第四十二章．一念之間
Newton話:「呢件事算暫是完左，我都係時候去睇下Arlena。」Coral話:「我車你去。」兩個人一齊去到Arlena屋企嘅時候，天色已經開始昏暗，Arlena開門一見Newton即時攬住佢大喊，Newton安慰佢:「冇事啦...你有冇事呀?」Arlena喊住話:「我本來都諗住死梗，後來突然有人黎拉我走先冇事。」Coral覺得自己有少少被忽略:「你地慢慢傾。」準備要走，Newton話:「你都留係度，我想你繼續陪我。」
兩女一男坐低後，Arlena問:「你係咪真係畀人捉左呀?」Newton話:「係呀，而且你家姊都有份。」Arlena激動話:「佢點可以噉做架。」Newton安撫佢:「我明嘅，係我迫佢嫁畀一哥，佢當然恨死我。」Coral問Newton:「聽佢地講，嗰日係一個女人約你出去，之後你先畀人捉走。」Newton話:「冇錯，而且個女人你都識嘅。」
Coral抬頭諗係邊個:「我都識嘅?」忽然微微轉頭望住Newton:「唔好話畀我知係Jenny。」Newton無奈噉點一點頭，Coral有啲沮喪:「佢點解要噉做?」Newton話:「可能佢重恨我令到佢冇得做校長啦，Carina應該睇中呢一點黎利用佢。」(後來Newton親自去搵Jenny，Jenny承認當時受Carina影響而畀佢說服左，喊住同Newton講對唔住。)
Arlena問:「Athena點樣參與綁架你?」Newton反問:「你爸爸公司喺咪擁有一個自己嘅貨倉?」Arlena諗左一下:「係呀，不過好似好耐冇用。」Newton話:「你家姐應該係借出個貨倉用黎收埋我，而且佢重黎過。」Coral唔明:「照計佢冇理由畀你見到架。」Newton話:「當時我係曚左眼，但係我聞到佢嘅香水味，同我之前見佢時候嘅味係一樣。」
Coral問:「噉你打算點做，報警又好似冇咩實質證據。」Newton話:「我冇打算報警。」Arlena追問:「你想報復?」Coral先答:「我贊成，你家姐狠到要個變態佬挾走你，其他女人又夾埋捉走Newton，唔對付佢地點得呀。」Newton反問:「你怕我對付Athena?」
Arlena提出:「可唔可以放過Athena?」Coral問Arlena:「但係你唔嬲佢咩?」Arlena淡淡話:「始終都係一場親姐妹，而且佢嫁左畀一個噉嘅人，已經係最大懲罰，何況我都冇事啦。」Newton輕輕摸下佢塊臉:「你放心啦，我唔係要對佢地報復。」
再過一日，電視台新聞主播正式報導父女謀殺案兇手係某集團董事局主席Carina，而佢父親係畀佢刺中多刀，當場失血過多死亡，警方會正式落案起訴佢謀殺罪，其後，Carina嘅代表律師去Kay屋企搵Newton:「我嘅當事人希望見你。」
Newton同律師一齊去到拘留室，見有一個著住一身名牌嘅男人大吵大鬧要見Carina，但被懲教處職員阻止，個男人一見律師黎到，就即刻好惡話:「我要見家姐。」Newton頓時覺得有啲意外，律師拒絕佢:「Carina已經表明唔會見你，你唔走我叫懲教處職員請你出去。」個男人瞪一瞪Newton:「我唔會就噉算嘅」倖倖然離開。
拘留室內，Carina同Newton面對面望住對方，Carina問:「點解結果會係噉，我只係想攞返屬於我嘅嘢啫，噉有咩錯?」Newton話:「每個人都有權去選擇想做嘅嘢，好多時選擇重係一念之間，然而得出黎嘅結果係點冇人可以預計，但係不論係對係錯都要自己承受返。」Carina話:「我知，我亦冇打算要逃避。」
Newton問:「噉你要見我嘅目的係?」Carina望一望個律師，律師從手提包中攞出一份文件:「Carina打算將佢所有股份轉贈畀你。」跟住放一枝筆喺枱，Newton冇即時拒絕，只係話:「我唔明。」Carina問:「你黎嘅時候見唔見大吵大鬥嘅男人?」Newton答:「見呀，從來冇聽你提過有個細佬。」
Carina話:「因為佢係個不值得一提嘅廢物，所以我地一直唔畀佢返黎，今次佢終於等到返黎嘅機會，就嘈住要見我，係想我將啲股份畀晒佢，如果唔係就向法庭申請，正式承繼我嘅股份，你認為集團落喺佢手上會變成點。」Newton認真話:「千瘡百孔。」隨手攞起枝筆簽左份文件。
Carina出左事之後，A女社工，May，June清楚佢已經唔可以實現之前答應過為佢地嘅承諾，第一係向Arlena報復，第二係安排佢地入集團任職高層人員，於是三個女人聚係A女社工屋企商量，一時間未得出結果，因為A女社工堅持要對Arlena報復，May同埋June就有啲猶豫。
喺商量期間，佢地都收到來自於Newton嘅短訊:希望你地聽日可以上我集團一聚。佢地三個女人互相望左一眼，A女社工冷冷話:「一定係為個女人求情啦。」May唔認同:「以佢依家咁有錢，應該唔使向我地求情。」June提議:「噉就不如一齊上去，然後先再作打算。」
第二日，三個女人一齊上到Newton辦公室，Newton好誠懇噉招待佢地，A女社工問:「Arlena呢?」Newton答:「佢放左大假，而且佢唔知我請你地上黎。」May問:「噉你想點?」Newton話:「你地只需要聽我講個女人嘅遭遇，聽完之後仍然要向Arlena報復，我唔會阻止你地。」
三個女人面面相覷，都向Newton微微點頭，Newton就開始講:「某一日，我揸車經過海旁，見到有一個女人試圖要跳海自殺，幸好我趕及拉住佢，當時佢情緒好激動，喺我安慰之下先漸漸平復落黎，重開始向我傾訴自己同時間失去事業，婚姻，家人，一時間接受唔到咁大嘅打擊，所以選擇自殺，至於佢點解會同時間失去對佢最重視嘅嘢，我就唔細講嘞。」
三個女人從開始聽Newton講，直到佢講完為止，都係一直默不作聲，因為佢地心中諗起自己之前所做嘅一切，Newton完成晒佢要講嘅嘢之後好真誠噉話:「多謝你地願意上黎，我要講嘅嘢係咁多，要唔要繼續沉淪喺奉還深淵，就在乎你地一念之間。」
-全文完-
後記
女主角Arlena有一個幾特別嘅經歷，所以筆者寫完Newton嘅三部曲之後，再嘗試用佢嘅經歷發展出另一個故事，而故事當中有幾個女人係繼承返前三個故事，算係為佢地做一個總結。
