祝伊欣

引用:

原帖由 loyanpai303 於 2016-7-5 06:10 PM 發表


馬哥，對花之喜好又添一種喔！
暫棄 [菊]，而取〔桃〕乎？

Lo兄，見你對雲哥哥有「棄菊取桃」之疑，欣妹無禮，想插嘴兩句

宋代有位「愛蓮」嘅周先生寫文話過，晉陶淵明「獨愛菊」。 實情陶公又號「五柳先生」，好「採菊東籬下」；而同時佢亦早於其《桃花源記》揮筆抒情：「⋯⋯忽逢桃花林，夾岸數百步，中無雜樹，芳草鮮美，落英繽紛，漁人甚異之；復前行，欲窮其林。林盡水源，便得一山。山有小口，彷彿若有光，便捨船，從口入。  初極狹，纔通人；復行數十步，豁然開朗。⋯⋯」 可見古之俊士，皆愛菊、愛桃花、愛蓮，而且「桃花源」之境，更待人「探幽探勝」，通常只能含蓄表達。 所以，我哋唔難相信，文人如雲哥哥亦都一樣喔！:smile_40:

祝伊欣

(02) 教授出題      「⋯⋯精髓全在於『故事』兩個字。」 馬教授從窗門「掠」過我眼前，半跳半爬入嚟得相當之輕鬆，睇起上嚟竟然更似只不過係打個私嗝咁自然嘅反射動作。 教授身穿剪裁合身嘅暗灰色西褲，幾個闊步就已經行到白板前；深藍色白波點裇衫既兩袖，正不羈而恰到好處咁捲起咗、貼服喺手掙之上。 佢一面慢條斯理地講，一面用衫角輕輕擦塊鏡片，熟練俐落，隨即又戴起副黑框眼鏡，不偏不倚「晾」响筆直嘅鼻樑上高。 裇衫嘅藍－深，但透氣，令「無端端」出現嘅「人」再罩上一層mysterious、mischievous嘅顏色。      「Alright，」馬教授保健得宜，相當精神，完全唔似已屆知命之年；雖然並唔大隻，亦無一般中年男人皆有嘅啤酒肚或四肢贅肉，而且雙目有神，遠睇仍然濃密嘅頭髮，黑色之中雜間以一兩筆灰白，素描出一幅「曾經滄海巫山」，唔，嗰種知性文人先至有嘅獨特魅力。 一點灰白滄桑嘅驕傲反叛旋即响無形間同周圍青葱羞怯嘅空氣產生某種化學反應－呢個時候，哇啦一聲，竟又落起一場驟雨；我同其他同學一樣都未反應得切，仲未閂返埋隻窗，於是又被不速之雨潎濕，真無奈呀。      「嗰啲咩Course outline呀，中西方『小說』同『Novel』嘅Terminology同History呀咁，大學生，自己返屋企上“Blackboard” download返份notes係咁咦讀下就得㗎喇⋯⋯」「馬sir！」坐正中間、花名「書呆子」嘅男同學突然打斷教授，舉手問：「教授，『小說』可以按篇幅分微型、短中長篇，按題材分武俠、推理、歷史、言情、豔情、科幻、恐怖、⋯⋯按寫作手法又分第一二三人稱、書信體、日記體、意識流、傳記體；按流派可以分古典主義、現實主義、浪漫主義、表現主義、存在主義、黑色幽默⋯⋯我哋使唔使學晒咁呢？」 班上嘅目光從書呆子再返回馬教授，由不屑轉為仰慕。 「同學，小說分類系統龐雜，我唔拘泥呢味嘢嘅。 慢慢逐範研究嘅責任，响班『學者』同『評論家』度，並唔喺『作家』身上－呢個簡單嘅『學術分工』，你而家明未呢？」      「呢個course叫『小說寫作入門』。寫『小說』，簡單三個字概括晒：『講故事』。 咁，至於，點樣講，講咩故，乜故值得去『做』，文學世界入面乜嘢係『好故』、『壞故』、『有趣故』、『悶故』、⋯⋯哈哈，就係今個學期我要『示範』你哋睇嘅嘢喇。」馬教授講完，隨即又「變」咗隻「杯」出嚟。 「大家想像下呢度有杯水，清涼解渴，大家都飲。而家，杯中水變咗『豉油』，請問你哋又飲唔飲呢？」 「咦，咁『重口味』嘅嘢，唔啱我嘅，梗唔飲啦。」同學們紛紛擰頭話唔飲。 「OK，有句說話咁講：『每個人都有一個價』，若然肯飲咗杯豉油嘅同學就可以得到一皮嘢。Now... anybody？」馬教授接住問。 「書呆子」又將隻手舉到直不甩，一邊叫：「人唔可以為咗區區一千蚊就出賣自己嘅尊嚴嘅！」Jessie即刻指住佢補充：「一皮嘢呀，即係一萬蚊，唔係一千蚊呀，同學。」 「Good，咁如果而家杯豉油，值『一球』呢？嗱一球即係一百萬呀下。 你飲，定唔飲？」教授求其指向坐最後排嘅女同學問。 「啊，咁，唔該畀多幾杯我飲啦，嘻嘻。」班上一陣笑聲。 「四眼仔，我而家問你，嗱，呢杯係一杯『毒藥』，唔只係『軟皮蛇散』或者『含笑八步癲』嗰啲咁『簡單』，直頭係會危害到你生命嗰種『毒』法。 一口價，一千萬，你飲唔飲？講埋原因吖唔該。」 「下，下⋯⋯」四眼同學突然被馬教授「點中」，唔知係怕醜定興奮到塊面慢慢變紅色，口吃吃咁回答：「咁我唔會飲喇，因為死咗，都有錢無命享，唔make sense。」 「講得好。」大家未知馬教授個葫蘆入面賣緊咩藥，繼續好陶醉咁投入情景。 「咁，」佢眼角捎向我，嘴角微微向上牽動，然後行到我面前，問：「同學，你呢？呢杯毒藥，你飲唔飲？點先肯飲？」      我本來仲用紙巾抹緊頭髮同手腳，忽然防不勝防抬頭同馬教授嘅目光對上，衝口而出：「我飲呀！ 如果係我嘅愛人叫我咁做，唔使考慮回報，我都會一飲而盡，義無反顧。」「Wow......伊欣，好浪漫喔，羅密歐與祝英台喔⋯⋯」班上有幾個男女已經相當投入教授嘅「遊戲」，得意忘形咁起哄起嚟，猶如小學雞行為。:smile_39: 馬教授定睛望住我，足有半分鐘，彼此間突然有莫名其妙嘅氣氛。 Jessie响枱底輕輕拉我衫角，歪住嘴咁細聲話：「伊欣，屌，弊喇你，玩嘢激親教授定啦。」不過佢一嗡完，教授就綻開一個極溫暖嘅笑容，輕輕一點頭，然後邁步返課室中間講：      「各位同學明未？『理性』，同『感性』，就係以上問題所在－『感性』講感情感覺，往往唔make sense，同人嘅理智起衝突嘅。好嘅『故』，總有呢個元素，irrational－but reasonable，⋯⋯」 馬教授講到呢度，似乎諗起一啲好笑嘅例子，於是哈哈兩聲－佢嘅笑聲真係好好聽－但又吞返落肚，即刻改變話題：「順便同大家講，今個學期完之前你哋每人要交一份『功課』，就係要寫一篇『小說』－小說不愛情，可以判死刑，哈，你哋份功課，指定主題係『愛』，題目即管自訂，不過唔可以超過12個Chapter。 Any questions？」      落堂時，大家好滿足歡樂咁作鳥獸散，同時，有人發現課室正門外唔知幾時被「惡搞」貼上紙條：「門柄待修，請用後門」；隔籬課室嘅文滌生教授同樣啱啱落堂，佢一臉「老友鬼鬼」咁走到馬教授側跟大力拍佢膊頭一下：「喂，老馬，今朝你點入課室先？我製造晒『機會』，畀你响『後門』入喎，爽啦？哈哈⋯⋯」 。。。。。。。。。。。。      夜晚，宿舍浴廁嘅角落數起第二格內，我由得頭頂上嘅花灑一路開住，一路諗嘢，一路下意識慢動作擦身。諗起今日第一次見馬教授，⋯⋯「乞嚏！」又諗起份「功課」，⋯⋯「乞嚏！」突然間，我好似聽到Jessie把聲：「噢⋯⋯Joseph，⋯⋯好舒服啊，⋯⋯」 頂，唔係呀嘛，點解又撞到佢哋喺「隔籬」扑嘢，今次仲要咁大膽，搞到嚟呢度，認真離譜呀，但我一個證人等於並無證人，只要避得開舍監法眼，佢又確實唔使驚我會報串㗎喎。 。。。。。。。。。。。。      躡手躡腳趕返入房之後，我瞓喺張床上面，腰酸背痛，滿腦迷惘，聽住個鐘，剔。撻。剔。撻，⋯⋯瞓唔着覺，就响手邊拎起我偶像嘅《雅舍情書》重讀⋯⋯

～第二章完～

[ 本帖最後由 祝伊欣 於 2016-7-22 03:02 AM 編輯 ]

祝伊欣

引用:

原帖由 過路人文迪 於 2016-7-7 01:13 AM 發表

我有一個願望，就係望我臨 pa 既前一日去賺左呢 10 mill 野，咁就真係可以含……笑而終嘞

迪迪，咁夜呀？:smile_40:
好「感觸」喎⋯⋯眼瞓呀呢？ 早抖喇，我都去瞓一覺先再玩過:smile_30::smile_43:

祝伊欣

哈，早晨呀雲哥哥，見你又喺上面，梗係快啲坐埋嚟啦

Lo兄，「夢中見馬哥」－nice guess喔！不過「發春夢」嘅情節未有早發生呢！

多謝雲哥哥借「拆彈解碼」為名，事實上幫我推帖「谷收視」、「星級導讀」。《戀戀馬教授》篇能得一知音亦足矣  咁，話時話，你又有冇發現馬教授嘅「出場」，我嵌咗「衞斯理」同「白素」响裏面呀？

祝伊欣

《戀戀》第一章响P.7，第二章前晚貼咗，响P.9。

今晚貼第三章，大家會知道上回最尾講嗰本「雅舍情書」，到底有乜咁特別㗎喇。（雲哥哥，唔好成日同迪迪諗咁多「後門」啦，伊欣始終女仔人家，大庭廣眾之下要有返丁多矜持婉約，唔可以成日奉陪㗎）

各位師兄姐若有緣入嚟聽故，鍾唔鍾意個故事，或者估下情節點發展，都可以留個言，畀我知呀－新手「第一筆」，我好重視㗎。 多謝定先。夜啲見

祝伊欣

(03) 情迷月色下      《雅舍情書》，我視之為我文學偶像一系列作品之中嘅「最溫柔的藝術」，箇中記載嘅係一個「反世俗」嘅愛情故事，感人，但未必人人明白，⋯⋯「寫信人」梁實秋（1903-1987），「雅舍主人」，散文一代宗師，my all time favorite writer－佢本《雅舍小品》，篇篇散文我都倒背如流嘅。 「收信人」韓菁清（1931-1993），著名歌星影星，一般人估唔到佢其實係出身書香世家，擅詩文兼能編劇作詞，素有「才女」美譽。 兩人由相識至結婚前後五個月嘅時間，梁幾乎「每日一信」－即係呢本書裏面收嘅嗰120幾封。書後又附錄咗其中幾篇韓嘅回信。 我瞓响床度，靜靜翻書頁，跳入四十年前嘅時空⋯⋯      「秋秋」，奇人也；「清清」，亦奇女子也。 呢本書記載嘅正係一段有情人終成眷屬嘅「傳奇戀愛」故事⋯⋯ 事發於1975年1月： 秋秋72歲，德高望重；清清44歲，風韻猶存。 男嘅啱啱前妻意外去世，痛失髮妻，心情抑鬱，由美國西雅圖飛返台灣，會老朋友散心；女嘅屢屢遇人不淑戀愛史崎嶇不平，定居台灣之後遊藝於文，回歸平淡，有日跟契爺接待「老友」，就巧遇「梁教授」喇。  二人初次見面時，談文、談心，傾到一見如故；而其實，清清一向係秋秋嘅忠實讀者，但在此之前，兩個人生活並無交接，各自各精彩： ⋯⋯ 少年時，秋秋清華大學畢業後遠赴哈佛留學深造，後來獨力譯咗「莎士比亞全集」；清清則七歲參加兒童歌唱比賽，憑一首《秋的懷念》一舉奪魁，唔理家人反對「大家閨秀走去做歌女」，十一歲正式登台，响上海贏得歌后之名，自後紅遍演藝圈。  五四運動前後，秋秋從美國回流「初出道」，寫詩寫文寫評論，唔覺意成為文壇親共班底「老屎忽」嘅針對目標，迫不得已捲入長達八年嘅筆戰；但佢揮筆桿、講真話，辯論文學、翻譯、政治話題，無懼對手係當時嘅文壇大阿哥魯迅同佢班「死忠粉絲」，照樣「一個打十個」。 筆戰事隔多年，歷史終有定論，還秋秋一個公道：魯迅縱有風骨、縱係文學史上一個重要人物，那些年，佢的確係火遮眼鬧錯咗好人、為拗而拗，砌咗堆歪理誤人子弟了。而清清紅遍上海之後，4月13日南下香港從影，其年十八；廿二歲，就初登銀幕，參演《櫻花處處開》，往後擔大旗主演過《大眾情人》、《一代歌后》、《香格里拉》等，攞過幾次「金馬獎」，又响香港出版過《韓菁清小品集》。      當年，記者爆咗篇《教授與影星黃昏之戀》之後，梁韓之戀自此曝光，學界為之譁然－有班人接受唔到「梁教授」呢位謙謙君子嘅續弦對象竟然係「一芥歌女」；亦有群人覺得韓菁清年紀上足足細梁實秋28歲，「身份」「地位」懸殊，唔會有好結果。       「你說懸崖勒馬還來得及，在時間上當然還來得及，可是在情感上是來不及了。不要說是懸崖，就是火山口，我們也只好擁抱着跳下去。」 「我想，愛情在這世界中大概是極珍貴稀罕的東西，一般人也許從來沒有親身體驗過什麼叫作愛，所以有眼無珠，一旦遇見有人在愛，也不知道他是在愛⋯⋯他們褻瀆了愛，他們不懂愛的崇高境界。我以為，人在愛中是最接近神的境界。」       紙上，秋秋誠摯嘅愛情宣言映入眼簾，深深咁打入我心坎之中。⋯⋯      無論如何，時間同歷史畢竟又再一次證實咗世間上未能免俗嘅契弟惡意中傷、冷嘲熱諷做架兩，係幾咁之無謂。 梁韓萍水相逢，卻一見傾心，勇闖愛河，相知相戀－一段天作奇緣，可以衝破世俗所謂嘅障礙。 同年，梁韓定好婚期4月6日，但4月5日蔣介石過身，最後延至5月9日順利完婚。 佢哋一直恩愛咗十三年，直至秋秋仙逝。⋯⋯ 「以前睇，都有少少唔明，清清墮入愛河嘅感受，今晚睇多次，又好似明多咗啲。」 我冚返埋本《雅舍情書》，放返响床邊，又自然而然咁，諗起另一套「情書的故事」⋯⋯ 。。。。。。。。。。。。。。。。。。      「北京遇上西雅圖之不二情書。」同時，腦海入面浮現嘅男主角「教授」，重叠咗馬教授嘅影子。 「吓？咩北京遇上西雅圖呀？套戲唔係落咗喇咩？」Jessie「沖完涼」，一返入房就咁啱聽到我自言自語呢一句。 「哦，無呀，無呀，我追緊湯唯啲戲啫。」 「咩呀？攞靈感寫小說哩？⋯⋯伊欣，你覺唔覺，『光輝BB』真係好正呀，呢，『馬B』身手成個『衞斯理』咁，人又風趣幽默，上咗『光輝BB』一堂，我已經愛上佢喇，哈哈！」唉，而家興埋啲咁嘅嘢，男神女神就叫乜乜BB，Jessie又係，鍾意就猛咁B前、B後咁叫，同教授好親咩？ 「咁你份『功課』，又有idea未呀？」我拉返Jessie返正題。   。。。。。。。。。。。。。。。。。。       黑夜中，除咗我嘅腳步聲，彷彿仲有一種隱約相隨嘅聲音；路愈走愈長，夜亦愈來愈深。 我一個人响宿舍樓下踽踽散步，忽然「喀嘞」一聲，我渾身一震，慌忙回首，卻四顧無人－低頭望見地上嗰截啱啱踩斷嘅枯枝，我不禁笑一笑。走到呢棵任性嘅櫻花樹下，我抬頭望天，咦，今晚冇咩星星，月亮倒係幾光。 幾片淡淡嘅雲，飄然地，不着邊際地，掠過銀暈，月光從葉隙中篩落一道道狹長嘅柔光，揉出一地荇藻嘅斑駁。微風拂面而過。 「Joseph今晚想响度『屈蛇』？No way！講講下功課又『請』我出嚟『食糖水』，唉，正話响廁所仲未『依泣』夠咩？⋯⋯」我圍住樹幹無聊兜圈，兜到第三個圈嘅時候，突然同人迎面撞個正： 「哎呀！」兩個人同時大叫。 「教⋯⋯教授？」我瞪大雙眼，心跳加速。馬教授行路都無聲嘅。 「哦，祝伊欣？做乜咁夜仲响度？」燈光太暗，距離太近，佢嘅表情係疑問抑或責備，我睇唔清。 「咦，你知我叫咩名嘅？」 「哈哈，同學，我有class list㗎嘛。⋯⋯而且今朝你啲同學咪叫咗你做『伊欣』囉。我記得嘅。」       我同馬教授雙雙坐低响樹下，好似平輩咁，就咁傾起計嚟。 原來，佢尋晚先至飛返嚟香港，jet lag，又同「情人」分咗手，空虛寂寞瞓唔着。 教職員宿舍都响附近，就出嚟散下步喇。 我咪一樣啱啱甩拖，個room mate仲見我孤家寡人咁「方便」，成日帶條友返房添。 我話畀教授知，開學之前我「做功課」追讀返晒佢啲小說，搞到而家有「光輝後遺症」，唔想寫嘢咁，更加唔識寫故事，因為未寫過；教授又哈哈大笑，我哋就開始起勢咁傾佢嘅「故」喇⋯⋯

～第三章完～

[ 本帖最後由 祝伊欣 於 2016-7-22 03:06 AM 編輯 ]

祝伊欣

咦，雲哥哥又幫我補充呀？ 跟得好貼喎

[ 本帖最後由 祝伊欣 於 2016-7-9 12:30 AM 編輯 ]

祝伊欣

引用:

原帖由 鋒馬故如雲 於 2016-7-7 10:48 PM 發表

浪漫到可以西中合一（西方／中國愛情故事合一）。。:smile_o03:

「羅密歐與茱麗葉」crossover「梁山伯與祝英台」

哈，佢哋有首「主題曲」嘅，如下：

https://www.youtube.com/watch?v=0NuKS4gK0Lw

（曹格、卓文萱合唱）

[ 本帖最後由 祝伊欣 於 2016-7-9 12:30 AM 編輯 ]

祝伊欣

引用:

原帖由 loyanpai303 於 2016-7-8 10:32 AM 發表

只要你寫，我就睇晒。

感謝Lo兄，嘻

:smile_o06::smile_o06::smile_o06:

祝伊欣

引用:

原帖由 荊州集團 於 2016-7-8 11:46 AM 發表

跳開兼好奇咁問下 , 祝姐姐係咪睇開大陸劇???(見你個頭像係E神)

荊兄你好，你快問我快答啦－話說伊欣諗好咗要騎劫黃蓉之後，就上google度物色一下啱使嘅相喇。 咁多年嚟，好多女星都演過黃蓉嘅（FYInterest: http://tw.aboluowang.com/2012/0514/246886.html）。最新嗰個版本（近我年代）似乎係林依晨，佢依我又伊，所以就用佢嗰張喇。 至於大陸電視劇，我絕對係無睇開嘅:smile_35: