依家先知Amy住喺美孚，咁色慾男住長沙灣，順理成章一對拖友同路，我住旺角同車做埋電燈膽，至於秋仔就住牛頭角，完全唔同路，咁就各行各路喺啦，我首先開聲話：搭巴士定搭的？搭巴士我地兩個做護花使者三個一齊，秋仔你自己行，話口未完Amy另作主張話：邊個話同你兩個一齊呀？我要秋仔送我返屋企。此話一出色慾男面色為之大變，佢扯火話：依家三更半夜我唔送邊個送，幾時輪到佢送妳返屋企呀！到底妳當唔當我係妳男朋友？嘩！未聽過色慾男講過咁多句嘢，呢次睇嚟動真格，死人秋仔扮晒叉燒假惺惺話：相嗌唔好口呀，你地冷靜的啦，你地先係一啤，我送唔洽當嘅，我同林仔得㗎喇。秋仔呢招以退為進果然有效，Amy不留情面話：駛鬼佢送呀，食自己啦！冇得傾我一定要秋仔送，秋仔你夠膽唔送嘅話以後就冇friend做。情況陷入羌局，此刻色慾男怒火中燒，頭頂出煙咁滯，勢估唔到臨尾劇情仲精彩。

面對此情此景三男一女仲慘過嬲字，我趁機抽水話：一人少句啦，不如咁啦，等我送Amy返屋企嘞，咁咪唔駛坳囉。Amy即時回應話：收嗲啦！幾時輪到你呀，秋仔係我唯一選擇。俾Amy寸完非常冇癮唯有作壁上觀，佢講完就撟埋雙手不作任何妥協，色慾男信心盡失，喺冇得選擇之下唯有自動退出，最後怒目啤咗秋仔一眼之後倖倖然離去，似乎呢場Amy爭奪戰初步已經有咗眉目，我從未得到過所以都冇乜嘢，最慘係色慾男，本來諗住帶女朋友去旅行happy，結果大意失荊州，連女朋友都俾人搶埋，搞到最後一日失戀收場，真係悲痛萬分，塵埃落定之後我問：搭咩車咁呀？秋仔掩不住勝利笑容話：送尊貴嘅Amy返屋企，梗要坐的士啦。咁風騷？我乘機潤佢話：你條孤寒鐸捨得咩？幾舊水喎！仲有你唔係話冇晒錢咩？秋仔略顯尷尬反駁話：你講咩呀？都唔知你講乜。時間已經去到兩點幾，Amy打晒喊路話：好鬼眼瞓呀，你地仲坳乜嘢呀！快啲行啦！

橫掂順路我問：喂車埋我得唔得呀？秋仔話：無所謂，我地美孚落先，然後你再直落旺角，的士錢你俾埋，多謝曬。唔係卦，咁咪幫人作嫁衣裳，我再問：唔係美孚放低Amy我地繼續上路咩？秋仔回應話：你儍㗎！三更半夜由得Amy自己一個喺條街度行，你唔擔心我都擔心啦，我話咗我係佢嘅守護天使，要保證佢安全，送到佢返到屋企門口我先至放心，秋仔呢啲一聽就知係冧女手法，Amy聽完都有啲gurgur地，畢竟你搶走咗色慾男個位，唔做足功夫好難講得通嘅，不過你精我都唔呆，一於各行各路算喇，秋仔繼續做觀音兵，全程幫Amy攞行李未鬆過手，Amy睇個樣攰到抽筋，完全冇晒聲氣跟咗喺秋仔後面，我就唯有一條冷等巴士啦，好奇怪一件事，色慾男退出之後人影都唔見，的士同巴士站全不見蹤影，唔通去咗殉情？冇咁易，係都攬埋秋仔一齊啦。

天大喜訊！若然色慾男女分手成真，咁我咪唔駛俾Amy屈？成為明日黃花，冇咗索人地條女油之嫌，最緊要係慳番三皮幾嘢，都咪話唔頂癮，此刻心情靚到絕，原本眼瞓嘅我當堂成個醒晒，通宵巴等極都唔到，把心一橫，撗掂慳番咁多，咁駛多幾舊水搭的又有乜所謂呢？仲要食埋宵夜先至番屋企，身上冇水問的哥可唔可以落車再去撳機俾錢，司機初初詐晒型，後尾我話俾多五條當堂即刻開車，心情靚到爆沿途忍唔住吹起口哨，的哥八卦問：阿哥仔你好風騷喎，梗係嬴錢嚟呢。我答話：有人拗手瓜我買外圍，咁就贏咗三皮幾嘢，easy money!的哥再問：邊度咁發達呀呀哥，介紹我贏番啲好喎 。我求祁噏話：係啲私人賭局嚟嘅，本來輸緊，臨尾對家後勁不繼腳軟收場，咁我就翻本有突，上落好大㗎，唔係個個玩得起嘅。的哥聽完好似覺得我睇唔起佢咁，之後一路都冇出聲。

的士大哥似乎信我唔過，特登停喺一間銀行門口等我撳機，我回應話：喂阿哥唔駛咁驚喎，揸住咁大件行李走得去邊吖。司機大佬話：體諒下啦，家陣搵食艱難，好容易血本無歸㗎。於是落車撳機根住俾錢，原本話五條，無所謂嘞俾夠一舊，的哥連聲多謝再遞埋咭片，話搭的隨時call佢，尤其是去機場，好快番到屋企，嘩！一個星期唔到啫，彷如隔世咁陌生嘅，放低行李有啲餓餓地，不如落街整個宵夜先啦，搵咗間粥麵舖，叫咗碗及第再加炸兩，食番香港地啲嘢真係好好味，就算炸兩入面嗰條係隔夜油炸鬼，都唔覺有問題，食食下打番個電話俾秋仔，睇下佢乜嘢環境都好，點知打極都唔通，不明所以於是轉打俾Amy問下，Amy睡眼惺忪劈頭一句話：你有冇搞L錯呀扑街，幾多點呀仲打電話俾人，唔L駛瞓呀？我say sorry 話：對唔住呀！啱啱打俾秋仔唔通，所以試下搵妳囉。Amy話：佢送完我番屋企咪散囉，你唔識得聼日先搵人㗎，痴L線！我未回話佢已經cut我線。

抵俾人吊啦，嘈醒攰到趴街嘅Amy，秋仔又搵唔到，唯有聽日再搵過啦，頂你已經成四點鐘，好彩後日先返工，理得佢瞓到自然醒先再算，都唔知過咗幾耐，俾手機持續響聲嘈醒咗，一睇係Amy姐打嚟，有乜筍嘢呢喂，Amy話：有冇聯絡到秋仔呀？條死仔好似失咗踪咁，我仲約咗佢下午上我公司面試添㗎，正一冇尾飛鉈，點算好？原來搵秋仔唔係搵我，算啦幫下佢啦，我話：我琴晚一路都搵佢唔到，我試下再call佢，如果再唔通就上門摷佢，我知佢住喺邊，妳要唔要一齊呀？依家成十二點，不如食個飯先呢，我去美孚接妳呀？Amy諗咗一陣話：都好橫掂未食飯，你上嚟美孚同你食吖，不過要你請㗎，制唔制先？哈好嘢，又約到佢去街，我答：請妳食飯應份嘅，食乜都得，唔駛同我慳。Amy再話：唔同你講咁多，約實你一點正百老匯街見。嘩冇乜時間咁滯，嗱嗱聲洗個面換個衫即刻出門口，費事返香港第一日約佢就遲到。

落街見到架6號 c 埋站，好彩趕得切上車，咁就唔駛遲到啦，上車唔夠瞓好快又瞓着咗，到咗美孚都唔知，好彩係總站又得一個阿嬋好人叫醒我，否則原車返歸就pk喇，仲有十分鐘搵埋百老匯街，未見Amy蹤影，咁等下𥄫下女先啦，大概十分鐘到，離遠望見有條OL，個樣寸寸地帶住微笑施施然行緊過嚟，一睇原來係Amy，講聲Hi之後我話：嘩Amy姐，成個look唔同晒喎，set晒頭化晒粧，仲着埋成套Suit，行政look成個女強人咁款，點夠妳玩呀。Amy答話：唔係咁着點着呀，我假假地都係一個Teamleader，冇得求其嘅，點呀同旅行有咩唔同咁呀？我刻意望一眼話：有咩唔同？就係旅行嗰陣多多性感少少正經，依家呢少少性感多多正經。Amy話：你呢種形容都幾特別，你鍾意邊樣呀？我答話：我兩樣都鍾意，其實妳着咩我都鍾意，妳唔着我仲鍾意呀！Amy發嬌嗔話：死啦你去！一見面就冇釐正經，打柒你吖嗱，廢話少講，我好肚餓呀，快啲去食嘢先啦！

我問Amy想食啲乜嘢，佢話：我想食日本嘢，就附近嗰間友記居酒屋喇，已經開咗門。間嘢環境不俗而價錢屬中上少少，無所謂啦一餐半餐，我扮大方話：即本叫唔駛同我慳，由你發版，結果Amy叫咗一客鰻魚丼加海膽，一客刺身併盆外加一客燒雞翼同我share，我自己就平平地揀咗客炸雞定食，Amy意猶未盡問我要唔要飲番杯，我未開聲佢已經叫咗支清酒，一輪狂風掃落葉，啲魚生確實好正，好快成支清酒隊曬，我已經醉醉地，Amy話未夠喉再加多兩pat生啤，捨命陪君子之下我勉強隊埋支生啤，已經想嘔咁滯，Amy卻是面不改容最後仲加碼嗌咗客抹茶雪糕做飯後甜品，大吃大喝之下成餐飯駛咗我成七舊幾水，果然唔同我慳搞到我肉都赤埋，最終阿姐都向我講咗句多謝，仲話呢餐食得佢好開心，阿姐午餐咋食成七舊幾，妳就開心得過囉，冇法啦，鬼叫自己衰多口懶豪氣咩。

正呀😀

飲飽食醉埋埋單，個人又暈陀陀跟住點呢？我問Amy:秋仔住牛頭角上邨，不如我地搭地鐵咯，好快就到。Amy反對話：搭地鐵？行上行落又轉車又冇得坐，加埋超過成粒鐘，依家成兩點幾，我仲駛返工嘅，搭的啦。Amy唔理我拉著我手就上咗部的士，跟住就話：架車行呈祥道轉龍翔道，喳一聲就到，唔會好多錢。言下之意即係又係我科水，唉！足襟見肘，車上面我問：點解妳晏畫都飲酒嘅，唔係留番夜晚先隊咩？Amy話：儍嘅，飲酒有分日夜嘅咩，鍾意飲就飲啦，我老豆都係每日中午飲一小杯拔蘭地或者威士忌，十年如一日，反而夜晚就唔飲。唔怪知得啦，原來遺傳嘅，Amy跟住又話：喂你坐咁埋做咩？同你有親呀！我不以為然話：唔係嘛，台灣都係咁啦，冇乜嘢係嘛。Amy反駁話：台灣還台灣，呢度係香港呀呀哥，你又唔係我條仔，想搏懵呀？見唔見到呀，的士大哥喺度笑緊你呀。此刻場面十分尷尬，我俾Amy寸到一棟都冇。