天氣熱熱地，又等小弟分享搞笑野下。
話說小弟去左打針，大家都知啦，打肩膀位，我唔知其他人係點，但我估我個經歷同其他人有少少唔同。
去到現場，當我坐低，如常的講個人資料後，果位姑娘就在準備中。嗱，睇之前我必須講，我唔大隻，而因為我亦好奇，我會習慣睇住姑娘同我打針時既情況，我知多數人都會擰轉面唔望，但我呢，就好鐘意望。我好想知，點解枝針咁長，可以插晒入去架，HAHA......
當時情況:
姑娘: 放鬆D。
我: 好。
姑娘: 唔..... ( 此時我望住佢插我肩對落的手臂位，半秒後再抽起，姑娘眼神有少少......緊張。 )
我: 咦? ( 佢未注射喎，咁快抽起?? )
姑娘: 好硬，放鬆下~~
我: 哦。
姑娘: 唔? ( 佢又再插.......點知又再抽起。佢在旁的男同事望住，我都望住，但好快佢又講...... )
姑娘: 放鬆D喎。 ( 此時我在想，其實佢係唔係叫自己放鬆呢?? )
我: 我...... 都好放架啦喎。 ( 我一講完。 )
姑娘: 係嘞。 ( 姑娘再插........ 即我想講既係，姑娘插左我3次.......... 而今次佢終於注射入去。我忍唔住問..... )
我: 姑娘妳係唔係好少做，今日第一次啊?
姑娘: 吓? ( 我睇得出佢好投入好緊張，聽唔清楚我講咩，但我都無再問。 )
我: 都係無野喇..........
最記得姑娘有問我，第一次打時有無唔舒服，我講可能我之後有舉啞鈴，我打左針既肩臂位有D痛，佢既答覆係: 咁你預左今次都會一樣痛都得嘞，到時記得用毛巾包冰整住針位就會舒服好多架啦。
我事後諗番，今次應該唔舉鐵都痛啦...
