引用:
原帖由 dragonbone 於 10/11/2022 12:17 發表 
其實個客想買，要成事已不難，但一個好既sales，係會令客人成為回頭客，多D資訊，多D技巧教下，我要再買都搵佢啦。
一來我係皮膚易敏感之人，我唔會隨便買香水，真係要夾，買啱已唔輕易轉。
二來，呢隻brand原來幾多唔同既味，玩配搭我覺 ...
曾幾何時，阿星同朋友兩個麻甩行入銅鑼灣某百貨公司地庫度啲香水櫃位，兩個麻甩左望右望，睇呢樣睇果樣，然後行到去親奴嘅櫃檯睇，睇睇下，有個美麗動人嘅香水售貨員小姐，行埋嚟問阿星地要買嚟自用定係買俾女士，阿星同友人兩個對住美麗動人年輕貌美嘅香水售貨員小姐笑笑，不置可否，繼續兩頭望四圍蕩。
好一個美麗動人年輕貌美活力充沛嘅香水售貨員小姐，並唔會咁容易放棄任何一個做生意嘅機會。正如龍師兄所講，就算你今次唔買，都要令到你心郁郁下次嚟買，又或者係介紹人嚟買，更甚者下次帶埋朋友嚟自己買又叫人買。你話如果今次阿星同友人兩個一人買一樽香水，下次又各自帶埋朋友嚟一人又買多一樽，淨係阿星同朋友加阿星朋友同友人朋友4個麻甩，就已經買咗6樽香水，以依家1樽香水中位價大概8舊水嚟計，4個麻甩就已經為呢位美麗動人年輕貌美活力充沛口齒伶俐嘅香水售貨員小姐增加多咗$4800蚊嘅生意額，一個唔好彩阿星同友人大手筆，一人買兩樽香水，下次每人又帶兩個朋友嚟，每人又買兩樽香水，呢條數真係襟計。
就喺呢位美麗動人年輕貌美活力充沛口齒伶俐温柔斯文嘅香水售貨員小姐抽出咗一條白色紙條正準備用佢手上面嘅香水噴落去俾阿星地聞之際，阿星笑住伸出手向住美麗動人年輕貌美活力充沛口齒伶俐温柔斯文㗳得杯落嘅香水售貨員小姐示意，佢用一雙大眼望住阿星，然後笑瞇瞇咁話：「先生，唔會噴手㗎啦，噴落試紙度你慢慢聞吖。」
喺美麗動人年輕貌美活力充沛口齒伶俐温柔斯文㗳得杯落笑容燦爛嘅香水售貨員小姐面上嘅笑容仍然燦爛嘅時候，阿星同友人兩個做出咗一個動作，即時令到呢位水蛇春咁長花朶小姐完全唔知點算。
阿星同友人做咗啲乜？咪就係趁水蛇春咁長小姐笑容仍然燦爛嘅時候齊齊張開兩個麻甩口，然後指住自己個麻甩口話：噴呢度吖唔該。
水蛇春咁長小姐揸住樽香水，望下阿星地兩個麻甩，又望下樽香水，正想開聲嘅時候，阿星即刻催佢：快啲噴，張開口等你等到佢咀痛！快快快！
水蛇春小姐仍然有啲猶豫，究竟係噴定係唔噴好？阿星嘅友人終於忍唔住笑咗出嚟，搭住阿星膊頭笑到上氣唔接下氣。阿星笑住拍拍水蛇春小姐揸住香水樽嘅手，同佢講：玩下啫，放鬆啲。
水蛇春咁長小姐慢慢由愕然，僵硬嘅笑容慢慢再放鬆，忍唔住笑，但係有啲尷尬。
當一個人喺臨急臨忙嘅時候俾人催嘅話，就會變得好猶豫，好難落決定，呢個時候你再催多兩下，就會有意料之中嘅事出現。阿星同友人去飲咖啡講開呢個話題，友人唔信，所以阿星就同友人講，你跟住阿星做，包你有戲睇。😬
[
本帖最後由 star_platina 於 2022-11-10 18:44 編輯 ]
