，笑的笑，有人提議係考試前去一次BBQ，其實情況是這樣的，我們考完，就是暑假，有些人，會一考完，成績都未知，第2日就上機趕返香港，機票或許是會便宜一點，成績呢?最多返黎再睇都未遲，又或收email都可以。而我，仍未決定今次暑假返唔返香港，但就都贊成，玩埋呢一次BBQ先，之後就專心準備考試。我喜歡一大班人玩，從來都係，所以每次去BBQ好，打Bowling好，都10幾人，今次，當然也不例外。而搞手，正是Sylvia，她主力負責買食物，到星期六，一大班人開車的開車，幫手的幫手，是好玩和值得回味的，當中有些小插曲，那也不太重要，重要是，今次Lucy也有去，BBQ完左之後，她還病了。因為加拿大日夜間的溫差其實都不少的，有太陽無太陽可以係好大，一不留神，就會冷親，Lucy今次就中獎了。
Lucy唔舒服，我第2日(星期日)當然會車她睇醫生。她的情況不是很差，但感冒是需要休息的，加拿大和香港睇醫生唔同，香港睇醫生，係睇同拎藥同一地方，但加拿大好有趣，睇醫生去診所，但原來拎藥係要去另一地方自己配。當我車她到大型連鎖藥房( London Drug ) 去取藥時，她顯得更是疲倦。

我: 不如妳係車度等我，我入去同妳配藥啦。
Lucy: 我仲想買麵包食呀，不如你陪我入去
我: 仲麵乜鬼野包，今日既野食等我黎啦。

換著平時，我只是會車她睇醫生和拎藥就算，但一想及她的Homestay也好像不會點樣照顧她和不太安全，我就建議車她回Homestay，叫她不如簡單執幾件衫，之後去我家休息幾日，這樣想，純粹出於好心。

當回到我家時，我已著她先食藥，再上床休息，晚餐我會準備。不要幻想有什麼豐富的晚餐，沒有。有的，只會是簡單的粥，清淡的肉同菜而已，其極量，是昨天BBQ時飲唔晒的汽水，那當然只會是我飲，我在她面前飲…….. 那時她醒來已是下午了。

Lucy: 你好衰。 ( 我在咕嚕咕嚕的飲。 )
我: 我咁樣都仲衰? ( 我答時，Lucy行去廚房，她發現正在用砂煲煲緊粥給她。 )
Lucy: 今晚真係得粥食喳? ( 我的是開放式廚房，她在不滿一連兩餐同一樣野食。 )
我: HAHA……..咁妳想食咩? ( 此時，我的手機響起，是Sylvia打來。 )

{電話} Sylvia: Dragon? 
{電話} 我: 係?有事?
{電話} Sylvia: 你唔記得左? ( 我個腦飛快地回片，係，我醒起了，尋日BBQ時，係差不多走人既時候，Sylvia問我想唔想拎燒唔晒既野食走，我怕煮所以拒絕左，佢就細細聲同我講，燒唔完既雞翼同腸，佢會拎部份走，今日烤好後，再俾我食，咁我當時就無拒絕到點頭接受左，但今日居然完全忘記左呢件事。 )
{電話} 我: 哎呀，唔好意思，一時忘記左。
{電話} Sylvia: 唔緊要啦，我而家拎黎俾你好無? ( 我地都係住係學校附近，2人住所相距約15分鐘車程，算近。此時……….. )
{電話} 我: 妳已經整好野食，仲要妳開車咩，不如我過黎拎啦。
{電話} Sylvia: 你屋企唔方便。 ( 正當我猶豫之際，Lucy聽到我講野，就從廚房探頭出來大叫。 )
Lucy: 我想食香口野啊~~~~ ( God…… 我心底無打算給人知Lucy在我家。 )
{電話} Sylvia: Lucy係你屋企? ( 奇怪Sylvia一問時我在心虛。 )
{電話} 我: 哦………..係啊，佢唔舒服，所以我車佢睇醫生，而家係我度。 
{電話} Sylvia: 所以你唔方便?
{電話} 我: HAHA…….當然唔會。
Lucy: Sylvia，係唔係仲有其他野食啊。 ( Lucy在我旁高呼。 )
{電話} Sylvia: HAHA……..你同Lucy講，我而家開車黎啦，你就準備一下啦。
{電話} 我: HAHA…….好好，麻煩晒。( 就咁樣，Sylvia將會開車黎我度一齊食野，Lucy的任性我是面露不悅但其實也無相大雅的。 )

就這樣，Sylvia來了我家一起食飯，事實上其實係Sylvia煮，加熱返佢整既野食，而我呢，則在弄我原本煮好的東西，Lucy就在放好碗筷。

我: 太好啦，我原本今晚只係得同Lucy食同一樣野架喳。
Lucy: 係呀，Dragon整既野好悶好寡，好彩有妳喳Sylvia。
我: 有無搞錯，使唔使咁講野啊…………
Sylvia: HAHA……… 咁我係咪要講，你地鐘意食，我黎煮多D都得。
我: HAHA……. 咁又唔使，妳估佢長住係度咩…….. ( 我在瞄一瞄Lucy。 )
Lucy: 咩啊?你趕我走架? ( 呢句說笑帶認真成份的問題，令我忽然擔心她的Homestay問題。 ) 
我: HAHA……. 咁又唔係，麻煩妳好番先再講。
Sylvia: Lucy妳見點?可惜我果度無位，如果唔係，妳都可以黎我度。 ( Sylvia係同2位室友合租3房單位的。)
Lucy: HAHA…….. 放心，我都真係搵緊地方搬既，問題應該唔大。
我: 哼，可惜搵左成個月都未得啦，花心啦一定。
Lucy: 都唔係…………..

就咁樣，我地說說笑就食完飯，煮既然是Sylvia，洗一定是Lucy，而我在幫手抹乾，Sylvia呢，在我家閑逛。到走時，我就送Sylvia往車場。她準備上車時……

Sylvia: 你係咪唔鐘意我尋日咁做? ( Sylvia提起的，是我講昨日BBQ的小插曲。 )
我: HAHA……. 既然過去左，我OK既。 ( 講緊既係，BBQ時，Sylvia又再有意無意間，會將我同佢拉近，當眾果隻，講緊既係，我燒好既野食，佢很自然就拎黎食，呢D身體語言，就像告訴別人知，我同佢很多東西都係共享中的…… 什麼關係才會這樣呢?實在顯而易見。 )
Sylvia: 但你既表情，唔似鐘意我咁做喎。
我: 唔…… 如果下次妳通知聲我知先，感覺會被尊重，會好D既。 ( 我唔喜歡”被共享”，我喜歡一切來得自然既共處………… )
Sylvia: HAHA…….OKOK，下次我會留意既。
我: 傻啦，好小事遮，所以妳今日黎，係想睇我反應?
Sylvia: HAHA…….一來啦，二來，我有疑問，可以講我知，你對Lucy既態度係點嘛?
我: 我?兄妹囉。Tony既事，妳知嘞。
Sylvia: OK……..我唔鐘意迫人，但我喜歡清清楚楚明明白白。
我: 妳意思……..
Sylvia: 你應該知道我對你係有好感。
我: 我知。
Sylvia: 咁就好嘞。 ( 講完，Sylvia微笑一下就上車走了。Sylvia很清楚表明她的心意和立場我知，而我呢?我的又是什麼? )

我呢?我不喜歡拖泥帶水，現在也不是要享受左右逢源，只是想搞清楚自己心意，當回家後，我示意Lucy去沖涼食藥，早點休息。在她沖涼時，我在執拾房間，我忽然醒起，剛才Sylvia在我家閑逛時，必定看到了睡房放置了兩張單人床，床邊都是Lucy的衣服和日用品，那意味，Sylvia知道Lucy來我家住之外，我倆是同房的……..而那，現階段不是我想給人知道的事………….

********************************************

我呢?我不喜歡拖泥帶水，現在也不是要享受左右逢源，只是想搞清楚自己心意，當回家後，我示意Lucy去沖涼食藥，早點休息。在她沖涼時，我在執拾房間，我忽然醒起，剛才Sylvia在我家閑逛時，必定看到了睡房放置了兩張單人床，床邊都是Lucy的衣服和日用品，那意味，Sylvia知道Lucy來我家住之外，我倆是同房的……..而那，現階段不是我想給人知道的事………….

 

********************************************

 

 

給Lucy來我家住，我是真心擔心她為出發點的，因為考試很快就到，食藥、休息、戒口，我都好嚴格，以她跳脫的性格我知是一定會偶有反抗，但情況還是在我說一不作二之下進行。到第2日返學，我車她之後就各有各忙，始終考試臨近，再沒時間去想男女之間既事，但當然，食晏是需要的，我只知Lucy和Mandy她們在Canteen食晏，所以就算我忙自己考試既準備，都想過去打招呼，當去到Canteen時，卻給我看見，她居然在食炸雞件和薯條，那是Roy買給她吃的。而我很快走過去，她也給我嚇一跳。

 

我: 妳知唔知妳仲未好返? ( 我走近Lucy眼前，罕有地嚴肅起來。 )

Lucy: 食一兩條之嘛……… ( 我當然知唔止一兩條，但Lucy就係咁。 )

我: 咁妳食左藥未?

Lucy: 食完飯咪食囉。 ( 我的語氣，近乎發惡，當然令Lucy感覺到我是認真的。 )

Roy: 佢都係食左幾條之嘛，佢今日都無點咳同打乞嚏啦。 ( Roy的頀花，卻挑起了我的怒火。 )

我: 原來無咳同打乞嚏就可以唔使戒口。如果係咁，即藥都唔使食啦。佢下星期考試，你幫佢啦嘛? ( 發惡，首要規矩係強詞奪理，對手係同性，力度可以加多2~4成，唔使太客氣。咁樣一講，Roy當然無言以對。 )

Lucy: 係啦係啦，唔食喇唔食喇。 ( Lucy有點兒悔氣。 )

我: 唔需要勉強。 ( 我嘛，更拂袖而去。頭沒回，就離開了canteen。 )

 

我的嚴厲態度，回想有點似Tony，但其實對Lucy，我需要嗎?我也搞不清楚，但有一個尷尬位就係，換著以前，我地鬧交，唔理對方一日，第2日就會無事，但今次唔同，Lucy近日都在我家休息和溫習，今日一鬧，以前我是慣常在學校等她放學的，今天，仍等嗎?到放學時，我就先放書包上車，我選擇等Lucy，而此時………..

 

Mandy: Dragon。 ( Mandy出現在車場，似是等我出現。 )

我: 妳搵我?

Mandy: 我直接D，做咩對Lucy咁惡既? ( 剛才Mandy也在場，只是沒出聲。 )

我: 星期六同佢BBQ之後佢病左，我尋日先同佢睇醫生喳，黎緊就快考試啦，仲亂食野，係唔係嬲先?

Mandy: 真係嬲呢樣?定嬲阿Roy買野佢食，抑或佢同其他男仔親近先?

我: 咁我又無咁小氣，佢同男仔玩我係OK既。

Mandy: HAHA……我都覺得你唔係D咁既人，但你會唔會不自覺想將佢私有化先，所以叫佢黎你度住先。

我: 唔會啦，我估妳知佢Homestay既事，我叫得佢黎我度，我當然唔會諗果D野啦。

Mandy: 唔…..算你啦，你都應該唔會係做埋呢D小動作既。講真，Lucy被你鬧一鬧，都知錯架啦。

我: 我無嬲佢，咁佢呢?而家人係邊?

Mandy: 係我車度。 ( 講完，Lucy就係Mandy架車度行左出黎。 )

我: 食左藥未?見好D未? ( 我用上正常亦較溫柔的語氣問。 )

Lucy: 食左啦，仲好返好多添。 ( 其實邊可能，但換來Lucy輕快的回話，感覺，一切不快事也沒發生過事一樣。 )

我: 唔該妳Mandy，咁我地走先喇。

Mandy: {輕聲} 你咁樣，係唔係叫做同Lucy一齊啊? ( 佢咁問，亦有道理。 )

我: 唔……. 一切都等考完試先，而家唔諗其他野住，好無?

Mandy: 你講架。 ( 我地大致意思係，我唔會同Lucy一齊住既呢段時間乘人之危，更會真的以應付考試為主。Mandy，我認為她是真的關心Lucy。 )

 

今次呢個考試，事實上Lucy比我更緊張的，因為今次係佢黎加拿大既第一個semester，佢既成績，佢父母係要第一時間知道的，而且其中一科還有機會拎Top Student，所以佢認真係必然的，那麼我呢?我不嬲都講，我OK就算，所以接下來的10多天裡，我就負責起大家的起居飲食來。Lucy嘛，也樂得有人照顧。忽然間，感覺2人好像在試行緊同居生活，那情況……… 是甜蜜的，因為…… 曖昧由此展開。

 

超市飲食篇-----

Lucy: 又係呢隻skimmed milk，好味咩? ( 我飲開，感覺是有奶味的浠水。 )

我: 唔係架………..

Lucy: 咁你又買?

我: 因為我唔想好似有D人咁………..肥左而不自知嘛。 ( 我說時是睇住Lucy，加賤佬式笑容。 )

Lucy: 你講我呀? ( 講完，她在打我，而當晚，我記得她沖完涼是在照鏡的，而後來是…….從此她跟我一起飲skimmed milk來。 )

 

###

 

Lucy: 你食牛扒鐘意幾多成熟? ( 當時行經凍肉位置。 )

我: 3成熟喇……

Lucy: 咁生?

我: 咁……..3成生好喇~~

Lucy: 咩呀?3成熟又3成生，其餘點架?

我: 再3成半生熟囉。

Lucy: 阿腥，3成生，3成熟，再3成半生熟，仲有1成喎。 ( Lucy已有點沒好氣了。 )

我: 見妳問咁多，咁好人，即會整俾我食啦，仲有1成就……..俾妳當貼示好無?

Lucy: 好好添…… 慳D啦你。 ( 同Lucy傾有度好，佢後生，唔會記得，果句野其實係電影對白……. )

 

家居飲食篇-----

 

當Lucy病好後，還有幾天就進入考試，大家都努力溫書，我嘛，充當起外賣仔和大廚。

我: 煮好飯啦，過黎食喇~~~~ ( Lucy聽後，就放低書本行過來。 )

Lucy: 你煮架?

我: 係呀，試下味。

Lucy: 真係你煮?點解D味咁似樓下果間茶餐廳既?

我: 因為………….. 真係樓下果間茶餐廳嘛。

Lucy: 咁你又話你煮?

我: 哦?係架，我無講大話架，妳食緊果碗飯，係我煮架。

Lucy: 咁你叫得外賣，又煮飯?

我: 因為………….. 唔要飯平D嘛。

Lucy: 咁都得?

我: 小姐，將就下好喎，家陣我都考緊試架喎，我已經又煮飯又拎外賣，妳係度印印腳喳喎。

Lucy: 係係係…………..

我: 咁好唔好味?

Lucy: 好味。

我: 咁要點報答我?

Lucy: 吓?食完洗碗囉~~~~

我: 食完洗野就梗架啦，應該係要同我按摩下先啱。

Lucy: 咁D野唔係好好食喇………….

我: 咁都得?

 

###

 

Lucy: 阿N整野食係唔係好叻架?

我: 佢OK架，咪住，同邊個比先?同妳比?佢超叻啦。

Lucy: 咩啊?我都識整好多野食。

我: 除左甜品，果一千零一件之外，我未見識過囉~~~~

Lucy: 你鐘意食咩?

我: 咩都鐘意，但我指食得落肚，唔會病，唔死人，妳都會食番果種喎。

Lucy: 睇少我?哼，考完試我落廚。

我: 咁得人驚……..都好考完試先煮，唔怕返唔到學。

Lucy: 我意思係我考完試之後先得閑呀。

我: 係係係…………

 

以上當然只係簡約寫左我同Lucy既同居生活初期，因為現階段始終以考試為主。其實，呢次係我第一次同女仔單獨一齊住，回想返，同阿N拍拖，佢同佢阿哥住，我地有一齊住既日子，都係去旅行時先有。而每晚同房瞓，每朝起來同人爭洗手間既生活，是和Lucy才有的，當然，亦有趣非常啦。因為佢唔係我女友，我唔使同佢客氣嘛~~~~ HAHA……………..

 

而Mandy當然知道，Lucy病好後，在考試呢段時間，她仍然住係我度，Mandy亦問了一個我在思考的問題，那天，已是考試周裡的其中一天，我倆真的巧合在車場碰上。

 

Mandy: 點啊，我近日見Lucy好開心喎。

我: 嗱，我無做過咩架。 ( 我意思係，我地係同住，但真的認真溫書。 )

Mandy: HAHA…… 我知，Lucy亦講你無任何明示暗示。雖然有D失望，但都心滿意足。

我: 我仲未同Tony提起Lucy黎住一事，所以…….我唔想將事情複雜化住。我唔想朋友拜託我既事，變成我有機可乘既籍口。

Mandy: HAHA……. 就係呢個原因?

我: 講真既，一開始，我當Lucy係阿妹看待，我人前人後都會咁回應。我仲教阿Roy追Lucy添，但而家我追左，好似會好衰。

Mandy: 乜咁樣架咩?我認識既Dragon係唔會理閑人既目光同說話架喎。

我: HAHA……. 係咩?其實…………呢個真係唔係原因既。我猶豫既原因，可能仲白痴。

Mandy: 咁即係咩呢?

我: Lucy講佢未拍過拖。

Mandy: So?

我: 即如果我同佢一齊，我就會係佢男朋友。

Mandy: 當然，你同佢一齊，係唔會變左做佢阿哥架喎。

我: …………… 我意思係，我會係佢……….. 第一個男人。

Mandy: 嘩吓，我以為你擔心D咩?係唔係男人都只會諗埋D咁既野既呢?

我: 唔係呀…………. 即妳明唔明……………. 哎，出自男人口，好似仲無說服力，但我係有考慮囉。

Mandy: 原來你都幾婆媽架喎。

我: HAHA……… 呢D咁奇怪既諗法，我都只敢同妳講，但唔重要喇，一切以考埋呢個試為先。

Mandy: 係既，仲有2日之嘛。係呢，你訂左機票未?今個暑假會返香港嗎?

我: 其實未，妳呢?

Mandy: 我會返去啊，但你而家都未訂，9成都唔返啦，而家訂最貴……..

我: 咁又係…………..

Mandy: HAHA…………咁得啦，我聽Lucy講佢都唔走，你地咪可以暑假搵地方一齊慢慢玩囉。

我: 吓?有D咁既事?? ( 就咁樣，我懷住一份黎緊會做咩玩咩既心情講88。 )

 

好快……. 考埋聽日個試就輕鬆晒，今晚，我同Lucy係屋企樓下食完飯，之後就快快返屋企溫書算，去考埋聽日最後呢一科。係回程既車上…………..

 

Lucy: 估唔到好似又咁快考完試，一開始感覺好似好耐好漫長咁。

我: 咁妳有無信心先?

Lucy: 梗係有。

我: 我指Top Student喎。 ( Lucy想一想。 )

Lucy: 都有既…….

我: 咁叻?咁呢段時間既努力，總算無白費到。

Lucy: 如果呢…….

我: 咩事，請講。

Lucy: 如果我真係拎到Top Student，可唔可以應承我一樣野呢?

我: HAHA…… 咁妳拎到先講啦。

Lucy: 咁快D返屋企啦。

我: 點解呢?

Lucy: 因為聽日果科，先係我最有機會拎Top Student果科黎架。

我: HAHA…… 咁都得，仲以為妳已經考左添。

Lucy: 問完你，咪份外有鬥志囉。

 

回程時，我係度諗，我地原先一早好粗略咁講好左，佢只會住到考完試為止就搬走。咁佢今次一問，佢係想我應承佢呢樣野，定還是咩呢?一切，都有待幾日後出結果時，先至知道。然而，事情的變化，總比計劃要來得快………….

 

****************************

坐好先

報到，轉場

好野。。報到先

入咗先，遲D睇

生日快樂:smile_40:

生日快樂:smile_40:

好正既曖昧日子。。

[taguid=5561770]cococaobrownie[/taguid]    生日快樂~~~