星期五又寫多段先～
那些年，星星同學會 第40話
「小姐，你幾時先肯走呢？」
「瞓多陣先啦，我都未瞓夠。」 Grace一於好少理。唉，咁阿星點同佢地交待？
床上面，兩個人又攬埋一舊，又係要枕住阿星隻手，但又死唔瞓，係咁喺度鳩噏。晏晝兩點喇，點好？
冇幾耐細媽喺樓下嗌：「喂，我地去超級市場喎，你要唔要買嘢？唔要就再瞓啦，我地三個鐘頭先返。」
天助星也囉！等佢地出哂門開車走咗之後阿星嗱嗱聲起身催Grace返屋企！佢好唔情願咁起身落床。送到佢去鞋房着鞋，阿星發現佢對鞋放咗埋一邊，死啦今次，佢地知有人喺阿星房！
突然之間點解佢地去哂超級市場仲講明三個鐘先返就明白哂！推咗Grace上車，佢望住阿星話：「你記得打俾我喎。」
「吹咗咁耐仲唔夠咩？」
「仲想吹呀，不如今晚吖。」
仲今晚？阿星要返工㗎，啲星期五六日果啲餐館好忙，阿星嘅使費靠哂佢。
「不如我嚟接你收工吖？」
唔好搞，跟住又唔知點返屋企。搞咗好耐先焗到佢開車，臨走仲要阿星一定要打俾佢。
待續😬
