第13話啦，冇貨賣啦～
Gina XIII
「阿星你可唔可以幫下我呀？」Gina兜口兜面就係咁問，而且有啲想喊咁款。「有咩事慢慢講，深呼吸先…………慢慢放鬆………係喇………啱喇………再深呼吸多一次………每次呼氣………代表你嘅煩惱被你呼出一分………而每次吸氣……～就會令你吸入更多嘅新希望…………非常之好…………」電話嘅另一面，傳嚟Gina焦慮嘅聲音，阿星唯有隔住電話同佢做簡單催眠，等佢情緒穩定咗先。查實阿星係催眠唔到人嘅，阿星嘅能力，係透過語言技法幫助對方自己催眠自己。咩話？唔係啩？阿星你唔係話識得催眠嘅咩？你俾阿星講埋先啦，大夫…………催眠嘅首要條件，係對方對你嘅信任，同埋佢明白你會幫助佢進入催眠狀態；更重要嘅係，你嘅聲音，會全程伴隨佢去走呢個催眠嘅旅程。著名精神病醫生兼艾力克遜派催眠療法嘅始創者艾力克遜醫生（Milton H. Erickson M.D.）寫過一本書叫做My voice will go with you（催眠之聲伴隨你），裡面詳細描述催眠治療師點樣用聲音由語言技法幫助受者進入恍惚狀態，治療師嘅聲音就係受者嘅導航，因為受者進入恍惚狀態之後需要治療師嘅帶領，所有治療師嘅話語將會決定受者療程嘅成功程度。
講咗咁耐除咗想講俾大家知，其實唔係催眠師催眠受者，而係受者自己催眠自己；催眠師嘅責任，除咗帶領受者完成整個旅程之外，亦都有責任喺受者出現情況（例如偏離旅程方向之類）嘅時候伸出援手，幫助受者重新進入旅程嘅方向，完成旅程。喺冇辦法親自會見受者嘅時候，阿星先會用單單靠聲音去做催眠治療，你睇唔到受者嘅情況，又點知道點樣落藥呢？Gina嘅聲音慢慢平伏落嚟，阿星能夠了解初步能夠逹到控制情緒嘅效果，但係隔住電話嚟做始終都只係應急辦法，對於整個治療過程其實完全冇幫助………well應該都有少少嘅，起碼呢一刻佢嘅情緒穩定咗。
Miss Tang對於阿星嘅催眠都已經領教唔少，知道阿星做緊乜，但係受過催眠嘅人再次聽到同一個催眠師嘅話語係好容易再次進入恍惚狀態嘅，所以Miss Tang不停搖頭同捉住阿星隻手，阿星要同時照顧兩個進入恍惚狀態嘅人，其中一個仲要揸緊車，呢鋪玩得大，而且如果Miss Tang一合埋眼嘅話分分鐘炒車都有份。咁阿星點做好呢？照顧打電話嚟，但係情緒波動，啱啱因為阿星電話催眠而開始進入恍惚狀態嘅Gina好；定係停止催眠，照顧因為阿星催眠Gina而貪心“lam”埋阿星啲催眠汁而開始進入恍惚狀態Miss Tang好呢？
（待續）😬
[ 本帖最後由 star_platina 於 2021-8-9 07:05 編輯 ]
