凍冰冰更新先~
那些年,星星同學會 第43話
大家冇估錯,喺度等外賣果個短短頭髮著住一件頭吊帶裙同波鞋對住阿星笑咪咪嘅,係Grace。你點知阿星喺度返工?「打去你度問uncle auntie咪知囉!」個衰妹一路講一路笑。阿雄哥跟住後面走出嚟打咗阿星一鎚,笑住同阿星話:「你個死仔,個女朋友仔咁靚女都成日收收埋埋,人哋嚟買外賣接你收工啦,巴閉啦死仔!」真係寃枉,Grace 查實並唔係阿星女朋友,不過你哋個個都咁講,阿星要解釋都無從解釋起。唔怪之得頭先班樓面阿樂哥阿傑哥阿Jack阿Black兩兄弟同阿蘭姐個個都陰陰笑啦!
個個都知,係阿星一個矇查查。Grace 勾住阿星隻手,另一隻手攞住阿星包外賣,然後話:「我哋返去食宵夜囉!」返去?去你度定去阿星度呢?
你係咪會諗住阿星會咁問?咁就真係大錯特錯。阿星同Grace 話:「唔好玩啦,阿星攰,要返去抖啦。」一路推開Grace 勾住阿星嘅手,然後直行出門口。
Grace 揸住包外賣跟住追出嚟,又再勾住阿星隻手,笑住抬起頭望住阿星話:「係咪好驚喜呢?」點解你會覺得驚喜呢?
Grace 勾住阿星嘅手緊一緊,然後話:「你放工我嚟接你,仲同你啲同事夾埋要你攞外賣出嚟俾我,係咪夠哂surprised 呢?」阿星真係唔明,走嚟接放工又有啲咩咁驚喜呢?仲要俾咁多人誤會你係阿星女朋友,你唔覺得難堪咩?「點會唧,如果我返part time你嚟接我收工,開心死我添呀!」你屋企咁有米,唔使返工啦下話?
Grace再次箍緊佢勾住阿星嘅手,然後話:「如果我去返part time ,你係咪會嚟接我放工先?」
唔會!
「點解姐?」
冇點解,唔會就係唔會。好喇,阿星要去趕車,一陣尾班車走咗就要瞓街啦。你小心返屋企。
待續😬