引用:
原帖由 一夜狂歡 於 2024-4-17 17:16 發表 
約咗聽日傍晚六點文記大堂等，睇嚟Irene 已經知道單嘢係我做嘅，應該未揚開嘅，依家差在點收科咁解，Irene想整死我嘅話，其實可以直接向管理處投訴，人證物證俱在，我唔死都一身潺，依家反而搵我食飯，睇嚟應該有計傾，但係條件辣成點，真 ...
隧道口轉一次車好快去到文記，差十五分鐘先到六點，大堂坐陣先啦，女主角未到心情好矛盾，好似十五隻吊桶，七上八落，傾得掂一天光晒，傾唔掂萬刼不復，患得患失之下越等越心急，咁耐都未嚟呢喂，不如打個電話去問問，Irene唔接電話但係留言話有嘢做晏啲到，吹脹唔問唔出聲乾等，等咗超過半粒鐘，悶悶地不如出去行下，星期日靜英英條街連賓姐都唔多見，黑媽媽冇嘢睇，都係返文記等好過，文記梳化好舒服，坐冇幾耐瞓着咗，唔知過咗幾耐突然有把聲喺耳邊大喝：起身喇仲瞓！！當堂嚇到成個彈起，原來衰女包駕到，我話佢：俾妳嚇死！知唔知人嚇人冇藥醫㗎。Irene若有所指回應話：乜你都知驚㗎，咁點解你又唔怕嚇親我呢死仔？睇吓鐘就嚟八點，足足等咗兩粒鐘有突，衰女包一定係有心整蠱，無謂講咁多快啲上餐廳，成千銀一個㗎大佬，女主角到場，我難免心急問: Irene 呀！唔知嗰單嘢點呢呵？Irene答話：收聲啦！食完嘢先再講，唔好叻唔切呀。都啱嘅，已經咁遲，餐廳人唔算多但食物好齊備，款式琳瑯滿目不時加添，就算咁晏但樣樣都食到，進餐時Irene好正常，冇表露任何情緒，仲不時同我有傾有講，唉食飽先算啦。
