從同前女友嘅對話同語氣當中，幾乎肯定百分之九十以上呢單嘢係佢做，只不過苦無証據而已，雖然佢矢口否認，嚟到後尾，可能我逼得佢好緊，佢開始唔耐煩，仲語帶恐嚇嚟警告我，好漢不吃眼前虧，之前嗰次已經被佢搞到我人又傷，屋又爛，錢又冇，工被炒，我真係抵受唔住進一步嘅衝擊，老友就係最好嘅一個人辦，前女友最後仲逼我為不實嘅指責向佢道歉，我唔想被人伏擊再打爆頭，唯有死死地氣講咗一聲對唔住，佢順番條氣之後再同我講，禍從口出實在唔要得，俾人打死反而一了百了，俾人打到半生不死先大鑊，你話係唔係！我答話不能再同意更多就嗱嗱聲收線。

想為老友討回一個公道，結果弄巧反拙，反被前女友玩番轉頭，噴到一面屁，實在自討沒趣，講真一句，所謂討回公道，最好咪鬧佢一餐而已，對佢嚟講只係不痛不痒，毫無作用可言，唔通走去打佢一身，佢係我前女友，我實在做唔出，而且可能要負刑責，換來一生遺憾，最弊係未教訓到人之前，已經俾人打到半死，而家最需要做嘅，反而係努力重新做人，積極揾番份好工，盡力幫助老友渡過難關，再去揾番個正經啲嘅女仔，帶点邪氣嗰啲，都係敬而遠之好。

色字頭上一把刀，呢幾個月俾兩個女仔搞到暈頭轉向，接近精神錯亂兼身心俱創，喺一連串唔好結果之下，終於平靜下來，係時候恢復正常生活，首先要積極去揾工，盡量爭取多啲面試機會，成功率會高好多，喺不斷努力之下，終於揾到份性質同以前一樣嘅工，只係人工少咗兩成幾，真係水瓜打狗，仲要主動揾客交數，唔夠額分分鐘要食自己，都好慘，然而形勢比人強，在在需財去支撐生活，老友處身危難亦都需要我接濟，只可以講一句時不我與，好彩以前份工儲落一班客，聯絡番佢地似乎又唔係十分難，原來自從自已離職之後，新接手位仁兄成日揀客做，顧大唔顧細，好多以前啲舊客無啦啦變咗孤兒無人理，見我呢個老伙記都好肯主動轉數過嚟，令我新工作增添一批極為重要嘅生力軍，工作穩定下來之後，又開始有少少飽暖思淫慾嘅感覺。

自從同前女友分手之後，已經有成幾個月未開過齋，成日靠食飛機餐打空槍，非常無癮，自己又唔鍾意出去叫，又唔想出去蒲，揾埋啲三唔識七嘅陌生對手，喺啲客入面都有一件半件有得諗，但係有違客戶道德底線，萬一出事比人告發，職場生涯即時玩完，風險實在太大，於是一心一意諗住識番個女仔，可以無牽無掛同佢上床，點知事與願違，非但未竟全功，仲俾人搞到一鑊泡，身心俱殘，冇見Irene已經一段長時間，唔知係咪自己犯賤，雖然佢對自己傷害好大，但心底裡仍然好掛住佢，每當經過佢工作地點樓下，都不期然停下腳步，彷彿佢就喺我身邊經過，激蕩嘅心情久久未能平伏，有人話:念念不忘必有廻響，我都好希望有呢一日嘅發生。

天台同屋企賓賓

工作穩定下來之後，生活亦都相對穩定下來，扣除所有開支，包括還債與及接濟老友，仲有少少餘錢可供使用，於是利用假期相約三兩好友去台灣旅行散心，相比起以前同前女友一齊去旅行，日頭周圍遊山玩水，夜晚都繼續遊山玩水，真係不可同日而語，今次有條友仲帶埋女友一齊同行，兩個人自己一間房，日操夜又操都得，酒店房隔聲好差，第一晚已經聽見佢地殺聲震天，淫聲浪語此起彼落，聽到我地兩條麻甩佬心神不定，心癢難熬，漫漫長夜唔知點過，都唔知係咪有心整蠱，向我地兩條寡佬示威，第二朝食早餐仲要喺我地面前卿卿我我，旁若無人，激到我地想男嘅打佢一身，女嘅就地正法，以作教訓。

早餐後留在台北玩咗一日，跟住就搭高鐵向高雄進發，夜晚入住一間叫做德X莊飯店，呢間隔聲好好多，唔駛再俾人搞到冇覺好瞓，第二朝就喺酒店食早餐，食食下忽然見到個服務員女仔，幾靚女又有氣質，做嘢好勤力又有禮貌，不期然不停向佢行注目禮，仲成日借啲倚問呢樣咁嗰樣，呢位台灣女仔好有耐性，不厭其煩咁答我明知故問嘅問題，佢似乎都感覺到我有啲異樣，當我同佢有眼神接觸嗰一刻，大家都有少少火花擦咗出嚟，再落嚟我當然唔想錯過呢次機會，決定嘗試借問景點問題來約會佢，朋友好識做，自動散band嚟成全我，雖然唔知成功機會大唔大，但係已經覺得人生充滿希望。

早餐時間係到十点半為止，我自然一路慢慢食到尾都唔捨得走，這位台灣女孩走過來同我講:先生您好！我們早餐時間到了，要結束了！您的胃口很好，歡迎再次光臨！謝謝您！我把握住呢個機會向佢搭上話:不用謝，你們早餐很好吃，我下次一定再來，不過這樣，你可以幫我一個忙嗎，我剛給朋友甩了，我第一次到高雄來，甚麼景點值得一去我也不懂，你可以介紹嗎？女孩有點猶疑就話:高雄景點很多，您可以到柜台拿小冊子來參考就可以啦！咁嘅斷絕式回答我梗係唔制啦，即時再拉住唔放話:我之前已經看過，可是很複雜，我看不太明白，請求妳可以親自給我介紹嗎？女孩大慨知我心意，有啲為難就話:可是我現在還在上班，有很多事情要做沒時間，很抱歉！我捉住佢唔放繼續話:沒關系妳甚麼時候下班，我可以等妳，妳可以放心，我今天晚上還是住在這裏，我是香港人我不是壞人，女孩考慮咗一陣就話:好吧！我今天下午一點下班，您可以等嗎？我說:可以，當然可以，就算等到晚上都可以，女孩笑着說:太誇張啦吧，晚上還能旅遊嗎！我說:可以，我可以請妳吃晚餐啊！女孩笑得合不儱咀答道:那請您下午一點在大堂等我吧，我叫小嫻。

此刻台灣女孩小嫻回去工作，班朋友一早走咗唔知去咗邊，我就一條友百無聊賴周街逛，時間尚早，於是揾咗間叫做路依莎嘅咖啡室坐底飲咖啡消磨時間，點知悶得滯瞓著咗，紥醒嗰陣一睇表，唔得了已經十二點半，於是即刻埋單行番酒店，以免錯過約會，點知人生路不熟行到成身汗亂晒籠，時間已經淨番五分鐘到一點，點算！遲到約會好可能玩完，好彩仲可以飛的返去，到酒店已經過咗五分鐘，大堂入面完全唔見人，死啦！會不會小嫻唔見我走咗去，咁呢次約會咪泡湯，正在後悔又担心之際，小嫻就安然地出現在我眼前，真係嚇到我心都跳埋出嚟，見到佢我開心到不得了，好想第一時間上前攬實佢，但係我唔敢亦都唔可以。

脫下工作服的小嫻是另一番光景，上身是一件紅黑格仔裇衫，下身則是着住一條緊窄牛仔褲，着得好有型，美妙身段表露無遺，見到我面第一句說話係:先生您好！遲了十分鐘，不好意思。見佢咁公式化我就話:小嫻，容許我這樣直接叫妳嗎！已經下班了，現在我再也不是客人，而是妳的朋友，不要那麼見外，妳叫我小林好啦，叫先生有點不自然。小嫻不置可否，只是微笑點頭，然後話:哪我們到那邊沙發坐下，讓我向你介紹一切吧！我心諗喺酒店大堂傾談，咁約會咪好快玩完？唔得，點得㗎，跟住作出提議話:不好，這樣子太拘束了，很公式化，再者我要謝謝妳下班後還要化時間來幫我，我想請妳喝杯咖啡可以嗎？就在附近那家路意莎咖啡館，不知道妳有空嗎？到此小嫻再次有點猶疑，畢竟我係一個陌生人，為求令佢放下疑慮，我主動提出:小嫻我了解，我是一個陌生人，妳有疑慮是對的，可否跟我上上面房間，我住312號房，不用担心，妳只要遠距離看見我用酒店卡開門就可以了，還有今天晚上我還在，會多住一天，不知道這樣安排可以嗎？能夠令妳放心是最重要的。小嫻諗咗一陣，就同意上房一看。