咁謙呀！😬

講事實啦嘛😬

今晚放多段好冇呢？😬

梗係好！😬

夜晚流流，出多段先。星星同學會第15話～


那些年，星星同學會 第15話

星期六早塲？大佬，阿星逢星期五返工做到十一點，返到屋企都成點鐘囉喎，叫阿星十點睇戲？唔好啩。點推好？後來阿星先知道，張戲飛佢特登買早塲，因為屋企唔俾佢去夜街，夜嘅意思，係八點過後就算夜。其實佢地嘅生活同香港差唔多，不過冇乜夜塲，下下要出到唐人街就唔方便啦，阿星又冇車。講返張戲飛，阿星真係好唔想去，但人地買咗，阿星又唔識講（最慘呢樣），唯有星期五晚返家即上床訓，希望起到身。

查實阿星有舖渴睡癮，一訓就天昏地暗。星期六當然唔知醒，起身都已經十點半！阿星即刻彈起着衫洗面，一路大叫阿哥起身，嘈到家姐發老脾，因為大家都返餐館，平時十點係冇人起身嘅。阿哥着返件衫開車送阿星出去戲院，佢問阿星做咩急成咁，阿星話約咗朋友遲到。咁點解唔打俾佢？第一阿星冇佢電話，第二佢冇手機，點打？半個鐘頭後阿星已經到咗戲院門口，阿哥揸車掉頭返家大覺訓。

見到Emma企咗響門口左望右望，即刻跑埋去，又sorry又躹躬咁，躹到佢笑咗出嚟。佢問阿星點解遲到，阿星即刻話overslept囉，問咗阿哥，佢話咁講嘛。Emma有啲嬲嬲地，問阿星點解唔早啲訓，阿星即刻話part time嘛，I worked last night. 佢望下阿星，伸手撥下阿星啲頭髮，話你頭都未梳好就出門，見你咁急就算啦。原來Emma都摸到阿星頭頂喎，佢都算幾高，瘦啲，斯斯文文，短髮，金金地。阿星冇乜留意佢着咩，喂大佬呀，唔係個個男人咁細心㗎，阿星咪其中一個粗心的人，到今時今日都俾人話。

待續😬

又好😬

咁仲有冇入埸？

話咗睇戲嘛😬

咁又係，唔入去點摷嘢！😉

咁快就摷，俾人鬧😬

夜媽媽，黑媽媽，戲院入面又係黑媽媽，出一段先。星星同學會第16話～


那些年，星星同學會 第16話

Emma問阿星仲睇唔睇戲，阿星望下錶，成十一點半套戲都就完，仲睇乜鬼。佢話佢好想睇呢套戲，就嚟落，冇得睇要等租帶先有。當時仲睇錄影帶，非常落後。俠義之心人人都有，尋晚出咗糧，有四十鎊喺袋，就話不如阿星同你睇兩點鐘啦。佢話佢唔夠錢喇，全身得六鎊，買咗飛就冇哂錢。阿星即時懶醒咁喺銀包度攞咗張廿鎊出嚟，話等阿星去買。佢眼都突咗，乜你咁有錢？part time嘛，阿星傻笑。

買咗飛，都有啲時間，街度冇咩行，戲院附近得間圖書館，咪行去圖書館囉，Emma好靜好少講嘢嘅，阿星又唔識咁多英文，全程十幾分鐘都冇乜講嘢。天氣唔算熱，英國夏天上下午温差都幾大，上午廿六七，夜晚就十六七。着住件牛仔褸又熱，唔着入面短袖衫又凍，着又唔係唔着又唔係。Emma原來着短袖，仲着短裙。印象中佢喺學校係着長褲，冇見過佢着裙。好簡單嘅衣著，瘦瘦嘅佢我諗應該都有五呎五六啩，腳長囉，不過腳掌偏大，可能都有42號。喺圖書館冇咩好講，啲書咁多英文字，佢識阿星但係阿星唔識佢。反而Emma好有心機喺度揾書，啲咩莎士脾喇，咩騷格勒底，唔深果啲唔揾。最慘係咩？係佢叫阿星陪佢一齊睇嘛，阿星英文字母廿六個都識，拼埋之後就好有限喇。

平時啲英文都唔識哂，叫阿星讀詩集喎，不如叫阿星去死啦。但係阿星又唔行得開，個肚又餓，又眼訓，Emma拉住阿星同佢一齊坐低睇文集，唯有坐低睇。睇睇下都唔知做乜，就有人推推阿星，細細聲講wake up! We need to go! 哈！原來阿星悶得滯，加上又眼瞓，瞓咗响Emma個膊頭度！Emma紅都面哂，叫阿星起身出去，望下錶，原來已經十二點九！圖書館星期六收一點，阿星竟然訓到人地收工，仲要訓咗喺個女仔膊頭度流哂口水！

待續😬