簡東拿

前言

小弟加入左discuss呢個大家庭兩年了,平時都係做cd-rom,偶爾回應下巴打嘅pos
t,現在先出處男作,認真慚愧. 近兩年我都冇出去玩,皆因家有賢妻,佢睇得我好實,搞到要經常都推掉朋友d活動.下個禮拜又有活動啦,但都唔知點去,還請巴打們教路.冇得去玩=冇報告出.唉…..慘.唯有寫番個舊故仔.
今日睇到阿95849727兄寫佢喺台北落LUXY嘅經歷,忽然勾起我六年前去台北的回憶.既然冇新報告出,就講下陳年舊事,希望各位大大不要介意.
小弟才疏學淺,文筆拙劣,還請各位師兄多多包涵.
廢話講左一大堆,入正題啦!

第一章     一條友落KISS

果年係千禧年嘅夏天,我同一個老死去台北玩,果時係跟團去.四日嘅行程好快就到第三日啦,果時年少氣盛,成日落D落P.香港玩唔夠,去台北都想見識下當地嘅夜生活,無奈我個fd又唔鍾意落P,咁唯有第三天嘅晚上自己一個人去啦.我個fd都得架啦,自己一個人跟班團友去華西街,好!你唔去咁冇義氣我一個人照去,因為第四日係free day自由活動,今晚玩通頂都得啦.咁晚飯後10點左右一個人就打的殺去東泰賓館的KISS啦.
點解我知道台北有間超級大場KISS?我去之前做左d功課嘛.我問過icq d台灣妹,佢地都話KISS好.我果時非常喜歡玩icq,除左主力“認識”港女之外,台灣妹亦係主要認識對象,都唔知add過幾多台灣妹,當然傾得埋嘅唔多啦,得十幾個左右啦.感覺上台灣女仔比較友善,見識亦比較廣.雖然台灣人屬福建種,但我感覺台灣女仔倒像江浙一帶的姑娘,吳儂軟語,溫柔婉約.佢地嗲起黎一點不比上海妹遜色.加之佢地時代感更強,真係少d定力即沉!
又講左一堆題外話,言歸正傳先.
去到KISS後,真係嘩一聲.超高樓底,有兩層,中間打通 ,上面係全bar檯加房,下面除左bar檯加房外,仲有一個半圓型舞池+一個好大的stage.當時有隊外藉樂隊唱緊“I am horny”.去過深圳大富豪的巴打應該想像到大概係咩格局.入到去我發覺有d唔對路,感覺上KISS似bar多d,而且都幾光,又唔見DJ打d電子音樂,心諗中招了.算啦,俾左500元新台幣,點都企陣啦.當時就迫入人群中,玩natural high.後來我試下問身邊d人邊度有野攞,佢地話呢度冇架,要嘅出出面d“店子”買.咩叫“店子”?遲d解話俾大家知.

p.s:小弟原本講過寫我同我宜家個女友嘅故仔嘅,但諗諗下都係將篇野暫時擱置先,因為如果寫出黎會傷害左佢.我覺得我宜家同佢仲喺埋一齊,寫出黎數佢嘅不是,會好傷害佢.畢竟佢係我呢一生(我指到現在)最愛嘅人.愛一個人就要包容佢,冇謂攞出黎講傷害佢啦,係咪?如果第日有咩新發展,我又覺得啱timing的,小弟一定會講我地的故事的.畢竟我同佢都經歷好多野,好辛苦先可以喺埋一齊,當中都幾戲劇性的.anyway,緣份嘅野,Let it be啦.

下集預告:遇上翻版蔡依琳

索引:

第一集     一條友落KISS  (P.1)
號外                                (P.2)
第二集     失望而回          (P.3)
第三集     網吧釣女          (P.3)
第四集     我約她去西門町(P.3)
第五集     苦等                 (P.4)
第六集     驚見翻版蔡依林!(P.4)
第七集     殺出程咬金???   (P.5)
號外 2                               (P.6)
第八集     她約我影貼紙相  (P.6)
第九集     非常震驚            (P.6)
第十集     一影定情            (P.7)
第十一集 情留半天             (P.8)
第十二集 送行                    (P.9)
第十三集 離別 【大結局】 (P.11)
後記                                  (P.11)

[ 本帖最後由 簡東拿 於 2006-4-28 04:12 PM 編輯 ]

簡東拿

寫到手都軟,宜家又要睇波,今晚唔使訓啦.
聽日都唔知點返工.....

簡東拿

首先多謝咁多位師兄支持先.其實小弟對台北嘅夜遊“生態”絕對唔熟,上年第二度去台北都冇落當地disco和party見識.一黎我個fd唔落,二黎可能我已經老啦.
至於我對台北夜遊嘅知識,只屬皮毛中皮毛,希望各個有經驗的巴打,不吝指正一下小弟,小弟絕不敢喺師兄們面前班門弄斧,濫竽充數.
再次重申一下:小弟呢個故仔係六年前嘅,十年人事幾番新,對於夜生活而言,幾年已經幾番新啦.宜家台北夜場係咪仲係咁樣子?小弟真係唔知.都係果句:希望各個有經驗的巴打,不吝指正一下小弟.謝謝.
先簡單講下台北嘅disco生態.台北的disco有分大場及細場.大場通常依附喺高級飯店,或消費高嘅地區,好似101果邊.當然東區,我指忠孝敦化果邊都有好多啦.果d場消費高,好多明星模特兒都會去.好似KISS、LUXY咁.如果要分,我覺得係屬於party場.入到去唔好期望會好似大陸cyber,夜貓或者838咁,人地打嘅係電子音樂,多屬hip-hop、drum’n 'bass、break beat,比較美式feel.果d場外人係好難買到“野”嘅,而且take野嘅人亦唔多.如果你係搖頭一族,去細場啦!細場台灣人稱“搖頭場”,故名思義,請君對號入座.
問題係,作為遊客嘅我地,點去呢d搖頭場呀?sorry,你可以問下的士司機.唔好媽我呀,的士司機係遊客嘅好朋友黎架,全世界都一樣架啦,攞料首選向的士司機埋手,當然緊有機會中招啦.點解台北嘅搖頭場咁難去?因為佢地d位置非常偏僻,又散落在台北市各處,唔係識途老馬根本好難搵到,而佢地係以地下形式生存的.入到細場要搵果d野就easy過easy啦.d燈頭會主動向你兜售,當然遊客難免俾人劏架啦.裡面非常烏煙瘴氣,龍蛇混雜.類此香港以前“三樓” “四樓”“夜蒲點”果d,作為遊客嘅我地,我實在唔建議大家去呢d地方.人在異鄉,一切以安全為上,都係去番大場玩算啦.
你可能話,我冇野take唔得架喎.咁唯有去幫襯“小店”啦.
所謂嘅“小店”,即係販賣“果d野”嘅鋪頭. 佢地表面上係一間買汽水、小食、香口胶嘅士多,實情係掛羊頭賣狗肉,真正嘅經濟命脈係賣果d野架! “小店”嘅位置雖然唔偏僻,問題係佢地唔會位於搖頭場嘅附近,如果冇熟人帶,外人根本唔知邊間係.台北N咁多間士多,你點問得晒呀?果次我落KISS,有個女仔教我點去,果時小弟的國語比宜家仲差,聽佢講得咁複雜,最後都取消左個念頭.如果大家去台北真係要買嘅,據聞有d的士司機同果d“小店”係掛勾的.真定假我真係唔知,我都係聽果個靚女講咋.
亦因為果晚我冇爆到,後來先識到個翻版蔡依琳.
唔好意思各位,講左咁多題外話,下集先講正文.

簡東拿

引用:

原帖由 htl 於 2006-3-30 08:04 PM 發表
哇, 又一篇長篇連載...

嘻嘻......唔係長篇連載黎架,個故事好短架咋,仲有一至兩集度咋.

簡東拿

引用:

原帖由 左冷禪2002 於 2006-3-30 10:49 PM 發表
C兄....你係遇上三沙蔡依琳 先真

下?甚麼三沙蔡依琳呀?
我寫寫下發覺可能需要寫多幾集.現在努力裝作中.....

簡東拿

第二章     失望而回

上集講到我落左KISS後,搵唔到野,就玩natural high啦.果陣年少氣盛,個心成日諗住take野,就問隔離跳緊嘅美眉,台灣女仔真係好有禮貌,我d國語講成咁佢都好用心聽,佢話呢度係冇嘅.之後佢講我聽點去買,可惜小弟當年國語水平奇差,聽唔明,最後都冇去到.跳左陣,呆左陣,好快就到三點打烊嘅時候,小弟就隨住其他人一齊走啦.當我打的到一樂園附近行番酒店途中,竟然俾警察抖.唉,香港都未試過俾差人抖,台灣竟然要獻出我嘅第一次.之後到酒店門口買左串串燒,正當準備番酒店之際,我突然抬頭一望,有一間網吧,名字叫做:戰略高手!

第三章     網吧釣女

2000年第一間登陸香港銅鑼灣廣場二期的台資大型網吧-----戰略高手,正式打響左香港的網吧熱潮.此後香港的網吧如魚後春筍般開完一間又一間,至近年先式微.
當時我都唔多清楚網吧嘅概念係乜,只知道係一間提供電腦俾你上網的地方,好奇心加憤怒(白行一趟)驅使下,一於去貢下先.
上到去,我冇做member,就俾貴d去上網,裡面環境都幾大,有獨立包箱同普通座位之分,我選左間靠窗的包箱坐.費用幾平,好似係二三十元新台幣一個鐘.excactly幾多我真係唔記得了,只記得任飲果汁可樂.我當時冇玩online game(我宜家都唔識玩啦,老人家邊識呢d高科技野呀!),只玩icq.一開icq,可能太夜啦(凌晨四點),都冇咩傾得埋嘅netfriends online,忽發奇想,不如試下釣台北icq妹!
我即刻開左個新acc,又開始煩個nickname叫咩,um…..,我宜家喺西門町嘅網吧,不如就叫“香港人在西門町”啦!果時都唔知諗乜嘅,咁柒嘅名都諗到.不過我當時人如名,add個個美眉我都單刀直入同佢講:
“可以當我的導遊嘛?我現在在西門町,明天要回去了,我一個人人生路不熟…..”
結果,當然都係食檸檬啦.台灣妹都幾得意,佢地唔似香港女仔咁串,又唔似大陸女仔咁易釣,佢地唔會一野拒絕你,不過會帶你遊花園.有個icq妹叫我下晝去西門町一間樓上理髮店等,一齊去理髮喎,我諗你都short嘅.如是者一直add…一直釣…釣左都不知幾多個,慢慢,窗外透出陽光,原來已經清晨六點了.
我都知咁樣係唔work架啦,正準備打道回府之際,就係呢個時候,我add左個女仔,住喺台北.
佢就係今次個女主角,佢叫做Niki.

下集預告:我約她遊西門町

[ 本帖最後由 簡東拿 於 2006-4-1 02:05 AM 編輯 ]

簡東拿

講故仔之前講d題外話先.台灣尤其台北係港人三大外遊熱點之一,唔少巴打都有去過,甚至去過好多次添.台灣人屬閩南人種,講國語有閩南語音,但台灣妹卻似江浙姑娘,說話時不像福建人粗聲粗氣,而是如蘇杭姑娘般吳儂軟語;樣貌不像福建人般方臉、細眼、權骨高,而是大眼、爪子臉.唯一相同嘅就係大家都好白.我相信唔少巴打對台灣妹都有種情意結,小弟絕對係其中一位啦

第四章     我約她去西門町

上集講到正當我冇晒心機,準備番歸酒店大覺訓之際,add到一個叫Niki(化名)嘅女仔,家住台北.我因為眼訓(天都光啦),就單刀直入咁問佢,心諗如果佢再帶我遊花園,我即off 9走人.
“我今天要回去了,你可不可以帶我去西門町玩呢?”我問.
“你是香港來的嗎?”她問.
“嗯,我暱稱上寫了.”我答.
“可以啊,反正我下午要到西門町辦點事.”她說.(後來知道她要去探舊同事)
人生就係咁樣架啦,有好多野唔係預料之內的.add左幾十個,全部食檸檬,準備走人之際,又會遇到佢.講真我一早眼訓想走架啦,如果我早走一分鐘,今日就冇故仔講啦.
“那你甚麼時候有空?”我問.
“下午吧.”她答.
“好啊,可是我只認識一樂園”我說.(緊係老虎都一樂園啦,雖然我都熟熟地西門町,但話晒遊客,咪搞咁多野)
“一樂園嗎?我知道在那裡,好啊.下午兩點可以嗎?中午的大陽讓人受不了…..”
下?兩點同十二點有分別咩?咪一樣烈日當空.我仲想你帶我食野架嘛.不過無計啦,你咁講到.我一口答應.佢又問我識唔識國語,我緊話識啦.之後佢竟然想同我傾電話!佢呢招真高!問題係,我部手機冇晒電啦,點打呢?佢諗到用網吧個電話打.戰略高手裡面d包箱同普通座位都有獨立電話的,Niki是清楚知道的.
我就同counter個服務員講我係咩number座位,要打電話.Niki教我點打過去,我打過去後,一把好甜嘅女聲接:
“喂”她說
“喂,聽到了嗎?”我說
“聽到了,下午兩點可以嗎?”她說
“好啊,在一樂園門口等可以嗎?西門町我不熟…..”
“好啊,#$%!!@**((()”她說.(下刪數十字)
#$%!!@**((()唔係佢講粗口,係我根本聽唔明佢講乜,果時我知大檸樂啦,一陣間肯定雞同鴨講.
約好時間地點,返酒店.一入到去,我個fd訓到死豬咁,我沖涼準備訓覺.我一邊沖,一邊諗對方係咩樣.經驗話俾我知,聲甜嘅女仔,人通常醜.仲有,靚女一般好難約,chat唔夠幾句,一約即出就99% 係豬扒黎.佢聲又甜,又一約即出,咁咪…..
我心頭一涼.....

[ 本帖最後由 簡東拿 於 2006-4-1 03:06 AM 編輯 ]

簡東拿

打鐵趁熱,小弟明晚又要北上,拿拿臨寫埋個故仔先~~

第五章     苦等

上集講到我約好Niki下晝晌一樂園等,番酒店洗白白準備恰陣,我洗完白白之後,個人突然醒晒,我個fd亦喺呢個時侯醒左啦.
“尋晚去左邊呀你?”我個fd半夢半醒咁問.
“冇呀,跳舞囉.”我漫不經心咁答.
“嘩,玩到宜家先番呀?”佢一野跳落床.走去洗手間洗面刷牙
“話你知呀,我尋晚同果兩個女仔一齊去華西街食野呀,嘻嘻…..”
我先解釋下,果時我地果團係老人團,全部都係uncle、auntie,一家大小咁,只有兩個後生女,兩個都係F.7畢業,聽佢地講準備升讀中大中文系同浸大歷史系.其中一個都幾靚架．
“喂,做咩唔問我有冇下文呀?”佢見我冇反應,便追問.
“你叻啦,不過你老闆我仲叻呀,你知唔知我尋晚落D溝左邊個呀?”
“台灣妹?”佢問.
“廢話!學你咩?黎台灣溝香港妹!緊係台灣美眉啦,孫燕姿呀!傻仔!”
好記性嘅巴打應該記得,2000年7月中孫燕姿舉行過mini contert曾經俾一個神經佬槍擊,不過冇傷到孫燕姿.我第一日到台北時夜晚睇新聞知道.果時孫燕姿啱啱出道.
我講完之後就走出門口,番戰略高手啦.我當時都唔知嬲乜,只係唔想同我個fd講野.
“喂,老簡,去邊呀?我留番件俾你架…..”我個fd見我突然走人,好錯愕咁嗌我.
我心諗:乜X野俾我呀?你估你皇帝呀,你俾件妾仕我呀?你溝到人地啦咩?唔係同你咁多年朋友,我一早媽爆你啦!
我彭一聲關門,去番戰略高手.
去到已經冇包箱坐,唯有坐普通座位.我繼續用“香港人在西門町”去釣台灣icq美眉,因為驚Niki放飛機,搵定後備先.
結果係…..又食左兩打檸檬.
時間好快到下晝十二點啦,我先番酒店,個死仔一早唔知死左去邊,我就離開一樂園,行下西門町.小弟認路一般般,不過呢幾日行西門町行太多了,都知道個格局係點.西門町初去係幾易迷路,不過行多幾次一定識行,只要認住d大型地標,好似KFC,Starbuck呀咁,基本上半日即可成識途老馬.
我食完KFC,就番一樂園門口,時間係1:45pm.
我一邊等,一邊留意d白色背心、粉紅裙的女孩子,因為佢話佢會咁著.由於我手機冇電,我只可以用最原始的方法-----企喺度等.
“阿簡,等邊個呀你?”突然,一把女聲叫我.原來係果兩個後生女.我個fd Peter(化名)喺佢地身邊.
“一齊去西門町呀.係呢,你做乜消失左成晚架?”其中一個女仔講.
“冇呀,我覺得熱,出黎吹下風之嘛…..”我說.
“下?去商場咪仲好,有冷氣”另一個女仔笑說.
“其實我等緊郵差送信…..”我開始語無論次,只想佢地三條友快d消失,快d走啦你地…..
Peter隨後就拉左果兩個女仔走,話晒咁多年老友,佢當然識做.佢知道我等緊人,只不過佢誤會條女係落D識嘅.六年後嘅今日,佢都仲未知個真相.
一邊等一邊估邊個係佢原來係好過癮嘅,有玩過icq嘅巴打一定知道.宜家玩QQ就話可以事先視頻對辦啫,果陣icq邊有架.我一邊等一邊估,白背心粉紅裙…..唔見嘅,一望錶,下?2:30pm架啦?!我突然有種不祥預兆,俾Niki放飛機!
正當我準備打電話俾Niki時,身後一把女聲叫我:
“請問你係咪阿簡生呀?”

[ 本帖最後由 簡東拿 於 2006-4-1 02:08 AM 編輯 ]

簡東拿

引用:

原帖由 ivany 於 2006-3-31 07:45 PM 發表
又等到你的續集, 要push , 那個中大美女, 是否真的不錯

當年覺得唔錯囉,宜家對佢個樣的記憶都幾模糊,畢竟都咁多年啦.
中大出名多美女啦:smile_05:
師兄,乜你啱呀?:smile_04:

簡東拿

講左咁耐故仔,都未寫到Niki出現.小弟在文章結構舖排方面真係有d問題.
好!今集一於“的”佢出黎.

第六章       驚見翻版蔡依琳!

上集講到我晌一樂園門口等Niki,等左半個鐘,都未見人影,心諗中招,俾人放飛機添!突然身後一把女聲問我:“你係咪簡生呀?”
我一野轉身,準備講:“hello,Niki,你好,我係阿簡…..”
um?點解係一樂園嘅reception小姐黎架?乜Niki你係一樂園reception黎架???
“簡生,有一位小姐打電話給你,請到我們前台接電話好嗎?”reception姐姐說.
“好的,謝謝…..”我一個箭步跑到前台接電話
“不好意思啊,剛才有點事,我現在過來,你在一樂園等我是吧?”Niki說.
“哈哈,沒事.你好利害啊,你甚麼找到我的?”我當時真係服左佢.
“呵呵,你說你也是穿白衣,黑褲的吧.你說在一樂園門口等我.我晚了,所以我打到一樂園的前台去,看看你在不在嚕.”
Niki呀Niki,我真係服左你啦,你咁都得?我唔寫個“服”字俾你點對得住你呀.
“那我現在出門口,你等我嚕.”她說.
“好的.”我答.
如是者,我又再等,一邊等一邊估佢係咩樣,直覺話俾我知佢係唔靚嘅.你諗下,咁易約出黎,肯定靚極有限.而且經驗話我知,聲甜嘅女仔通常係恐龍.
我突然知道點解我剛才咁想Peter同果兩個女仔走啦,因為我驚萬一Niki係豬扒,我真係愧對鄉親父老,冇面返香港啦.
我開始諗Niki係咩樣,直覺話我知:佢好細粒,得5呎1、2吋高,好瘦,瘦到平胸果隻,皮膚白白淨啦.而且臉上有d暗瘡,不過應該唔係豬扒黎嘅,只是靚女又算不上.
就係咁,我心目中的Niki就大概勾畫左出黎啦.想著想著,一輛黃色的士停在我的面前.
一個女仔好快咁推開車門,向我笑笑.
佢…..呢個故事嘅女主角…Niki,終於出現了!

[ 本帖最後由 簡東拿 於 2006-4-1 02:10 AM 編輯 ]