第三章．真相與野心
Newton同Joan離開酒店嘅時候，Newton隨手攞左一張咭片遞畀Joan:「以後可能用得著。」Joan話:「啍，當我咁隨便咩。」不過都接過張咭片，順手放入自己個手袋裡面。
當佢地出左酒店，Joan咁啱轉頭一望，見到個中年男人揸住架普通房車駛入酒店，而坐喺個中年男人隔離嘅竟然係佢公司個阿姐，心諗:「估唔到阿姐都偷食。」Newton見Joan臉色有異就問:「咩事?」Joan即刻話:「冇嘢呀，我返公司先，有啲文件未做完。」
Joan返到公司，見到同組嘅女同事，個女同事問:「啱啱見完客呀?」Joan就隨便答:「係呀，不過未傾得成。」跟住反問:「阿姐呢?」個女同事話:「你返黎冇幾耐之前，出左去見個大客。」
Joan心諗:「哈，阿姐講大話，明明係出去偷食，又話去見客，不過都冇咩大不了，自己都已經接受同唔同嘅男人上床喇。」個女同事又問:「你有事搵佢?」Joan話:「冇呀。」
個多鐘頭後，個阿姐返黎公司，Joan試探個阿姐:「阿姐，聽講你去見個大客喎?」個阿姐亦唔隱瞞:「係呀，傾成左啦，遲啲請晒你地食飯。」Joan頓時一愕，心諗:「你唔係去偷食咩，又可來有保單呢?唔通...」不過仍然同個女同事一齊講:「多謝阿姐。」
個阿姐返入自己個房，Joan再諗:「由離開公司到返公大約得兩個鐘頭，邊有可能偷食完再去傾保單然後返公司。」雖然有疑問，佢仍然繼續完成埋啲保單需要嘅文件，再攞去畀個阿姐確認。
喺房入面，個阿姐睇完啲文件讚Joan:「呢排成績唔錯喎。」Joan話:「都係多得你啫。」個阿姐話:「都要你自己肯改進先得。」Joan話:「我會繼續努力。」個阿姐見Joan冇出返去:「重有咩事想講?」Joan猶豫左一刻，終於決定問:「阿姐你係咪為左保單，同客上床呀?」
個阿姐望住Joan:「點解噉問?」Joan話:「個幾鐘頭前，我見到你同個男人去開房，如果你可以喺咁短時間內，同男人上床又簽到保單，唯一解釋係你為左保單，同嗰個男人上床。」個阿姐沉默左一刻:「係，我係為左保單，同過好多男人上床。」
Joan即刻問:「你唔係講過...」阿姐截住佢:「我知道我係叫過你，唔好為左保單同客上床，係因為我唔想你行返我條舊路，你知唔知只要你接受左所謂嘅潛規則，啲男人就會當你係洩慾工具噉玩，重以後都返唔到轉頭，除非你脫離呢行啦。」
Joan話:「原來係噉，多謝你呀阿姐。」個阿姐話:「唔使客氣，不過今日嘅事唔好講出去，因為喺公司接受潛規則嘅人唔止我一個，你明啦。」Joan點頭話:「我知點做。」
當晚Joan又搵Newton傾偈，傾左一陣佢就講佢阿姐嘅事，Newton話:哦，唔怪得你表情有啲怪怪地啦，原來見到佢去開房
Joan答:係呀，當時我以為佢只係偷食，但係佢認同客上床嘅時候，我有啲失望，重要為佢真係靠自己努力，先可以咁快升做阿姐
Newton話:呢啲事情有時又好難分對錯嘅，但係我始終唔贊成噉做
Joan亦話:冇錯，我要有底線
Newton話:好，不過我冇底線架，哈哈
Joan明佢嘅暗示:你正衰人...
過左兩日，個阿姐真係請晒同組嘅同事去一間五星級酒店食自助餐，Joan見佢著左一身名牌衣飾，不禁聯想到佢唔知畀幾多男人玩過，就扮到好開心噉同佢高談闊論，其實心中有啲憐憫佢。
個阿姐話:「我睇好你架，你要繼續努力呀。」Joan話:「我一定會，希望可以快啲升職。」個阿姐笑一笑:「唔使心急，你實有機會嘅。」Joan見其他同事出晒去攞食物:「其實我無意中知道一個消息，係公司會開多一組人，而且重會喺我地咁多組員之中，升一個人做組長。」
個阿姐眼定定噉望住Joan:「你點會知架?」Joan冇解釋，只係話:「你噉問即係事實啦。」個阿姐知否認都冇用，就話:「係有噉嘅決定，不過唔知幾時落實。」Joan追問:「我有冇機會升呀?」個阿姐搖頭話:「你只係做左一年幾就想升，會唔會大想頭啲呀。」
Joan笑笑口話:「我係好大想頭架。」個阿姐認真話:「我唔否認你嘅表現的確比同期入職嘅同事好，不過要領導一組重未夠經驗，你唔好諗咁多住，專心搵多啲客，積聚返多啲經驗先啦，重有，我唔理你點知道，但係唔好同其他人講。」
Joan口話:「知道啦，我唔會講。」心諗:「我梗係唔會畀其他人知啦，畀佢地知道，個個重唔諗住點爭上位咩。」不過其實佢都自知，論資歷的確係未輪到佢升職，但係今次係難得機會，錯過之後又要唔知等幾耐，所以心中仍然諗住升職件事。
[
本帖最後由 netsee 於 2017-2-13 10:20 AM 編輯 ]
