簡東拿

引用:

原帖由 essoxesso 於 2006-4-6 01:26 AM 發表
簡SIR, 一共有幾多集架, 好心急想知結果

應該仲有幾集,就黎完架啦

簡東拿

講故仔之前,小弟又要例牌9 up兩句.我承認我係幾容易對靚女有好感嘅人.
你可能會話:廢話!係男人都對靚女有好感架啦,唔通你對豬扒有好感咩?
但小弟嘅意思係:我雖然容易有好感,但如果我覺得對方只係想同我做普通朋友,我係唔會追佢嘅.
你又可能會鬧我:挑!阿簡,你咩新鮮蘿蔔皮呀?要人地對你有好感先追人?!你睇下自己個衰款先啦!
唔好意思,就係因為我有自知之明,知道自己唔係咩新鮮蘿蔔皮,知道自己冇錢又樣衰,所以對靚女都係抱住“可遠觀而不可褻玩”的心態,將自己的愛慕之情收於心內.
當然,如果我feel到對方可能都對我有意思,那怕只有一絲空位,我都會見縫插針,一舉攻克對方嘅防線(我指感情防線呀).所以如果唔係Niki同我講咁多曖昧嘅說話,小弟就唔會心郁郁,唔會搞到由台北沉到番香港.

第十一集     情留半天

上集講到我同Niki影貼紙相,影完之後我地就去醫肚啦.
其實我地見面前我已經食左野架啦,Niki亦表示佢唔想食野,佢話冇胃口.咁逛街啦,我地逛過萬年大廈、西門新宿,由於我前兩日都行過啦,所以冇仔細咁行.當時行到萬年二樓一間賣精品的店子,Niki睇中左一個錦囊仔,大概百幾元新台幣,Niki駐足望左好耐,我知佢想要.
“好得意啊,喜歡嗎?”我問.
Niki搖搖頭: “我看看而已.”
呢個時候我就入去買左個錦囊仔俾Niki,雖然果時出黎社會工作冇耐,不過百幾元新台幣都有嘅.
“嘿,今天帶了個美眉過來嚕.”精品店老闊笑說.個老闊認得我,因為我尋日喺度買左個面包超人做手信.Niki聽到老闆咁講,面上泛起紅霞.我笑了笑,臨走時個老闊輕拍我膊頭,搞到我都幾尷尬.
行完商場Niki話好熱,佢又怕曬(通常d皮膚白晰嘅女仔都好怕曬),佢就提議去麥記坐下.我地就一直行去麥記啦,沿途我地有傾有講,突然Niki叫我睇下一間唱片舖門口的海報.
2000年台灣有兩顆耀眼的新星,到宜家就成為左獨當一面嘅小天后:一個係孫燕姿,另一個就係蔡依林.
當時蔡依林一出道被稱為學生情人(後來先叫少男殺手),我喺香港有見過佢嘅廣告,叫做有d印象.
“你看我像不像她?人家都說我像蔡依林.”Niki有d靦腆的說.
我先望下海報,再望下Niki,原本我覺得佢有d似林心如,但現在睇真d,又真係好似Jolin喎.
“像呀,真的好像啊!”我說.
“呵呵,真的嗎?”Niki笑說.
係呢度我想講下當時個情景.我由同Niki見面到宜家,睇得最耐Niki個樣就係喺唱片舖門口啦.Niki笑得最長時間亦係果陣時,佢果時嘅表情我諗我一世都唔會忘記.佢絕對唔係我見過最靚嘅女仔,但係佢笑容真係好特別:原本圓杏嘅大眼睛,笑的時候便瞇成新月形,水汪汪的,加上皓白嘅牙齒,再配上如風鈴般的笑聲…..當時我真的呆了.
良久,才定過神來.
“你的聲音好甜啊.”我說.
“真的嗎?”Niki笑說. 「真的嗎?」三個字係Niki用得最多的用字.
“我是XX百貨的播音員,經理都叫我多點說話,說我的聲音好聽.”Niki說

下集預告     送行

簡東拿

引用:

原帖由 天使煌101 於 2006-4-6 05:44 PM 發表

我承認我係幾容易對靚女有好感
我雖然容易有好感,但如果我覺得對方只係想同我做普通朋友,我係唔會追佢
因為我有自知之明,知道自己唔係咩新鮮蘿蔔皮,知道自己冇錢又樣衰 ...

嘻嘻,小弟成日俾朋友鬧我冇膽,不過我一向抱住呢個追女宗旨,可能我真係冇膽啦.
你上年新年有故事發生呀?同大家分享下啦.

簡東拿

好多人都鍾意某d影星、歌星,男人一般冇女仔咁瘋狂,相比歌星,可能男人更鍾意體育明星.但大家讀書時,難免都會留意一d女歌星、影星嘅新聞,買佢地嘅CD、VCD或者DVD.有人話男仔/男人細個時鍾意那一類型嘅女星,或多或少反影出佢喜歡的女性的類型.譬如我讀書時代最紅嘅周慧敏,楊采妮,就反影出當時流行純情玉女.而我就比較留意日本嘅瀨戶朝香,佢屬於高挑類型,樣貌比實際年齡成熟,既性感又嫵媚.的而且確,小弟一向喜歡嘅女仔都係屬於呢一類型,但當我遇到Niki之後,情況開始有d改變…..

第十二集     送行

蔡依林初出道嘅時候,係以純情玉女的姿態出現(到後來先加入性感元素).而Niki無論髮型、面型、眼睛、朱唇同身裁都好似蔡依林.如果真係要話佢地有邊度唔似嘅,我諗係氣質方面.當Niki唔笑果陣,個樣係有d妖妖地嘅.
Niki的眼稍向上彎,即是我們所說的鳳眼.當佢笑嘅時候,眼睛瞇成新月形,水汪汪的.但當佢唔笑的時候,樣子略帶妖媚.可能我用“妖”黎形容她好像不太好,但小弟才疏學淺,我真係唔識用別的詞語來形容她的氣質.
當我地去到麥記的時候,時間係4:30pm,即係大概仲有一個鐘頭.當我地搵到位坐好之後,突然有個女仔走過黎,遞張表俾Niki.又邊位呀?做咩咁多程咬金架?
原來係一間model agency嘅星探,張form係關於一d個人資料+問卷咁.當然我冇份填form啦,我咁嘅款,做丑角都唔得啦.我當時真係好想睇下Niki叫乜名,不過基於禮貌原則,我都忍住冇睇.
“你來台灣幾天了,覺得好玩嗎?”Niki嘅吳儂軟語,真令人懷疑佢父母係唔係上海人.
“原來覺得不太好玩,可今天遇上你,我就不枉之行了.”我說.呢句說話一半氹佢,一半係真嘅.梗係啦,成團老人家,雖然有兩個女學生,但都唔啱嘴型,再加埋Peter呢個悶蛋,好玩條毛咩.
“真的嗎?”Niki笑得更燦爛了. “你喜歡台灣女生嗎?”我估唔到佢會咁問我,就冇厘頭答佢:“這幾天我看過最漂亮的女生就是你了,真的.”
當時我都唔知點解會咁答,真係冇厘頭,當我未講完已經知衰啦.
“真的嗎?哈哈…..”都話台灣女仔nice啦,Niki用笑黎回應我. “你甚麼時候再來台北啊?你下次過來,我用摩托車帶你去逛台北.”
台灣人講嘅摩托車,即係綿羊仔,好多後生仔甚至學生哥都有一部.指定綿羊look:頭盔加圖案口罩,喺台北鬧市穿梭,蔚為奇景.
“明年我再來找你好不好?你到香港玩,我來當你導遊.”我說.
“那說定了啊.我明年到香港玩,你要當我的導遊啊.”Niki好開心的說.
就係咁,我地就相約在香港.
時間好快就到差不多五點半啦,Niki話送我返酒店,同我送行,咁我地就行番酒店.
回去途中,Niki有電話入,佢似乎唔係好方便,企埋一邊講電話.

下集預告     離別

簡東拿

引用:

原帖由 essoxesso 於 2006-4-8 01:43 AM 發表
最後你有冇同niki 發展兩地情??

嘻嘻,第十三集大結局會講架啦.

[ 本帖最後由 簡東拿 於 2006-4-8 02:18 AM 編輯 ]

簡東拿

真係一萬個唔好意思,前幾日工作忙到pk,啱啱今晚先返落香港,所以大結局宜家先出,梳利梳利.
先回應下kissmliner同真巴司兄的留言.正如兩位師兄所講,人愈大經歷愈多,真係純真不再.我果時約Niki出黎真係純粹想識個朋友,想搵個當地人做導遊.至於後來沉左Niki條船,皆因英雄難過美人關,更何況我唔係英雄.如果時光倒流六年,我再經歷相同嘅事,我未必會咁容易沉,至少我會諗多好多野.亦因為經歷多左(主要係北上嘅經歷),我性格變得多疑,使我現在同我女友的感情出現問題.
如果要我為呢篇故仔起一個名,我諗“情留半天”會幾啱.我同Niki從見面到佢送我走,不過係三個鐘左右嘅事,而我地嘅故事,亦隨住我返香港而結束了.

第十三集     離別     【大結局】

上集講到Niki送我返酒店,途中佢有電話入,她似乎唔係好方便,企左埋一邊打.人總係有直覺的,從Niki傾電話時嘅笑容,從佢開朗嘅笑聲裡面我聽得出,電話中人係男人,而且關係匪淺.
“好煩耶!”Niki一邊說,一邊笑.
“是男生吧?”我裝作若無其事咁試探佢..
“嗯”Niki走向我身邊細細聲講: “是一個追求我的男生.”
突然,又一個電話,Niki再次走開傾.後來她走過黎同我講,係佢一個普通的男性朋友打黎.
咁短時間又有另一個男人打黎,我聽到之後個心實晒.我突然之間醒左,發覺之前嘅感覺好似好虛咁.我知道果兩個男人唔係佢男友就係追她的人.我突然醒覺到,我同佢根本就冇可能,除左佢條件唔錯之外,仲有係我地分隔兩岸,要維繫係非常難的事.
“那個男生是我以前的同事,好煩的,常常打電話來.”她笑說.睇你個樣咁幸福,唔似覺得人地煩喎.
同佢返酒店嘅途中,雖然大家都有講有笑,但氣氛已經唔同左,我總係覺得有d怪怪地咁,期間講d咩我唔記得了,因為我有d心不在焉.
好快就到左一樂園了,一入到lobby就見到成班團友集合喺度,準備坐旅遊巴去機場.
“去左邊呀死仔?我仲以為你要stay喺台灣添.”Peter走過黎講.
“冇呀,同個朋友行街之嘛,仲有十幾分鐘先上車啦.”我說.
我都未講完,Peter條友仔就走向Niki身邊say hello: “hi,我叫Peter,是阿簡的老友.”
阿Peter哥,你摺埋啦,叫你落D你又唔落,走去溝學生妹.宜家見到個台灣妹你又走埋黎say hi,衰唔衰d呀你.
Niki亦禮貌地同Peter打招呼,此時我望一望遠處,果兩個學生妹望住我地呢邊,兩個人係度咬耳仔.我又本能地望下四周團友,發現唔少團友都望過黎我地呢邊.呢個時候,唔知點解我覺得好尷尬,有d後悔讓Niki送行.
“同你兩個影相呀.”Peter說.識你咁多年,最識做今次啦.
之後,Peter又提議影合照,咁佢就叫領隊幫我地三個影啦.
影完相之後,Peter好識做咁行番果兩個學生妹身邊.我同Niki說:
“你不是說去探望你的舊同事嗎?你去吧,我也快走了.”
“我待你上車才走吧,你快要回香港去了,你會想念我嗎?”Niki說.
“我會想你的,一定會.”我突然覺得個心拿住拿住.
“你有筆嗎?我把我家的地址、電話和電郵都給你”Niki說.
“好的.”我從bag入面攞左支筆出來,但冇紙,點搞呢?突然我記起尋晚我喺戰略高手度攞左張咭片,我就從銀包裡面攞俾Niki.
Niki將佢個名、生日日期、icq號碼、地址、電話和電郵一併寫喺張咭度.無巧不成話,Niki同Jolin一樣,都係姓蔡的.
呢個時候領隊叫我地上旅遊巴啦,我上左旅遊巴之後,Niki亦離開了.
當我從窗外望住Niki嘅背影,佢愈走愈遠,背影愈來愈小,我有種若有所失的感覺.當時的情景,當時嘅感覺,我諗我呢一世都記得.
當去到候機室嘅時候,我成個人攤坐晌張椅度,我覺得好累,唔係個人累,而係個心好累.我望住候機室窗外的飛機,我好想快d離開台北,忘記今日發生的事,忘記Niki,忘記台北…..
“阿簡,都唔知果兩條女搞乜!今日下晝仲好好地,但現在突然對我好冷淡!”Peter仔有點茫然地走到我身邊說.
“你話咩事呢?我冇講錯野呀,係咪死仔你喺她們面前講我壞話呀?”Peter滔滔不絕地煩我.
我原本已經唔睬佢架啦,我攤左喺度諗緊Niki d野,不過條死仔竟然懷疑我篤背脊,我就答佢:
“你係咪有病呀?我成日都冇同佢地講過野,我得閒講你壞話!”我真係有d慶. “你知唔知點解人地突然對你冷淡?”
“點解呀?”Peter仔好心急咁問.
“因為人地當你T.P咋,傻仔!”我答.
“咩話?你話佢地係TB?” (Tom Boy的簡稱,即Lesbians.Tom Boy一般指作男性化打扮的女同性戀者)Peter有點驚訝地問,仲一邊問一邊望向果兩個學生妹.
p.s: T.P係我作出黎嘅名詞,全寫係Travel Partner,即係旅途伴侶,其實用Journey Partner會更貼切.Journey Partner係指果d在長途旅行中因為寂寞,就搵個啱傾嘅團友做伴侶,甚至會演變成旅途中的情人,同對方發生關係.但一切會隨著旅行嘅結束而結束.呢種Journey Partner的關係,不一定局限於男女兩人,更多見於係一班人.有時候跟團去旅行,如果個團都係年輕人居多,好容易大家就會join埋一切玩,但隨著旅行結束,大家的關係也告一段落,此為之Journey Partner(or Travel Partner).
我專登講成T.P的,等Peter自己煩下都好,鬼叫佢咁低b咩.
好不容易才等到上機,上機後我靠窗坐,我將窗擋拉下,我唔想睇到窗外的景物,以免觸景傷情.
當飛機起飛果刻,我忍不住拉開睇睇,地面上的建築物慢慢地變小了,飛機徐徐向上升,我的心卻一直往下沉…..
我再次把窗擋拉下,身體軟無力的坐在椅子上,Peter因為冇行,也同我一樣,攤屍咁攤左晌張椅上.兩個失落的男人,一同結束奇妙而短暫的台北之旅
現在偶爾都會回想六年前跟Niki見面的事情,Niki甜美的笑容,吳儂軟語的說話方式,如風鈴般的笑聲,一直默默地藏在我的心裡.

(完)

[ 本帖最後由 簡東拿 於 2006-4-13 01:16 AM 編輯 ]

簡東拿

後記

小弟寫呢篇故事係因為睇到95849727兄果篇台北LUXY遊記,勾起我六年前晌台北旅遊時嘅經歷,就寫出黎同大家分享下.回憶總是美好的,猶記得六年前係我咁大個仔最放縱的日子,果陣個個禮拜落D或落P,都唔知自己做緊乜,總之“去蒲大過天”.果時咩都唔緊要,最緊要有得落D落P!落到去當然會take野同界女啦,呢兩樣野係我果時去玩嘅主要推動力,現在回想起來,那時生活頗為靡爛.
只要睇我跟團去台灣都要搵時間落夜店,就知我中毒幾深了.當時仲有另一樣嗜好,就係玩icq.去到台北都要date條女出黎見面,好彩遇到件外形唔錯的Niki,如果不幸約左條恐龍出來,我真係冇面番香港見鄉親父老了.
其實個故事仲未完晒嘅,我番香港同Niki保持過短暫時間的聯絡(icq和電話),亦寄過生日禮物俾佢(Niki在我回香港不久後生日),不過彼此的關係都是止於此.Niki曾經講過佢會同一個女性朋友喺第二年(2001年)到香港玩,要我做導遊,後來果然佢有打電話俾我,時間係01年的7月,剛好相隔一年.佢打電話來話佢一個禮拜後到香港,問我可唔可以帶佢去玩,我搵個借口就推左佢,至此之後就冇再同佢聯絡,亦冇見佢再上icq了.
我知道Niki嬲左我,覺得我“忘恩負義”.
有人可能覺得我好唔識做人,我去台灣搵Niki做導遊,人地好大方咁應承出來;人地來香港玩,我竟然藉口話忙陪唔到佢.可能你地覺得我好小氣.事後我諗番,我當年咁做的確唔啱,工作忙其實只係借口,我唔想見佢主要係我唔想再難過多一次.我知道如果我再見到她的話,會將我幾乎已痊癒的傷口再挖破,當然你問我現在Niki再約我出黎我會唔會出?老虎蟹都出啦,請假出添呀!
呢篇故事的標題係『台北旅行奇遇記』,我唔叫做『台北旅行沉船記』的原因係因為我都冇沉船.我覺得有d人濫用左『沉船』二字,雖然每人對沉船的定義都有些許不同,但沉船最起碼的條件須在『該段感情已經開展』的基礎上,我雖然有諗過同Niki發展,但最後都打消了呢個念頭.
由於我呢排工作比較忙,又趕住寫故仔,所以想喺呢度reply下巴打們之前的回應.有巴打覺得我冇追Niki有d可惜,亦有巴打認為我選擇唔去馬係正確的決定.我後來同朋友講番呢件事,亦係意見紛陳,試過俾朋友話我冇膽,未試過點知唔得云云.不過正如kissmeliner兄所講: “一個美麗的人…一向都很嚮往被別人追求的感覺…當我自己遇到這景地的時候…我會問自己…你花得起時間嗎？…你是否有一個胸襟廣闊的心嗎？…還有你願意接受她花心嗎？…”,kissmeliner兄真是一針見血.我和Niki短短相處的三個鐘裡面,已經兩個男人打俾佢. Niki的條件唔差,點會冇男仔追呢?係咪?撇開這個不談,光是分隔兩岸,已經好難維繫彼此的感情,宜家我同我女友港深相隔都好辛苦,維繫得好吃力,成日上上落落又互相猜疑,咁近且過關咁方便快捷尚且如此,我同Niki更不用說了.
不過這只是我個人的追女原則,不同的人有不同的想法和做法,可能我真係錯過了一段情緣,但小弟覺得把這件事當作青春的回憶更適合我.
最後我想多謝幾個人,首先係湯馬士版主同車仔版主將我篇故仔列為精華, 承蒙版主的錯愛,小弟想遲d再寫多篇我和一個QQ女的故事,希望各巴打能多多支持.另外要多謝95849727兄,因為睇左你篇LUXY遊記,勾起我多年前往事的回憶,後來先寫成呢個故事.仲有leztius兄, 提醒我加番個索引喺page 1.最後緊係要多謝咁多位睇過我篇故事的師兄們,俾左好多支持同回應我.
再次講句:ｔｈａｎｋ　ｙｏｕ　ｓｏ　ｍｕｃｈ ~~