我怕再同老闆有膠葛，更加怕要求佢幫忙，要俾代價。
但係姑仔同佢男朋友係無辜，尤其係佢男友，如果告得入，好可能要坐監，累佢一世。
「你等一等。」
衡量過邊樣重要，我最後決定俾電話Leonard，佢聽到我把聲，無問我乜嘢事，叫我等一等。
「喂⋯⋯」
一把蒼老但係好雄壯嘅聲，Leonard竟然將電話轉咗去俾老闆。
「喂⋯⋯我⋯⋯係阿慧⋯⋯」
咁突然，我想收線，但係一收線，又唔知老闆有乜反應，仲會唔會幫我。
「老闆⋯⋯」
我硬住頭皮將我嘅要求向佢講，仲問埋佢要乜嘢報酬，睇我俾唔俾得起。
「哦，報酬！哈哈，我幾乎唔記得添，哈哈。」
「咁，你會要我做番啲乜嘢？」
老闆係生意人，一個曾經操控過一個日本黑幫嘅生意人，每一項交易，佢都要回報。
「好，爽快，我要求俾電話你，你陪我傾偈。無得推搪，我每次電話相隔唔會少過一個月，幫你每一個人，同我傾六個月，兩個人就一年。」
「淨係傾電話？！」
「哈哈，無錯，你唔好以為簡單，我幾時打電話俾你，你就要即時接聽，哈哈！」
老闆話佢大約一個月俾一次電話，為期十二個月。
