(01) 小說寫作訓練班
暑夏黃昏，宿舍外嘅草地熱氣開始消退，我一個人嘬住包維記少甜朱古力奶，不自覺仰視住宿舍十米外一棵櫻花樹上嘅樹枝，憑空研究得入神。 正常嚟講，櫻花初春嗰陣乜都開乾開淨喇，無理由到八、九月，仲掛住一片粉紅，令人幾乎以為春天遲來，啱啱至到。 我又呷一啖朱古力奶，心諗：無計啦，呢處「荒山野嶺」，唔通，真係聽我room mate話，走出去「食碗糖水先」咩？行個方便嘅嘢，我都慣晒，識趣速閃，响附近遊盪一陣間咪返去囉。 正當我响度發吽哣思緒亂飛時，個天忽然落起狗屎嚟，不雨則已，一雨傾盆，未跑到返宿舍Lobby，我就已經由頭濕到落腳趾尾。「唔，大半個鐘喇喎，應該差唔多喇，Jessie同佢條仔應該搞掂啦。」我拖住身上沉甸甸嘅背心短褲，行上三樓。
「吖⋯⋯好正呀，好正呀，唔好停，你今日好勁呀。」
「屌！唔好意思，打攪晒。」我本能地被一幕激情嚇到粗口都爆埋，即刻閂返道門；濕轆轆嘅透心涼意，瞬間俾一股向上衝嘅血燒炙蒸發咗大半。門嘅另一邊， Jessie同Joseph正在打得火熱，我歸心似箭盲舂舂開門，於是撞破好事，見一地凌亂衫褲，仲有床上Joseph哥嘅落力表現。 從Jessie咁姣嘅表情、肉緊嘅聲綫估計，Jo哥仔都準備嚟料喇。 人如其名，Joseph早洩，以往佢上親嚟「gathering」，都好快搞掂，唔會要我久等嘅，今晚可能有「壓力」，所以搞耐咗啦。
「喂，伊欣，唔好意思呀，⋯⋯咦，出面落雨嚟呀？你成身濕晒嘅？」
「你哋响入面都翻雲覆雨，梗唔知啦。 廢話少講，『巡府大人』就到，仲有，差唔多六點半，夠鐘喇，拿拿聲去『天機神算室』先。」
Jo哥同我哋揮手say bye之後，就箭步走先，以免被舍監捉到「超時探訪」；我匆匆抹過身、換過衫，就同Jessie一齊出發到圖書館電腦室打一學期一度嘅「硬仗」－「Reg科」。
。。。。。。。。。。。。。。。。
「祈求天父，做十分鐘好人，賜我他的吻，如憐憫罪人⋯⋯」
「天機神算室」內有絕望嘅學生合實雙手，昅實個mon，哼起「Reg科之歌」。 呢度係大學入面行得最快嘅電腦之集中地，大家都祈求add科成功，唔好死機，順順利利，新學期唔好「冇書讀」。 天文台時鐘現時顯示18:28，意味住最後兩分鐘倒數。我同Jessie都不期然緊張起嚟，因為今個學期我哋必須讀哩科必修科－「小說寫作入門 Introduction to Novel Writing」，而且今次仲有得揀跟邊個Professor。 今年初，學系破天荒聽取學生「民意」，請咗四位現職作家嚟做「小說科」嘅客席教授，分別教A、B、C、D四班，每班12人；仲有個E班，則由系內研究開古代文獻嘅北京佬「兼」教，當然前四班遠比E班搶手，換言之，所有reg唔到ABCD班嘅同學，就會被迫揀E班，然後就會一整個學期好似嫁錯郎咁，苦不堪言，難怪我哋而家都淆晒底。
「伊欣，你揀咗邊班呀？」
「嗱，D班教授，王可娜，著名言情小說女作家，擅寫青年流行文化，廣受一般大眾歡迎，傳聞每年書展都有麻甩佬向之當眾示愛求婚，絕對係本系宅男之選；C班教授，文滌生，以抵死幽默文風聞名，擅寫都市人心理，實驗「跨性書寫」，作品產量驚人，堪稱香港小說界之一代鬼才，包堂堂頂癮；B班教授，錢鈞發，小說界龍頭大阿哥，其小說系列，筆觸風趣，專以怪力亂神為題材，為不少讀者追捧；A班教授，馬光輝，嗯⋯⋯」講到呢度，我突然有啲口乾。
「馬光輝又點呢？」Jessie托住頭追問。
「馬光輝，要將佢點樣形容、定位至好呢？ 『聽聞』佢嘅小說作品，表面玩世不恭，實質上佢筆之所及、紙背之後，用情至深，即使係最嬉笑怒罵嘅文章亦有種迴腸蕩氣，完全唔需要奇淫技巧，吖唔係，奇技淫巧；佢嘅故事，係發乎赤子之心，自然咁瀉出⋯⋯筆尖嘅，真係深為風人雅致。」
「哈，我本來想上『文滌生』㗎，不過我想同你同班，我又揀返A先。」
。。。。。。。。。。。。。。。。
第一堂，班上嘅同學都好興奮咁期待一睹馬教授嘅風采，我⋯⋯當然都唔例外。 宿舍同課室喺正隔籬，我同Jessie唔使早起身都可以輕鬆準時到達－中間對正teacher's desk同白板嘅靚位就無晒喇，好在第一排窗口位仲未俾人霸咗去，我急急腳埋去坐低，又望出窗外棵奇怪嘅櫻花樹－或者準確啲講，係嗰枝奇怪嘅樹枝，喺度諗，點解朵櫻花咁任性嘅呢？⋯⋯ 我仲未為意到當時一團深藍色嘅影從遠而近咁接近我，愈行愈近，到我察覺嗰時已經响我「眼前」掠過－佢，响草地度一路向住窗口「行」入課室呀！
「Good morning, boys and girls! “An actor entering through the door, you’ve got nothing. But if he enters through the window, you’ve got a situation.” 今堂教你哋嘅第一樣嘢，奧地利出世嘅猶太裔美國導演Billy Wilder嘅名句：一個演員响門外行入嚟，咁樣一啲意思都無。但如果你畀佢响窗到擒入屋，咁就創造咗情境。 大家唔好誤會呢招係『出奇制勝』或者『譁眾取寵』，佢嘅精髓，全在於『故事』兩個字。」
課室內，馬教授「失驚無神」嘅出場，令大家目瞪口呆⋯⋯
|
