呼吸有害
與Bella的最終章(下):
第2天早上,我們已在公司,約定好的時間,大門看見旅遊巴駛進來,地方辦的人和香港來的老師同中學生都上來了,在會議室大家寒暄一番後,我先作一些簡單的介紹,然後就著廠長和Bella先帶一眾老師和學生去考察公司的生產流程。今天始終算是我們第一次的對外開放招待,所以公司同事衣著都份外斯文,也有點緊張什麼似的,除了上次歐洲之行外,今次算是我再一次西裝示人,
奇怪感覺Bella每次望住穿西裝的我眼神都有點不一樣,我沒太為意,反而呢~~~~咦,乜而家中學老師咁後生架咩??嘩,連女學生都咁索既~~~~ 當然呢D都只係我心裡同自己講野啦,我果刻外表好專業架,即大家應該試過,你個樣係開會時好認真專注聽緊老闆講野,但其實個腦已轉左去諗今晚食咩,星期日去邊度玩一樣……
而我應承得幫廠長手,亦唔會”揸流攤”,當學生同老師都行完公司整個生產的基本流程時,大家返回會議室內,就由我講解如何為產品由宣傳、做展覽、到見客、接單、再而到設計、修改、審批等等,還有當中佢地會每年飛黎香港或國內跟進產品進度,我地亦會每年飛過去外國親自同客人見面同介紹新產品等等,我無上過導師培訓,但我覺得,我懂的,教你,你可以識晒都無問題,因為有樣野無得教既,就係叫應變臨場感,唔同人和物,唔同既態度反應,其實都好講究。到最後的答問環節時,我發現香港學生既一個通病,就係唔敢發問,好像我剛才說的,我敢講佢地吸收到6、7成已經好好,因為香港既教學最大問題係….. D學生可能仲未知為咩而要學習,一個無動力既行為,係好難發揮得理想的。幸好我剛才說的後生女老師亦打圓場由佢先問問題: 可以講下,你對工作的想法,同有無咩野可以同大家分享下心得呢?
我: 首先,多謝大家黎到呢度參觀,不如我講講一D書本無教既野。其實今次既行程安排,你地要多謝文主任。 ( 我指指坐在遠處,我們這區的地方辦主任,今次成事,是由他向廠長提出的。學生和老師聽見,也禮貌地拍掌以示謝意。我亦和文主任打招呼。 ) 我想講既係,我地公司其實從不對外開放的,雖然我地公司講唔上生產什麼高科技產品既公司,但由設計,到製作,生產完成既流程,其實都係商業秘密。書本會教大家知識、技巧同思考,但應該無教你地建立人脈關係,無論你身在何方,個人能力係有限既,你有能力其實係基本既要求,但如何令一件事更易成功同取得成就,一個好既團隊,必不可少,而一個好既人脈關係,就更能令你整件事更上一層樓。你地有留意頭先帶隊既兩位嗎? ( 講完,眾人不約而同望向我左邊坐在一旁的Bella,Bella今日化了淡妝,穿得活力十足,One piece碎花裙,收起了性感,多了些陽光氣息。 ) 喂喂,你地唔好剩係望靚果個先得架,我右邊既呢一位,先係我地既廠長,公司既靈魂。 ( 講完,大家在笑。Bella和緊張大師上身的廠長現在才輕鬆起來。 ) 我想講既係,要成就各位黎我地公司參觀,其實佢地都功不可沒,而且無佢地,也成不了事讓大家這麼輕易了解我們的製作,我有一點必須強調,就係我地既客人都無你地今次行得咁徹底和清楚,所以……. 文主任你爭我一餐飯。 ( 說完我再望向文主任,他點頭,這個一來一往,是為他笠高帽同時,我要他知道,我地在賣人情。而就在此時,有一個男同學問: 你係香港黎既,點解你會做呢間公司呢? )
我: Haha…… 我將你呢個問題,消化為,點解我係香港人,但就揀一間要往來香港同國內既公司發展,好無? ( 講完,學生在點頭。 ) 有人會認為,香港大把機會,亦有人認為,返黎國內做野好辛苦,但我認為,要機會,就要揀個大既機會,要成功,就要揀最有成功機會既。你地可能未清楚國內既優勢同吸引之處,唔緊要,但客觀D睇,好多外國公司恨不得打入黎國內市場分一杯羹,你就會估到個大概就係,國內,其實係幾咁有潛力,你地可能聽到好多國內既不利消息,真定假,今日唔係呢度講,但我想講既係,只要果個地方有過去有歷史,就一定有過對錯,懷念過去,不如放眼將來。 ( 之後下刪5百字就唔講了,但我想講既係,其他人唔提,但Bella則目不轉睛的在聽我分享,直到尾聲。 ) 好啦,最後我想講一句,你地有既係青春,而我地既優勢唔會一世,大家要盡快搞清楚,其實自己想要咩,然後去努力爭取。
講完後,學生老師和我們幾位大合照,剎那間令我回味讀書時的青澀時代、開心既日子,我不是被感動了什麼,但忽然被挑起了想再學習的心情倒是真的。這時候,其中一位女老師走來問我拎電話,說是日後send照片和感謝狀給我們,我當然欣然接受,到我回過頭時,就見Bella邊安排學生離開時邊看著我,她做了一個怒目的鬼臉,我以一個不明白又無辜的表情回應之。