天口熱,去揾另一位女角先~
那些年,星星同學會 第139話
開心嘅日子通常都好短暫嘅,呢一次亦都唔例外。好快,阿星就決定離開呢個地方,向另一個地方出發。為免阿老闆問長問短,Agnes喊苦喊忽,阿星喺星期六晚收工之後,就執哂包袱,果個星期嘅糧都冇出,就靜雞雞咁走咗。
Agnes唔知喊成點?阿老闆唔知會唔會發漿糊追殺令揾刀手圍阿星?果朝坐火車時阿星都諗咗好多嘢。話明唔會喺度長住,點解搞啲咁嘅嘢呢?唉,人地對你好,你就忍唔到,正衰公!查實阿星同Agnes冇發生過咩事,雖然都有兩個月嘅時間,可以做到好多嘢出嚟,不過人地仲細,真係唔好害人。而且自己知自己事,一埋親阿星身,最後都唔開心嘅,唔好要人傷心啦。仲有仲有,阿老闆咁疊馬,再搞落去出咗事分分鐘切咗小星星出嚟,咁Agnes咪要守生寡?
返到出嚟都伯林,去咗健力士廠飲咗杯新鮮嘅黑啤。個個都話黑啤搬運嘅次數越少,味道越好,查實阿星就唔多覺,反正嚟到就試下。試完黑啤阿星就坐火車去到另一個得一條小街繁忙嘅小鎮度上工嘞。
小鎮喺邊度就唔講喇,總之個鎮中心得一條街,半個鐘包你來回啦大概。咁細地方唐人當然唔多啦,數埋阿星先得七個,老嘅嫩嘅都有,就係冇後生嘅。呢啲地方唐人都係做飲食,阿星嚟到都唔例外,打返個煲呔做鴨仔。中餐館入面西人侍應招呼番西人你見過未?呢度有個長工鬼妹叫Anna Marie,有啲肉地啦,樣唔差嘅。羗色頭髮,面長長咀角翹起,西人叫中碼,中國人應該已經係加大,簡單嚟講好似全英一叮一個英國小提琴手Lettice Robotham。大家上youtube睇下就知鬼妹中碼靚女係點嘞。順帶一提,通常啲人係叫Anne-Marie ,好少聽過女仔叫Anna-Marie ,所以呢個名令到阿星好記得。
大家可能冇乜留意,因為阿星係一個倫敦人,一口倫敦口音,叫Anna嘅時候會因為口音而叫咗“晏娜”而唔係Ann-na,Anna曾經講過,佢好中意阿星咁樣叫佢。
https://imgur.com/a/7tL7Of8
待續😬
[
本帖最後由 star_platina 於 2023-6-27 13:58 編輯 ]