大結局（五）
洋人督察講完，雙手並無過多停留在阿媽肩膀上，雙手移開後，隨即繞過阿媽身體，一副準備離開既姿勢。
正當洋人準備離開士多房之際，阿媽突然間向著洋人背影講「等等！你⋯⋯你識得譚伯？」
洋人督察轉身向著阿媽微笑著講「No！由我地Police得知周小姐你同賣淫組織Boss發生左兩次Sex之後，周小姐你係户外既一舉一動都被我地Police監視，包括你既手機住宅既通話都係被我地Police 24小時監聽住！」
户外既一舉一動？咁大獲！但我居然一直察覺唔到有人跟蹤阿媽！到底當晚水錶房警方係如何監視，豈不是發現我既存在？
當阿媽聽見自己既日常生活一直被警方監視時，阿媽再次感到無比震撼！憤怒地反駁「痴線嫁你地！家下我犯左乜法！你地憑乜全天候監視我！」
洋人督察伸出雙手做出一個冷靜既手勢講解「周小姐！Please calm down! 你要明白我地咁做，係知道依個組織既Boss隨時會向你作出威脅，雖然你一直被Police監視，但換個角度其實你亦被Police 24小時暗中保護，如果你有乜意外，我地亦立即伸出援手！」
當阿媽聽見洋人督察依番偉大既說話時，情緒有點奇怪，冷笑著「伸出援手？呵！真係講得好聽，你地知唔知乜叫私隱嫁？普通話叫隱私！英文叫Privacy！算啦⋯⋯我淨係想知你點知道乳大掃頭⋯⋯依四隻字？」
洋人督察毫不猶豫地回應「因為周小姐你既手機！」
阿媽拿出手機後，望了兩眼，疑惑地反問「我手機？我手機有乜問題？」
洋人督察深深地呼吸一下，隨即解釋「周小姐，因為你既Mobile曾經被我地強行Hack 入安裝間諜程式！只要周小姐手機在身，我地不但可以透過GPS知道你實際position，亦可以通過手機鏡頭知道你身處既地方影像，如果鏡頭被遮蔽，我都能夠透過你手機收音裝置收取現場聲音。」
當洋人督察解釋整個監視過程時，May姐不時出現震撼既表情，難以置信既模樣，疑惑地問「所以⋯⋯當晚你地就利用我手機偷聽我講野？」
「YES！」洋人督察微笑著點頭
當聽見『Yes』肯定答案時，May姐無論表情動作都顯得相當疲倦，走回卡位裡坐下來，一副瘋瘋癲癲既模樣，傻笑地自言自語講「呵⋯⋯呵⋯⋯真係好野！阿Sir你真係老實喎！乜都講我知！」
而洋人督察見阿媽坐下來後，亦主動坐回卡位裡，坐在對面既坐椅上，臉上依然帶著微笑地回應「Of course！因為今次operation 我地真係好需要周小姐你既幫忙！我believe對周小姐坦白，先能夠顯示出我地既sincerity！」
雖然洋人督察說話時臉上掛著誠懇既表情，但阿媽已經無任何感覺，只是平淡地反問「Ok！咁火Sir知唔知我依件事？」
「No！陳火對周小姐被我地Police 監視，絕不知情！你可以放心！」洋人督察認真地回應
當阿媽聽見火Sir對自己既事並不知情後，心情有點放鬆，憂傷既情緒亦逐漸平伏起來，隨即端莊地坐起來，雙手抱胸，翹著二郎腿，恢復原有既老闆娘氣質，向洋人督察講「好！你講！你到底想我點做？具體講黎聽下！」
「Well！其實周小姐要做既任務非常簡單！只要你再次接近依個Boss，只要令佢講強迫你賣淫既說話！任務完成！This is it!」
「呵！你講就簡單！我連佢個樣係點都未知！點接近佢！」
「No！其實你有辦法的！我知道周小姐昨晚曾經去過龍華飯店見過飯店既老闆娘，亦都係依單案既其中一個女victim胡莉莉，Right？」
當聽見洋人督察將自己昨晚去過龍華飯店既事講出來時，May姐臉上再次浮現出驚訝表情，但一瞬間回復平靜，既然水錶房既事都知道，龍華飯店既事，亦瞞不過警方，但眼神疑惑地望著洋人督察反問「你既意思⋯⋯唔係想我⋯⋯我咩呱？」
洋人督察臉上再次掛著親切既笑容，令人感覺非常可靠信任，但蔚藍既眼睛中卻隱約帶著一種令人猜不透既神秘感覺。
洋人督察點著頭回應「Right！周小姐果然相當聰明！Very smart! 我believe你能夠把握好今次既機會！」
「痴線！Robinson先生！既然你知道我去過龍華，應該偷聽到胡莉莉所講過既說話，知道佢既要求！你唔會要求⋯⋯我⋯⋯」
洋人督察點著頭「周小姐！我可以向你promise只要你簽左免起訴保證書，你臥底期間所做既事，警方會視而不見，日後都唔會遭到法庭既起訴！」
「你！你⋯⋯講依番話唔覺得自己好卑鄙！好自私咩？家下你係推我去死喎！」
「No No！Police will back you up，周小姐如果你生命真係受到威脅，我地絕對會及時拯救你！你地有句說話，成大事者不拘小節！Right？周小姐，我希望周小姐你以大局為重！」
「呵！成大事？家下係你成大事定我成大事呀！Robinson先生！你未免睇得我太高啦，我雖然係開茶餐廳，但都係一個普通既師奶仔，女人一生既願望，非常簡單！守事業，守家庭，守婚姻，我唔需要望子成龍，只希望佢將來都同我一樣有一個幸福溫暖既家，得閒孝順下我就心滿意足，根本唔需要成就乜野大事！」
當阿媽感性地講出依番感人既說話時，洋人督察聽得非常入神，臉上同樣流露出感概既表情，不時點頭表示認同，當May姐講完後，洋人Mr. Robinson更眼泛淚光，點著頭回應「Well！周小姐你講既說話我非常Agree！既然你知道Family幸福係咁重要！你更加需要幫助Police，加入今次行動！如果周小姐你真係不幸地成為下一個victim，請問你個Family會點？如果你兒子知道媽媽係一個妓女，你叫你兒子將來點面對你！佢會俾朋友笑！俾同學笑！你兒子會嫌棄你！你丈夫都會拋棄你，係咪周小姐！所有美好既事都一夜之間摧毀，一個準備破壞你Family既Bastard，周小姐你真係忍心任佢破壞嗎？」
當阿媽專心聽著洋人督察義憤填膺地講出依番說話時，眼睛好像已經看到一幕即將夫離子散畫面，不斷搖著頭講「我當然唔會啦！我唔會俾任何人破壞我辛辛苦苦建立既事業家庭！」
於是洋人督察將警帽脫下，翻轉警帽從中拿出一叠白紙，打開後隨即變成兩張A4 Size大既白紙，隨即將筆放在May姐眼前，講「Good！既然周小姐你唔想失去辛苦建立既所有野，就必須接受今次既任務！只要你答應，無論家庭，事業，子女，都能夠靠自己一雙手守護下來！」
當我看到依一幕時，我唔清楚今次阿媽接受臥底任務既決定正確還是錯誤！不過正如依位洋人警司所形容，依位賣淫組織首腦控制依班女受害人既手法非常可怕！如果可以早日剷除，不但對May姐百利而無一害，更加為觀塘區既婦女免受傷害。
當阿媽拿起筆時，有種難以下手既感覺，遲遲未將名字簽上，洋人督察見狀，再次開聲「周小姐！你係咪有乜需要考慮？」
阿媽拿著筆顫抖地講「我⋯⋯我驚我完成唔到今次既任務⋯⋯」
洋人督察臉上再次掛起令人窩心既笑容，然後解說「周小姐！I think你應該唔知道點解今次Police咁大膽會委派你一個普通人做臥底！Right？」
May姐疑惑點著頭同意後，洋人督察繼續解釋「其實今次既臥底任務，係經過警隊最高決策人既同意，就係我地既處長一哥！我地大Boss了解過周小姐既資料，知道你出生於台灣，18歲來香港，你Father周世勳係一位退役軍人，原職位隸屬國民軍八區總司令，軍銜係一級上將，你祖宗三代清白，符合做臥底既條件，而且周小姐你身上流著爸爸軍人既血，絕對能夠勝任今次任務！」
當阿媽聽見洋人講述自己既身世資料時，臉上再次露出驚嘆既表情，平淡地回應「呵⋯⋯你地真係利害！」
「不過有件事我想唔明白，連處長搞唔明白，非常好奇！以周小姐你軍人世家既家庭背景，唔應該嫁來香港做D咁辛苦既工作！」洋人督察疑惑地問時，雙眼向著四周環境打量，臉上明顯出現一個嫌棄茶餐廳既表情。
於是May姐拿起鋼筆後，一邊簽署，一邊回應「我都唔明白！我記得我阿爸曾經聽過一位女高人，話我十八歲後必須離開台灣，否則會為家族就帶來災難，而且阿爸聽足女高人既指示，叫我去南澳以南、汕尾以南、沙堤以南、北部灣以南，當時睇地圖根本唔清楚位置，於是我來左香港。」講完，隨即將文件送回洋人督察。
雖然小時候我曾經聽過阿媽講過公公係軍人，但從來無提及職位，一級上將！到底職位有幾高呢？利唔利害呢？
