第六集
聽到韋公子用五百兩搵林嫂「實習」，杜月兒冇咩大反應，因為佢仲喺腦入面換算緊五百兩的價值，但季大娘誤會佢係見過世面的人，所以聽到五百兩覺得好普通。
「係喇，月兒姑娘，因為有你的指導，呢兩個月我哋的姑娘都賺咗唔少，有幾個覺得自己年紀大，想從良喇。」季大娘突然靠前，低聲道：「我收到消息，南面的戰事已經結束，表面上係一個小國戰勝，其實係西域國的將軍暗中幫忙。由下月開始，每月都會有商隊由西域國去南面經商，據講當中會混入軍人，保護邊彊。」
月兒心想，呢D軍事野，聽到都煩。但季大娘仍然滔滔不絕：「西域國的人，有好多都係十幾年前由南面逃難過嚟的，就連我們萬花樓的姑娘，都有幾個係南邊的人，佢地一直都想返去家鄉，但又冇咩錢，而家知道南邊安全，又由商隊同軍人過去，就決定拎住最近賺到的錢，返去家鄉做D小生意，或者收養一兩個孤兒養老，又或者嫁比鰥夫，點都好過而家的皮肉生活。」
季大娘飲啖茶，繼續講：「我知道你地寨裡面好多都係孤寡，如果佢地想去南邊謀生，可以同我地的姑娘一齊過去，南邊氣候好，老人小孩靠種地都可以維生，唔似我地北邊，耕地少，要打獵幫補生活。」
月兒沉思了一會，道：「我返去問問佢地…多謝季大娘。時候都唔早喇，我要去趕集，先走喇」
季大娘將檯面的荷包拎比月兒，「呢度有四百兩，係你的分紅，我知道你會去市集採買，所以準備咗五十兩係碎銀同銅錢，剩低的三百五十兩係銀元寶，你收好啦。」
杜月兒收到之後眉開眼笑，有咗呢四百兩，佢有好多計劃都可以實行了。同季大娘道別之後，佢首先去咗糧行，訂好了平時食的糙米、麥、粟米之後，忍唔住再買十斤白米，需知道，北方呢邊多數係食麥，粟米，糙米的價格係麥的兩倍，白米更加要三倍價錢，但杜月兒真係好懷念白飯呀…一個簡單的煎蛋飯加豉油，係佢目前渴望的食物之一。
好彩糧店的學徙係北是村的村民，只係收五文錢就將貨物送回村，杜月兒諗起古代的人，都會用牛車或者驢車代步﹝馬車太貴，有錢人用的﹞，決定去買隻牛，去到牲口店，剛好有一隻一歲半的小牛出售，雖然太年輕，唔可以拉車或載人，但可以載少少貨，而且由小養大，容易馴服，杜月兒豪不考慮，就拎咗五兩出嚟比錢，再講價要店主送幾綑糧草。
杜月兒拖住小牛，牛背上放咗幾綑糧草，但小牛都負擔得到，仲好輕鬆咁慢慢行。之後杜月兒見到有間雞鴨店，知道可以送貨去村，就買咗一隻公雞，兩隻母雞同十隻雞仔，既然要喺呢度生活，就認真打算啦…話哂呢度冇超市，要自給自足，想到自給自足，佢又轉去種子店，買咗十幾種佢認識而又適合而家種的蔬菜種子，雖然佢未試過耕田，但都有種過番茄同士多啤梨呢D，希望呢少少經驗有幫助啦。
之後杜月兒再去咗幾間布料店，將所有布碎，次貨全部買哂，用咗接近二十兩，當然，佢會再次講價，成功要店主送針線，原來古代的針好貴呢…講到口水乾，店主只肯送一支，反而棉線就送得鬆手D，相信係製造技術問題啦。
<待續>
今集同下集都係交代故事背景，應該冇床戲
