星期一，又係熱屎辣辣，更新下先～
那些年，星星同學會 第116話
講返Chloe，返到香港阿星即刻揾佢，佢又好踴躍咁出嚟。三個月冇見啫，都唔使嚟啟德機場接阿星機，一見到阿星就即刻撲埋嚟攬住咁熱情嘅。Chloe帶阿星去香港好多地方見識，講真，七年冇返香港，好多嘢唔同哂。中環多咗條行人電梯，尖咀多咗間崇光，而且啟德機場就嚟拆，同埋好多好多其他嘢。阿星都變咗，由一個傻仔變咗個矇仔。Chloe特登攞假同阿星去好多地方，見阿星成個鄉下仔咁，又帶阿星搭電車去食嘢。
有一日阿星約埋一班小學同學去食飯，當然都叫埋Chloe啦，不過佢要加班，所以話會遲到，Joyce阿星都有約，打長途電話揾Grace叫佢同Joyce講，仲要同Grace頂頸，又求又氹先求到Grace應承，不過Joyce最後都冇啋過阿星，冇出現過。
Chloe都好好，一搞掂即刻打俾阿星，話嚟淺水灣沙灘度揾阿星地。阿星有個朋友有架van仔，送哂大家落淺水灣，Chloe就喺淺水灣度等大家。班朋友當中有一個係阿星嘅中學同學，同阿星差唔多高，以前大家叫佢做鬼太郎，差唔多款啦。
鬼太郎見到Chloe，即刻第一時間去打招呼，條友真係好夠朋友，見係阿星嘅朋友就招呼得好熱情。大班人去到沙灘，都係玩下果啲嘢，而阿星就因為Joyce冇啋過阿星而冇哂心機，自己坐咗喺沙上面發傻。
待續😬
