又係星期四，米雪第32話～
米雪 32
尋晚發生咗嘅嘢，阿星真係唔想再想起，亦都唔想再提起，更加唔想令到小星星企起。尋晚，阿星幫阿Michelle冚好被，摸下佢塊面珠仔之後就靜雞雞鼠咗喇。咩？你話阿星有食唔食咁罪大惡極？都～～～～～～話阿星唔係咩狗屎垃圾都放入口，雖然人地有幾分姿色，而且都好似表達願意繼續下場，之但係阿星所睇到嘅就並唔係果回事。阿星睇到嘅，係一個唔開心有心結嘅人所表露出嚟嘅不安，孤獨，同埋渴望。
對於阿星嚟講，呢趟榴槤之國嘅工幹識到Cassy，實在已經令到阿星喜出望外，冇預料過，冇計算過，亦都冇諗過。阿星唔想亦都唔希望呢段得來不易嘅感情受到破壞，如果係阿星一手破壞嘅話，就真係罪大惡極喇。阿星心入面諗住嘅，係Cassy，不過阿星都好老實同你講，當時小星星簡直係千願意萬願意，如果阿星當時條褲俾人除咗嘅話，小星星應該會進入自動導航模式，三爬兩撥就應該順利入咗一個無底嘅深淵。
今朝阿星收到某君嘅短訊，問阿星尋晚究竟發生咗咩事。你…………唔係斷片下話？阿星唯有發揮奧斯卡最佳男主角嘅天份，陪你呢個最佳女主角演落去。「我聽日先飛返去呀，你今晚陪我啦。」咩？阿星唔係好明，你講多次？「一陣你同我食晏，然後我喺你公司樓下行商場，等埋你食晚飯啦，就咁！」喂？
正所謂：
把握時機抽身退
能擁嘉倩乃福至
不欲節外又生枝
奈何信息再復來
追問昨晚生何事
再約會面共進餐
金翅山雨欲來鳥
（待續）😬
[ 本帖最後由 star_platina 於 2021-12-16 10:00 編輯 ]
