星期四嘅早上，Michelle嘅凌厲眼神，令人望到打冷震。米雪第22話～

米雪 22

Michelle一路望住阿星唔出聲，阿星就開始用唔湯唔水嘅聲線唱阿學友嘅歌。「你可唔可以唔好再唱呀！」好明顯，Michelle唔識得欣賞阿星美妙嘅歌聲。

阿星望住佢，再冇唱歌唱出聲，只係輕輕咁哼出音樂，Michelle見阿星唔唱唔唱仍然喺度唱，再次展現出佢凌厲嘅眼神，用沉默嚟對待阿星。去到餐廳，有過上次嘅經驗，阿星知道俾個surprise佢好過問佢想食乜。查實佢想食乜並唔係阿星所要考慮嘅，反而係揾間餐廳食餐好嘅然後睇埋份報價。Cassy喺度嘅話就好容易揾到食好西嘅地方，兩個人去撑枱腳，佢飛咗，阿星就要食自己喇，你話係咪揾個好地方食好西緊要呢？

車住Michelle兩個人一粒聲都冇，連眼神接觸都唔搞，阿星承認，阿Michelle嘅眼神係非常之凌厲嘅，俾佢望住，不期然有感覺想將個頭放喺地上面，任由佢用着住黑絲黑裙嘅長腿（查實Michelle唔多高，矮過Cassy，不過雙腳纖幼，睇落係幾長嘅）踩住阿星個頭嚟糟質……………唏，乜你哋成日偷睇阿星嘅內心世界嘅？

阿星唔望佢，並唔代表佢唔望阿星，揸車揸咗一段時間，Michelle終於忍唔住開口：「你車我去邊度？」食飯啦嘛，唔通車你去賣咩？就到啦。今次阿星叻叻啦，車咗佢去首都區另一面嘅一楝大型商業中心樓下嘅商場度，有酒飲㗎呢度，唔會捉㗎。

正所謂：

高傲乘客默無言
英雄亨歌她反對
無奈只發曲音調
凌厲雙眸迎面來
結果車廂轉沉靜
還是要問落腳點

金翅食好西鳥
（待續）😬

[ 本帖最後由 star_platina 於 2021-12-2 11:06 編輯 ]

早晨,星爺,食好西肯定重要啦,但食完好西你今晚可能要奶....😛

早晨  星爺，寫好了   又來鳥  ........   金翅要食好西鳥！     

高傲乘客默無言
英雄亨歌她反對
無奈只發曲音調
凌厲雙眸迎面來
結果車廂轉沉靜
還是要問落腳點

唔巧啦，唔係個個都想奶囉😬

金翅食好西，食完就一路向西鳥😬

Michelle 應該喜歡左星師兄，但師兄唔太受落🤣

人地個心都唔喺阿星度，況且阿星同Cassy都好唔得閒😬

星期五，又係米雪出動嘅時候，米雪第23話～

米雪 23

點解要嚟呢度食呢？呵，阿星雖然都唔係十分揀擇嘅人，但都對首都區附近嘅食肆有啲認識嘅，要揾間有酒飲又有麵包布甸食嘅，又難唔到阿星嘅。咩？阿Michelle中意食麵包布甸吖嘛，阿星記得喎，一陣咪你一啖阿星一啖囉，阿星都唔食甜品嘅，食少少好啦。

飲兩杯先食飯係阿星嘅習慣，點番上次Michelle飲嘅甜餐前雞尾酒，阿星留意到佢聽到阿星幫佢點番同一樣嘅雞尾酒嘅時候眼神流露出滿意嘅光采，咩呢，加分俾阿星？等阿星要你扣阿星分先得。

喺阿星同Michelle兩個等緊食飯嘅時候，阿星就即刻同佢乾下杯，等佢同阿星飲下酒鬆弛下先，喺阿星搞搞震搞到Michelle飲第二杯嘅時候，啲頭盤，亦即係啲炸雞炸魷魚炸洋蔥炸乜炸物拼盤到嘅時候，阿星一路同佢食住炸嘢一路飲酒，睇佢唔出，都幾飲得喎。之但係阿星都有個酒筲箕嘅外號，雖然飲完會好似冇乜飲過咁，但係塊面係會青嘅，即係越飲越面青口唇白果款呢。

阿星同佢一路食啲開胃小食，一路飲酒同佢有傾有講，唔經唔覺已經飲到第四杯，阿星倒咗三杯半紅酒，而Michelle都已經飲咗三杯佢最喜歡嘅雞尾酒，露出咗…………少少醉意，仲講嘢鬼咁大聲添。阿星見佢醉醉地，就勸佢停止飲酒，同佢講不如送佢返去休息下先，聽日先講解份報價阿星知啦。但係你永遠唔知道，永遠唔會明白，永遠唔能夠預料一個有心事嘅人飲咗兩杯之後會係點樣嘅反應。

正所謂：

落腳地點受質疑
暗藏計劃投所好
餐前雞尾來鬆弛
酒過三杯露醉意
建議改日談公務
極難猜透君心事

金翅睇唔透鳥
（待續）😬

[ 本帖最後由 star_platina 於 2021-12-3 13:25 編輯 ]

早晨  星爺，寫好了   又來鳥  ........  金翅睇唔透鳥！  

落腳地點受質疑
暗藏計劃投所好
餐前雞尾來鬆弛
酒過三杯露醉意
建議改日談公務
極難猜透君心事

早晨,星爺,估唔到,又要等你下星期先開估😛