梗係好啦！😬

食波餅嘅阿星，同請阿星食波餅嘅Grace，繼續入直路～

那些年，星星同學會 第30話

唉，得兩個人有咩嘢講？成程車佢係咁問長問短，每次阿星一提起Joyce，佢就轉話題。飲茶其實冇咩講，都係果啲嘢，Grace好似慌死阿星餓，叫鬼死咁多點心，又係咁質阿星食，筴完一件點心又筴另一件點心俾阿星，一路望住阿星食，自己就食好少，都唔知係咪覺得阿星太瘦想幫阿星增肥。飲完茶，冇嘢做，阿星就話去打機喇，佢冇意見。呢期興打拳皇九五，阿星用最後大佬努加 (Rugal) 已經用到爐火純青。機舖入面已經冇人打得贏阿努加星，就算其他人都用同一樣嘅角色，都贏唔到。Grace坐喺度陪阿星打機，有人嚟挑機佢就起身，打一陣挑戰者走咗，佢又坐低。佢起身次數越嚟越多，最後企喺阿星後面睇阿星表演。打咗好耐，換咗好多對手都未輸過，阿星～諗下諗下，又唔係幾好意思叫人企响度等你，就扮輸自殺，同啲垃圾挑戰者傾咗幾句，話你好勁呀，今日估唔到輸俾你。

人就係咁，當你好出名，個個慕名而來挑戰，竟然打贏咗你，就以為自己已經同你同一境界。唉，阿星話哂係倫敦地區賽第二名，咁易輸嘅咩？傻嘅。不過都有度好，就係阿星交遊廣闊，好多人俾阿星氹到好開心，亦都慢慢進步到同阿星差唔多嘅境界，周不時有免費機打。呢班機友陪住阿星過咗好多日子。

講返Grace，阿星起身同佢道歉，話要佢等咁耐。點知佢竟然話：「你好衰啫，特登輸俾人。」 咦？已經做到冇人睇到囉喎，對手都唔知，諗住佢技術勝阿星一籌，險勝咪好囉，你又會知嘅？「你點知阿星讓賽？」Grace話：「你頭先好多個位都唔應該中，但係你特登中招，啲mistake唔似mistake囉，假到死！」乜你咁好眼？

待續😬

又好，出多段😬

佢又咁醒？佢打機好叻？

有打下咁囉，佢阿哥乜鬼遊戲機都有，樣樣都玩嘅，佢都有玩下貪得意😬

咁佢都好有天份，咁都睇得出！

查實第一個唔放水抽贏佢嘅人就係阿星😬

蠃咗有冇著數？

某，仲俾啲朋友厲住，私下話阿星做乜唔憐香惜玉😬

可能因為咁先對你另眼相看呢！😬