不過人地都放低咗阿星啦，得阿星喺度自作多情啫😬

曾經有段至真嘅愛情喺我面前………😂

曾經有一份至真嘅愛情擺喺阿星面前，但阿星冇去珍惜，到冇咗嘅時候先至後悔莫及，塵世間最痛苦莫過於此。如果個天可以畀個機會阿星返轉頭嘅話，阿星會同個女仔講阿星愛佢；如果係都要喺呢份愛加上一個期限，阿星希望係一萬年。😬

好一個情聖星，可惜都係傷感結局！😂

都未到結尾，你又知傷感？😬

唔通柳暗花明？😉

阿星睇錯，以為師兄話花柳明😬

師兄做乜咁敏感？😉

查實阿星係一個感性嘅人嘛😬

更新下星星同學會先～


那些年，星星同學會 第54話

6點幾，兩個人攬住又再瞓，其實阿星一路都瞓唔著。頭先Grace提起Joyce，令到阿星再次諗起佢。

記得第一次去Man屋企，見到Joyce 喺度打太空戰士6，阿星嘅飛弗，即刻埋去問佢打緊邊度，Joyce 望下阿星，然後輕描淡寫咁話佢啱啱打到世界崩壞之後。阿星問佢有冇救返Cid博士，佢擰轉頭望住阿星，好似見到稀有動物咁，然後話：「救到嘅咩？」

阿星哼哼兩聲，話：「救唔到嘅咩？」

然後Joyce 反白眼，再問：「救到嘅咩？」

呢啲無限loop嘅問題總需要有人終結：「當然，你有冇存檔之前個位先？」

Joyce 話：「梗係有啦！我幾驚啲人死哂，打一段開一個save呀！」

阿星忍唔住笑：「你都幾小心喎，save得咁密。」

Joyce白咗阿星一眼：「唔得咩？」

「得，咁依家咪等到阿星嚟幫你囉。整定你等阿星啦。」

就係咁，阿星開返之前個存檔，一步一步教Joyce 點樣喺世界崩壞之前救返忍者，世界崩壞之後救埋Doctor Cid，等個女主角嘅故事劇情由悲傷變成有希望。而阿星，亦都得到個機會成日打電話去Man屋企同Joyce 傾電話。

然後有一日，阿星又去Man屋企打疐，果晚阿星自己一個喺廳度打機。原本以為其他人都會嚟，點知最後得阿星，Man已經返咗上樓上同老婆大覺索，得返阿星喺度打機煲煙。Joyce 就喺呢個時候喺樓上行落嚟，阿星望下佢，佢又望下阿星，然後佢入咗厨房，跟住攞咗兩支嘢行出嚟，遞咗一支俾阿星。

「陪我飲！」Joyce一講完就自己開始飲。

待續😬