臨瞓又寫多段先~
Shanie 7
呢餐飯真係食到阿星周身唔聚財,先由結論講起,阿星係安全返到屋企,並冇俾任何人嚟到污辱嘅。典解會咁講呢?查實成件事係咁嘅。
話說阿星喺Shanie 用手指喺阿星大脾上面打圈打咗幾下之後,就乘機坐開少少,然後起身去厠所小解下清醒下。呢啲情景都真係好常出現,阿星話飲咗兩杯之後急尿呢個情況呀,你哋諗咗去邊?
人有三急就當然要去小解啦,阿星又當然唔會例外,都叫做係一個叔叔,急尿呢家嘢真係幾咁平常。阿星洗完手,喺鏡入面望下呢個四十有幾嘅四眼仔叔叔,好老實講,都真係唔覺有啲咩咁特別,除咗比平常男性高少少,橫少少,肚腩有少少之外,阿星都只係叔叔一個,有啲咩咁特別,會有咁多唔識嘅女人會覺得阿星好呢?不過呢個問題都已經唔係阿星今日先諗嘅嘢,亦都係一個已經諗咗好耐都冇答案嘅課題,所以都已經冇乜點諗,由得佢就咁算。
厠所嘅外面,通常唔係男人等女人,就係女人等男人㗎啦。阿星行出厠所,諗住行返去餐廳度同Cassy地會合,噢,大家都知道,商場入面嘅餐廳多數都唔係有自己嘅廁所,而係要啲食客行山長水遠咁行幾條石(啲榴槤國人叫行幾條街做行幾條石)先去到廁所嘅,行返去廁所都應該大概差唔多咁上下要一分鐘左右嘅時間。正喺阿星行出廁所門口,諗緊出到去應該係轉左定轉右先可以行返去餐廳方向嘅時候,男廁門口有另一碌杉楝咗喺度等緊阿星嘅到來。
待續😬