星期一凍冰冰,出一段俾大家暖身先~
那些年,星星同學會 第41話
返到入房,阿星用有限嘅腦袋諗咗好多嘢:Joyce走咗,Grace又跟出跟入,搞到成屋人誤會哂佢係阿星女朋友,唔通真係要阿星做佢嘅兵?雖然Grace 咁靚女,又肯俾啲甜頭阿星啫,第時佢顯露娘娘本性,要阿星正式參兵,阿星又冇財力又冇牙力又冇體力,水兵信號兵炮兵呢啲實冇阿星份,到時唔通只能夠做個步兵,喺娘娘身邊步住咁大把?
阿星思前想後,諗下諗下,就諗到返工時候喇。返餐館,梗係要著返件白恤衫黑西褲黑鞋啦,仲外加件黑色馬甲,雖然阿星叫做唔靚仔,著起上嚟都有啲型嘅。星期五晚返餐館,忙就梗㗎喇,簡直係忙到甩碌,裙甩褲甩啦。咁忙嘅時候其實係最好嘅,因為忙到阿星唔使諗其他嘢,只係掛住落單,送餐,洗煙灰缸,倒垃圾,再唔會有空閒去諗其他嘢。
阿星做散工嘅餐館,喺倫敦嘅西北區,接近Edgware ,收工都好彩可以搞到尾班車返屋企,返到屋企附近個地鐵站都要差唔多零晨1點㗎,阿星呢啲窮苦人,係咁上下。間餐館11點半關門,last order 就11點3,呢啲時候阿星呢啲part time就會喺10點半左右俾人叫入茶房度洗咖啡杯洗煙灰缸倒垃圾咁,收工前都仲會忙餐懵。
然後厨房佬大嗌,有人11點3買外賣。唉,臨收工先嚟買外賣,呢啲人都真係唔揍米氣。厨房佬整整整,阿星洗洗洗,洗洗下啲外賣就出嚟,阿星擔住支煙,一路同啲入嚟煲煙嘅樓面(正職嘅侍應生)吹水,一路洗煙灰缸,通常呢啲情景啲外賣出嚟都係啲樓面攞出去,今日阿雄哥唔知點解陰陰笑,叫阿星攞外賣出去俾個客,阿星望下佢,佢一路陰陰笑話:「去啦,包你有so,攞埋外賣出去順便收工啦衰仔!」雖然阿雄哥練開詠春拳,出手快捷陰濕,但都冇今晚咁樣對住阿星陰陰笑過。唔通阿雄哥你對阿星…………唔會啩?
待續😬