星期五,一個非常之快樂嘅日子,米雪第13話~
米雪 13
甜品嚟喇,阿星特登自己唔叫甜品,睇下呢三個女仔食甜品嘅食相先得。一個檸檬蛋白配新鮮雜果係招牌甜品,Cassy又點會唔叫呢?一個密西西比泥漿批就係Shanie嘅,而同麵包布丁結緣嘅就竟然係古古肅肅嘅Michelle。三樣甜品都配有雪糕,而且每樣甜品嘅賣相都真係幾好。查實阿星都真係幾老學校(old school),中意食麵包布丁,望住Michelle一路好似細路女咁唔知點樣開始食呢舊黃色嘅用麵包砌成嘅布丁。
麵包布丁一般係以前英國家庭入面媽媽用食剩就嚟到期嘅白麵包撕成一小塊一小塊放入玻璃焗盤裡面,然後倒入打匀嘅雞蛋,牛奶,吉士粉,新鮮雲呢嗱,玉桂粉,沙糖同提子乾,再放入焗爐焗製而成。係媽媽嘅拿手美食,又係傳統嘅英式甜品。今時今日整麵包布丁就講究喇,用有機麥麵包,用有機雞蛋,有機雲呢嗱枝刮出嚟嘅香料,有機玉桂磨粉,用低升糖嘅椰子花糖,淋上有機低脂忌廉,號稱食完唔會肥。嘩,仲唔賣個4-5倍價錢?
阿星見Michelle食咗一羹之後個樣好似有啲笑笑地咁,應該都好似得得地,就用隻乾淨嘅預先叫侍應攞咗幾隻嚟嘅鋼匙羹去Michelle個布丁度挖咗一舊仔,真係一舊仔咋,因為阿星雖然中意整甜食,但係就真係麻麻地食,可能真係年紀大喇,少食甜食為妙。
Michelle見阿星食佢…………個麵包布丁,“喂”咗阿星一聲,喺佢“喂”嘅時候,阿星亦都已經將個匙羹仔嘅麵包布丁餵咗入阿星自己個口度,合埋眼㗳下係咩味,然後同Michelle話:「個麵包布丁好好味喎,你真係識揀甜品,又大方請埋阿星食。獨樂樂不如眾樂樂,不如大家分享下,可以食多幾種唔同嘅味道?」最後當然係大家都一齊食檸檬蛋白批,密西西比泥漿批同埋麵包布丁啦,仲問?
正所謂:
甜點喜好各不同
各款配以冰淇淋
唯是英雄獨自在
米雪鍾愛包布丁
上司小匙來破冰
四人同享共歡欣
金翅共享甜品鳥
(待續)😬
[ 本帖最後由 star_platina 於 2021-11-19 09:06 編輯 ]