第二十二章.篤背脊
Nadia喺總店返左工冇幾耐,已經引到一啲男人特登去睇佢而且重要求同佢合照,自然引起Tina妒忌,除左叫secu請啲男人走之外,又去同Ronald講,話Nadia引埋啲無謂男人黎總店影響生意,Ronald聽完之後話:「我都留意到,你去叫Nadia入黎。」
「Nadia,Ronald要見你。」Tina冷冷噉話:「你個位我會搵人頂住先。」
「知唔知咩事呀,Tina姐?」Nadia好奇一問:「我好似冇做錯嘢。」
「唔知呀。」Tina敷衍佢:「你入去見佢就知啦。」
「噉好啦。」Nadia唯有話:「唔該晒Tina姐。」
Nadia獨自行去經理房,Tina望住佢行入經理房,心中高興:「今次你重唔死,實畀Ronald剷到你上天花板。」太約半個鐘頭後Nadia從經理房行返出黎,Tina故意問:「點呀,Ronald有咩同你講呀?」Nadia搖搖頭話:「Ronald叫我唔使再做門市。」
Tina心中叫好:「以後唔使喺度篤眼篤鼻。」口就扮晒安慰:「唔緊要啦,你咁靚女,一定有第二份工啱你嘅。」Nadia微笑話:「多謝你呀Tina姐,你同Ronald講嘢都係差不多,咁我就放心推銷公司嘅產品畀大陸客嘞。」
Tina唔明:「你講咩大陸客呀?」Nadia解釋:「Ronald要我過幾日接待由大陸落黎大客,向佢地推銷公司嘅產品。」Nadia即刻話:「冇可能,咁重要嘅客點會交畀你。」Nadia話:「喺囉,我都係噉同Ronald講,不過佢話我要對自己有信心,重叫我攞啲保養品返屋企好好保養一下,以最好狀態去見客,我走先嘞。」Tina勉強點一點頭。
Nadia之前入經理房:「Ronald,搵我咩事呀?」Ronald淡淡話:「估唔到你受男人歡迎喎。」Nadia即刻話問:「點解咁講?」Ronald再話:「每日都有唔少男人黎總店睇你。」Nadia話:「我都唔想架,我又唔係靚,身材又唔好,都唔知有咩好睇。」Ronald再話:「女人嘅吸引唔一定係黎自樣靚身材正。」
Nadia好奇問:「你覺得我吸引力?」Ronald答:「係,所以為免引起不必要麻煩,我決定調你離開櫃位。」Nadia有啲驚:「你要炒我呀?」Ronald急忙話:「唔係,以你嘅吸引力唔一定要做門市,我有另一個好重要項目畀你去做,就睇下你敢唔敢接受挑戰...」
Nadia走左冇幾耐,Ronald就行出黎:「Tina,你入一入黎。」心中充滿不忿嘅Tina跟住Ronald入到房:「搵我有咩事呀?Ronald。」Ronald遞個信封畀佢:「你拆開黎睇下。」Tina拆開封信一睇,頓時覺得有啲突然:「你要升我做分店經理?」
Ronald話:「係呀,以你嘅年資同埋工作表現,應該要升做經理嘞,我重特別安排個旺區畀你,對你想來升分公駒區經理有好大幫助。」Tina質疑:「Nadia黎左冇幾耐你就升我,係咪睇中左佢,想調走我呀?」Ronald認真話:「你唔好亂講,我係同Coral商量之後先決定升你。」
Tina不屑一笑:「係咩,乜唔係玩厭左我?」Ronald話:「你要噉諗我都冇辦法,但係你信唔信都好,係Coral最終決定嘅,我都冇辦法。」Tina嚴肅話:「噉我再多辭職。」Ronald勸佢:「你冷靜啲先,唔好咁衝動住,我放你兩日假畀你慢慢考慮清楚,你再返工嘅時候我地再傾啦。」Tina臨離開佢間房嘅時候轉頭講:「你唔好諗住飛走我。」
Nadia出左總店立即打手機畀Newton:「好開心呀,經理交左個重要項目畀我去做呀。」Newton話:「噉叻女呀,上黎我娛樂公司搵我,我傳個地址畀你。」Nadia跟住個地址去到間娛樂公司搵Newton,Newton見到佢一臉笑容,拉住佢隻手:「我帶你參觀下我公司。」
Nadia跟住Newton四圍行,聽佢介紹公司各部門,最後去到攝影室見到Lesia喺度影緊相,Nadia喺Newton耳邊話:「Lesia真係好靚,你一定玩過啦。」Lesia轉頭望到Newton黎度本來好開心,但係再望到佢身邊企左一個態度親暱嘅女人,即時臉露出不悅...