star_platina

引用:

原帖由 r6654c 於 11/11/2021 14:21 發表

星爺,唔信囉,睇下睇下可能又有秘技出場😛

R師兄真俾面，連阿星果啲不入流嘅嘢都肯接埋😬

star_platina

引用:

原帖由 koalaau 於 11/11/2021 15:23 發表
我都38先買個口琴自學，學學下都吹到好多歌了。

英雄所見略同喎師兄（容許阿星扮下英雄先）😬

star_platina

又到星期五，米雪第8話～

米雪 8

其實阿星好中意喺街度拉二胡，唔係為咗賺錢，只係阿星中意拉，拉俾人聽。雖然好似俾人覺得有啲唔多正常，不過阿星中意企喺街邊度拉奏二胡，而Cassy好中意拍低阿星拉二胡嘅時候嘅陶醉表情，話阿星好可愛咁話。雖然阿星覺得自己應該係果啲有型有格嘅音樂家款頭，不過俾阿Cassy講完之後就完全冇哂啲英雄氣概，唉。

講番阿星同Cassy，阿星地兩個行到攰攰地，就返去食嘢嘅地方買咗一杯凍飲兩個人飲，阿星亦都乘機打開咗個二胡盒將個二胡攞咗出嚟準備彈奏。簡單咁調咗音，拉咗兩下試下，阿星就開始喺美食廣場（即係茶檔囉）度拉起二胡。玩下樂器，撚下啲著名樂曲，好快就有好多公公婆婆坐喺度圍觀，阿星中意拉俾啲公公婆婆聽，因為佢哋同阿星一樣，喜歡聽傳統中國音樂。Cassy行開咗，開始用手機拍攝阿星娛己娛人嘅佢所講嘅“可愛”樣，阿星其實非常之中意拉奏快曲，例如<<戰馬奔騰>>呢類比較新式啲嘅二胡快曲，啲動漫主題曲好似<<天空之城>>呀咁都會拉下嘅，如果要真係拉到人聽完流眼淚嘅話，太極琴俠陳軍老師嘅作品<<太極琴俠>>慷慨激昂幽怨纒綿兩者兼備，唔會令人聽落産生矛盾，而且激昂同幽怨夾雜，一層一層咁帶你大起大跌，非常之扣人心弦，可惜阿星功力唔夠，拉唔出果種味道。

喺阿星拉完一輪之後，三三落落嘅公公婆婆大叔大嬸擺檔嘅人都過哂嚟八卦，係嘅，平時邊會有傻佬喺呢度搞埋啲咁嘅嘢㗎？阿星演奏完一曲<<太極琴俠>>之後，發覺人群入面有一個著黑色衫裙戴黑色眼鏡綁住頭髮嘅女人交叉雙手一路望住阿星，喺大家街坊街里著街坊裝嘅熟食街市大厦入面有一個著得咁整齊而且態度嚴肅嘅人企喺度，對整個場地嚟講帶出咗一種格格不入嘅感覺。不過唔緊要啦，欣賞音樂係唔分年齡唔分階級嘅，只要係有人欣賞，阿星就會好落力去拉奏。既然大家咁開心，不如拉多隻<<賽馬>>俾大家都刺激下哩？

正所謂：

當街演奏自其樂
嘉倩稱讚甚可愛
美食廣場音律起
引來一眾知音人
黑衣女士映眼簾
神態嚴肅行注目

金翅奏得嗨嗨鳥
（待續）😬

[ 本帖最後由 star_platina 於 2021-11-12 08:58 編輯 ]

star_platina

引用:

原帖由 boar36 於 12/11/2021 08:52 發表
早晨  星爺，寫好了   又來鳥  ........
金翅奏得嗨嗨鳥！   

當街演奏自其樂
嘉倩稱讚甚可愛
美食廣場音律起
引來一眾知音人
黑衣女士映眼簾
神態嚴肅行注目 ...

早呀coar師兄，呢個嗨嗨鳥係有代價㗎😬

star_platina

引用:

原帖由 boar36 於 12/11/2021 09:43 發表
吓  ......... 願聞其詳

查實獅城對街頭賣藝嘅規管係好嚴嘅，冇牌而又唔喺指定地方賣藝係會被罰款同有機會坐監嘅，咁師兄估到阿星之後點啦😬

star_platina

引用:

原帖由 boar36 於 12/11/2021 11:15 發表
啊，罰款兼拉人
獅城出咗名喺 fine city!

阿星第一次去嘅時候揹住個布袋，放喺地上面走去影相，點知俾警察叔叔捉住話阿星隨地掉垃圾，阿星話冇吖，邊度有垃圾？佢指住地下阿星個布袋，話你咁大袋垃圾掉喺度，仲話冇？阿星話呢個係阿星個背囊喎，搞到警察叔叔幾唔好意思，阿星幾尷尬😬

star_platina

又係星期一，努力嘅一日，第9話～

米雪 9

一首輕快嘅賽馬拉完，大家嘅情緒都非常之高漲，有人拍手掌，有人俾錢阿星，咩呢？雖則話阿星係為咗娛己啫，但係有錢唔通唔收咩？果位黑衫黑裙黑眼鏡嘅女士一路望住阿星，直到Cassy好開心笑住走埋嚟將手上面嘅電話對住阿星搖兩搖，果位黑衫黑裙黑眼鏡嘅女士就轉身離開咗喇。唏，睇下女人啫，又唔使話阿星鹹鹹濕濕嘅，啱唔啱先？

阿Cassy即刻放條片俾阿星睇，阿星覺得自己拉二胡嘅時候都算叫做有形有格，但係唔知點解阿Cassy硬係講阿星好可愛嘅，查實你係咪將有形（stylish）同可愛（cute）撈亂咗呢？

搞下搞下，飲埋杯kopi冰都差唔多時候，阿星同Cassy執埋啲嘢去會場度揾Cassy個做event planning嘅朋友仔喇。牛車水去新逹會展好近嘅啫，搭MRT話咁快就到，搭車梗係趁機會攬多啲Cassy啦，阿Cassy都幾中意阿星攬住，而且雙手仲會圍住阿星條士啤呔嚟攬，真係温馨。

阿星同Cassy都冇証件出入，去到會展只能夠企喺門口度等佢個朋友仔出嚟接阿星地入去。呢類展覽人來人往，啲人出出入入非常繁忙。然後阿星見到一個好高嘅身影，一個高高瘦瘦，仲要高過Cassy嘅年輕女人，著住一件黑色背心加窄身牛仔褲一路行埋嚟。

Cassy一見到佢，即係舉高手叫佢過嚟，查實佢應該未睇到Cassy之前已經望到阿星一碌杉咁企喺度，所以三兩下已經知道阿星係Cassy打俾佢果時講嘅果個好高嘅座標喇。個好高嘅女仔行到埋嚟，阿星循例都要依起棚唔多美觀而且非常之礙眼嘅牙同佢笑笑，好高嘅女仔一路伸出手同阿星相握，Cassy一路介紹阿星係佢嘅上司，今次過嚟同佢見個面，傾下如果合作搞個展覽嘅話需要做啲咩。Cassy嘅中學同學Shanie，喺獅城度做呢類嘅event planner，即刻帶住阿星同Cassy入去會場參觀。

正所謂：

聽眾表現各迴異
黑衣女士芳蹤杳
啟程前往展覽會
再來親近極溫馨
門前靜候待君臨
互相認識進場館

金翅要觀摩下鳥
（待續）😬

[ 本帖最後由 star_platina 於 2021-11-15 09:43 編輯 ]

star_platina

引用:

原帖由 boar36 於 15/11/2021 09:27 發表
早晨  星爺，寫好了   又來鳥  ........
金翅要觀摩吓鳥！

聽眾表現各迴異
黑衣女士芳蹤杳
啟程前往展覽會
再來親近極溫馨
門前靜候待君臨
互相認識進場館 ...

觀多啲好定摩多啲好呢？😬

star_platina

引用:

原帖由 boar36 於 15/11/2021 10:26 發表
又觀 又摩 又揸 就最好啦！

又係喎，忘記揸添😬

star_platina

引用:

原帖由 r6654c 於 15/11/2021 10:28 發表

早晨,星爺,總是覺得個位黑衫女仕觀眾,可能是......

可能是冇咩事發生嘅事😬