第三十一章 (裝修佬呀 Sam – 2/4 卷)【Mandy 執筆】
我跟埋條裝修佬架貨 Van 車落到去西貢市, 我帶住佢四圍去揀住電視, 咦, 呢間無嘅, 睇吓另一間先, 都係無, 再去睇過另一間, 條裝修佬就係咁跟住我尾, 終於, 哈哈, 有嘞, 我指住部電視同個裝修佬講, 「我要買呢部!」
條裝修佬見到我揀果部電視, 即時好大反應咁大嗌住, 「吓, 55 吋, 妳無野呀, 呀小姐, 即係咁, 妳爛左果部機似乎….好似無呢部咁大個播!」
我撓住對手淡淡然咁同佢講, 「呀哥仔, 你知唔知我部機買果陣, 個價係仲貴過而家呢部 55 吋架, 哦, 咁如果你唔買呢部嘅, 咁就不如照番我張單價黎賠錢比我嘞!」
咁係吖嗎, 我無講錯到喎, 條死佬而家覺得買又死, 唔買就仲死得更慘, 見佢響度發住晦氣咁同個 sales 講, 「唔該簽卡, 自取, 吓, 問我要咩贈品? (好大聲) 我咩柒贈品都唔撚要呀, 同我即刻入倉托部機出黎比我而家就要攞走呀!」
部機攞左出黎, 條友簽完卡後就真係咁舉住部機就行左出去, 嘩, 部機居然朗響個膊頭度就咁單手扶住黎搬, 使唔使咁型仔呀, 我跟住佢尾, 已經行到佢部貨 van 度, 擺左部機上車尾後, 跟住我地就開車向住我屋企嘅方向駛去。
入到屋後, 咦, 幅牆原來已經砌番好囉, 不過就仲未曾批盪同油油, 條裝修佬開始幫我將部電視拆箱朗起同 set 台, 我坐響梳化度, 正望住佢係咁不停地攪機。
而家度氣好似開始有的下左咁, 其實講真, 呢條裝修佬又真係有的幾型嘅, 睇佢對手瓜起哂輾咁, 的肌肉又好似鋼條咁硬, 嘩, 最正仲係佢的胸肌同腹肌, 簡直同張家輝張上次果張大隻佬 style 相有得揮咁添呀, 不過, 就梗係張家輝型的啦。
唔使一陣, 「得嘞, 個電視就 set好哂台, 其他嘅野就等聽日先再黎同妳攪掂埋佢!」 咁 cool 架, 人地都未曾望夠你, 但突然我諗起左一的野, 「呀哥仔, 喂, 你過一過黎先啦!」 條裝修佬突然有的目露兇光咁, 見佢正充滿住殺氣想打人咁行緊埋黎, 「你仲想點樣呀!」
「呀…哥仔, 你唔好咁惡住啦, 我只係想問吓, 如果我係買左家居保嘅, 咁我係咪可以自己 claim 番個家居保咁就得架嘞?」
條裝修佬聽到咁, 即時搖住頭咁先有番的歡容, 「係呀, 小姐, 你早的出聲同我商量, 等我幫妳整張靚仔報價單去 claim 咪得囉!」「咁人地而家先諗起吖嗎, 做咩咁惡同人講野喎!」
見架電視攪掂左, 姑碌, 姑碌, 哦, 肚餓添, 我望吓隻錶, 咩已經成六點幾架嗱, 「哥仔呀, 我….有的肚餓, 咁啦, 見你今日買左部電視比我, 而且又攪到身水身汗咁, 不如我就請番你去食飯, 而你就記住幫我整張報價單比我去 claim 保險啦, 好唔好呀?」
同裝修佬再上左車後, 我地就再向住西貢市出發, 個裝修佬問我, 「係呢小姐, 到而家我都唔知點稱呼妳至好, 我叫呀 Sam!」 我瞄左佢一眼, 跟住再點左支煙後, 「Jenny!」
我地去全記食左飯後, 肚飽之後跟住再同個裝修佬響街頭漫步多一陣, 條裝修佬好似趕住要收工咁, 係咁催我問我到底走唔走, 如果唔走佢就要自己走先, 麻鬼煩, 唉, 走嘞, 走嘞, 的男人硬係永遠都咁多多聲氣咁嘅。
我又跟住佢車咁番到屋企, 食飽飽好似有的腳仔軟咁, 落車果時差的就仆死我, 咦, 咁今晚仲出唔出去好呢? 定係….., 我望住呢條裝修佬, 「喂, Sam 哥, 你可唔可以入一入黎先, 我想問吓到底你聽日會同我整番的咩野咁呢?」
(待續)