引用:
原帖由 一夜狂歡 於 2022-7-2 11:55 發表
飲飽食醉埋埋單,個人又暈陀陀跟住點呢?我問Amy:秋仔住牛頭角上邨,不如我地搭地鐵咯,好快就到。Amy反對話:搭地鐵?行上行落又轉車又冇得坐,加埋超過成粒鐘,依家成兩點幾,我仲駛返工嘅,搭的啦。Amy唔理我拉著我手就上咗部的士,跟住 ...
有冇搞錯只不過坐貼少少啫,駛咪咁大反應呀,扮純情呀?我有啲唔忿喺佢耳邊話:坐貼嗰少少唔代表搏妳懵係嘛,我唔係咁黑妳憎係嘛,俾啲面好喎,至少我都請咗妳食餐勁吖。Amy一本正經話:對唔住,請食餐飯唔代表啲乜嘢,我開到聲大把人想請我,幾豐富都有。頂你呢餐飯等於打咗水漂,早知唔鬼好約妳,費事激氣,好快架車去到牛頭角,果然慳咗一半時間,但車費就成舊幾水有多,條女撟埋雙手冇反應,咁即係老馮又係我俾,心諗呢啲女識唔過,又水性將你搾乾搾淨之後飛埋你唔出奇,谷鬼氣之下我唔出聲,衰女包見我唔啋佢開始放軟身段,佢話:好嘞,唔好咁小器啦,係我語氣重咗啲,對唔住囉。跟住撟番我手同我一齊行,唉!我真係冇用,俾Amy冧一冧所有怒氣全部消散晒,咁樣溝女實俾啲女玩死。