一夜狂歡

引用:

原帖由 一夜狂歡 於 2024-5-18 10:40 發表
臨走前我醒起樣嘢問Richard ，我問：Richard哥，聽Amy講你喺九龍仲有間餐廳個喎。佢回答話：係呀！就係太子嗰便，係一間小本經營嘅扒房，乜你都有興趣咩？我話：冇，想話有機會約啲朋友過去食下飯咁啦，可唔可以俾個地址我？Richard好爽快喺 ...

經過連續兩日折騰，可謂心力交瘁，原本諗住喺巴士上面可以瞓到返屋企，點知Irene一盆冷水照頭淋，淋醒咗我呢條懵炳，八皮嘢呀，點會瞓得着呀？下星期今日即係剩返六日咁多，點樣度水成為一大難題，自己身家挖埋倉底最多得一皮嘢，仲要個個月揹Amy嗰五千，真係捉襟見肘，其餘7皮嘢喎點籌？問朋友？以前試過一話借錢，個個雞飛狗走隱晒形，Irene講得啱，八皮只佔全年人工三分一，唔還就大煲，即炒連開飯都成問題，所以死都要死掂佢，首先聽日搵Amy，睇吓可唔可以褪遲還錢再度水，跟住搵銀行，可以借得幾多得幾多，其餘再想辦法，諗吓諗吓就到屋企要落車，返到去已經半夜，嗱嗱聲冲涼瞓覺，聽日仲要返工㗎大佬，果然攰得濟一覺瞓到大天光，冇較鬧鐘起身已經9點，嚇到成個彈起，冇食早餐冇洗面，第一時間坐地鐵趕返公司，返到公司結果遲到成粒鐘，門口Recept阿姐笑住話：咁遲先返呀！你老細講晒粗口喇。入到房只見老陳喺度度急步，見到我首次爆粗話：你有冇搞L錯，明知約咗張太仲咁遲先返！做咩連電話都唔聽？一聽到張太兩個字當堂眼前一黑。

一夜狂歡

引用:

原帖由 一夜狂歡 於 2024-5-21 02:34 發表
經過連續兩日折騰，可謂心力交瘁，原本諗住喺巴士上面可以瞓到返屋企，點知Irene一盆冷水照頭淋，淋醒咗我呢條懵炳，八皮嘢呀，點會瞓得着呀？下星期今日即係剩返六日咁多，點樣度水成為一大難題，自己身家挖埋倉底最多得一皮嘢，仲要個 ...

呢次蝦碌喇，約咗張太飲茶咁大件事竟然忘得一乾二淨，難怪老陳嬲到吹鬚碌眼，死靚妹驚我唔死，喺旁邊推波助瀾話：陳生你話呀，林仔呢啲人靠唔靠得住先得㗎，重要關頭竟然玩遲到，仲著到爛身爛世，頭又唔梳鬚又唔剃點見人呀？擺明想搞喎檔攤啫。我怱忙解釋話：唔係呀陳生，我琴晚同朋友食飯飲醉咗，搞到好晏先返屋企，今朝唔知醒瞓過籠所以搞成咁，真係好對唔住我冇心㗎。老陳聽完似乎接納我解釋，佢話：無謂多講，依家10點，橫掂你冇嘢做，你嗱嗱聲返屋企執好個身佢，十二點半前要返到嚟，我約咗張太一點鐘喺對面海記飲茶，到時一齊過去。我心諗你梗係要靠我啦，你哋冇人見過張太，咪到時搵阿壽咩。老陳開綠燈我梗係走夾唔唞啦，我絲亳無損吹到靚妹啤一聲，出門口時行過佢隔離，照版煑碗喺佢耳邊寸番佢話：鋤我唔死好唔順呢，吊我呀笨。激到靚妹紥紥跳，不過時間真係好趕，嗱嗱聲搭地鐵為上着。

一夜狂歡

引用:

原帖由 一夜狂歡 於 2024-5-25 21:04 發表
呢次蝦碌喇，約咗張太飲茶咁大件事竟然忘得一乾二淨，難怪老陳嬲到吹鬚碌眼，死靚妹驚我唔死，喺旁邊推波助瀾話：陳生你話呀，林仔呢啲人靠唔靠得住先得㗎，重要關頭竟然玩遲到，仲著到爛身爛世，頭又唔梳鬚又唔剃點見人呀？擺明想搞喎檔 ...

地鐵上又諗起八萬蚊，咁短時間咁大筆錢又唔准分期、點籌呀？係人都耍手擰頭，睬你都儍啦，唔通真係咁黑就咁玩完？諗到呢度乜嘢心機都冇晒，張太飲茶？話之你啦，橫掂遲早俾人炒，你哋飲到夠，我就唱慢板，實行冇鼻佬戴眼鏡，你緊我唔緊，返到屋企冲番個涼洗番個頭，等自己冷靜下都好，當熱水照頭淋嗰下，成個醒晒，忽發奇想，喂張太咁疊水，點解唔問佢借啫？八皮嘢對於佢來講，等於佢身上面一條毛㗎咋，但係顧慮到佢係客仔，問客仔借錢唔係好妥，而且唔啱規矩，但係重要關頭唔諗得咁多，橫又死掂又死，搏一鋪都要，一旦成事咪一天都光晒囉，諗到呢度成個精神晒，即刻開行turbo, 執到靚一靚趕返公司，哈返到公司仲大把時間，希望在人間，心情靚番晒，死靚妹之前俾我寸完條氣唔順，走埋嚟隊我話：你唔好咁得戚，講個事實俾你聽，我哋依家啲生意額，只係留得住陳生同我喺度，你今日搞唔掂張太嘅話，嘿嘿！你執定包袱都得嘞。一波未平 一波又起，聽完條妹釘講完鬼咁唔安樂，之前樂觀心情一掃而空，真係想即場吊爆佢。

一夜狂歡

引用:

原帖由 一夜狂歡 於 2024-5-30 15:23 發表
地鐵上又諗起八萬蚊，咁短時間咁大筆錢又唔准分期、點籌呀？係人都耍手擰頭，睬你都儍啦，唔通真係咁黑就咁玩完？諗到呢度乜嘢心機都冇晒，張太飲茶？話之你啦，橫掂遲早俾人炒，你哋飲到夠，我就唱慢板，實行冇鼻佬戴眼鏡，你緊我唔緊，返到屋 ...

話雖如此，其實一早已經打定輸數，碰啱八萬蚊呢單嘢係加速我嘅諗法，你兩父女唔好以為可以咁容易搵我墊屍底，其實我仲有後着，好似我問張太借錢，已經得出兩個結果，一係張太順攤借錢，借得梗要還，炒咗冇錢點還，於是張太實會保住我個位，二係張太唔借兼發啷禮，嬲起上嚟撒走晒所有生意，我俾人炒之餘你哋都唔會好過，到時一拍兩散，老陳你冇咗個潛在大客兼流失生意，好似上場到依家你仲係食緊老本，睇吓你到時點向上頭交代，失業係慘但最多唔撈本行，搵秋仔介紹轉行做理貨，佢呢行仲鬼死咁缺人，最多搵少啲駛死？好嘞時間差唔多喇，老陳大聲話：夠鐘嘞！大家準備好未？準備好就出發嘞。嘩老陳好似去相睇咁，成套老西再搽到周身古龍水，駛咪咁誇呀？張太一定睇你㗎？海記酒樓好近就喺公司對面，老陳好緊張，原來早上個禮拜已經訂咗一間獨立房仔，諗住方便同張太傾生意。

一夜狂歡

引用:

原帖由 一夜狂歡 於 2024-6-1 17:11 發表
話雖如此，其實一早已經打定輸數，碰啱八萬蚊呢單嘢係加速我嘅諗法，你兩父女唔好以為可以咁容易搵我墊屍底，其實我仲有後着，好似我問張太借錢，已經得出兩個結果，一係張太順攤借錢，借得梗要還，炒咗冇錢點還，於是張太實會保住我個位 ...

去到酒樓老陳同我講：你守喺門口唔好入房住，迎接張太然後帶佢入房。嘩你老味我咪做埋知客，張太都夠準時遲咗半粒鐘，一見張太真係冇得頂，人未到波先到，如果同佢賽跑一定好蝕底，一齊衝線肯定贏你個馬鼻，張太今日身光頸靚盡顯貴氣，着住件淺米色底棗紅花貼身旗袍，外面褸住件名牌格仔披肩，玲瓏浮凸身材掩都掩唔住，頭髮好似啲空姐咁紥起晒，露出白雪雪嘅粉頸，睇到我眼都唔霎只係想一啖咀落去，難怪老陳懷疑佢出身風塵，做嗰行冇番咁上下身材幾難有人請，你估個個做得掂㗎，我迅速上前向佢問好，然後伸手想同佢握手，點知張太態度非常高傲，只係求其笑咗一下冇諗住握，我瘀咗一陣然後佢命令式話：你就係林仔？帶路吖。張太好有排場，跟住佢後面仲有兩個跟班，一男一女，男嘅大概係司機兼保鑣，女嘅好似一個流動秘書，一入到房老陳見到個女人知道係張太，即刻仆向前烚熟狗頭話：歡迎歡迎閣下張太呵！多謝你賞面。跟住又係伸隻手出嚟想同張太握手，呢次好似好啲，張太都係係咁意點點老陳指尖算數，好似驚佢有菌咁，搞到老陳非常尷尬。

一夜狂歡

引用:

原帖由 一夜狂歡 於 2024-6-5 16:40 發表
去到酒樓老陳同我講：你守喺門口唔好入房住，迎接張太然後帶佢入房。嘩你老味我咪做埋知客，張太都夠準時遲咗半粒鐘，一見張太真係冇得頂，人未到波先到，如果同佢賽跑一定好蝕底，一齊衝線肯定贏你個馬鼻，張太今日身光頸靚盡顯貴氣 ...

張太貴客到，兩父女自然大獻殷勤啦，張太叫兩個跟班喺門口等，老陳嗱嗱聲招呼張太入座，哈佢老味早有預謀，一早開定幾壶茶，香片、鐵觀音、壽味仲有話自帶陳年普洱，隨時張太鍾意乜就斟乜，靚妹仔喺旁邊準備就緒，老陳客氣問張太要邊樣，點知張太回應係：其實我今日係唔得閒，約咗個客傾生意，不過見阿陳生你盛意拳拳，咁我即本出嚟同你見下面咁解，茶我就唔飲㗎嘞，我都趕時間你哋慢慢啦。張太跟住起身走人，咁嘅情景老陳自然大失所望，於是諗住把握時間向張太提出要求話：張太你貴人事忙我唔敢阻你，不過唔知有無考慮加大啲生意額，咁大家都好做吖。老陳仲話自己老江湖，叻唔切後尾呢句嘢頂撞咗張太，觸動咗佢神經，張太擰番轉頭話：生意呢啲嘢我自然有分數，不過最弊有啲人唔熟性，講嘢唔三唔四冇禮貌，專門帶人遊花園，你知唔知我好L忙㗎，冇時間同啲閒人嗲咁耐。張太突如其來嘅遣責兼爆粗，嚇到老陳面青口唇白，成頭汗唔識回應，我嗱嗱聲開門禮貌送走張太，佢門口兩個跟班迅速歸隊跟住後面，老陳呢鑊成事不足 敗事有餘，成隻鬥敗公雞咁呆坐喺度。

[ 本帖最後由 一夜狂歡 於 2024-6-7 11:10 編輯 ]

一夜狂歡

引用:

原帖由 一夜狂歡 於 2024-6-7 11:01 發表
張太貴客到，兩父女自然大獻殷勤啦，張太叫兩個跟班喺門口等，老陳嗱嗱聲招呼張太入座，哈佢老味早有預謀，一早開定幾壶茶，香片、鐵觀音、壽味仲有話自帶陳年普洱，隨時張太鍾意乜就斟乜，靚妹仔喺旁邊準備就緒，老陳客氣問張太要邊樣 ...

欲速則不達，老陳急於求成講嘢冇嚟分寸，反而弄巧反黜，真係神仙都救唔番，唔知佢點樣升到呢個位，坐低已經一段日子，仲係食緊老本，一個新客都搵唔到，日日對住部電腦都唔知搞乜Q，打機至掛，咁搞法遲啲咪變咗細路仔玩周周，越玩越縮？不如等我上好過，起碼我都有信心冧得掂張太先啦。靚妹俾張太嚇到縮晒，猛問老陳點搞，問佢都多舊魚，我搶先答話：等我去試吓，睇吓勸唔勸得掂張太，等佢下吓火都好。其實我係為咗自己度水至真，嚟到呢度死靚妹仲繼續玩嘢話：你估你仲好似上次咁好彩呀？陣間俾張太噴到你一面屁就抵你死。死靚妹咁L寸，我依家唔得閒睬你，遲啲實搵機會將你就地正法，以洩我心頭之憤，追到出外面好彩張太仲喺𨋢口，個男跟班想擋住我，唔俾我接近張太，張太好人示意佢俾我過去，張太語氣不太耐煩話：你地又想點呀？係咪嫌煩我唔夠呀？我向佢解釋話：對唔住張太，我老細講嘢係直咗啲，不過佢真係冇心冒犯你㗎，只不過係想幫公司拉多啲生意咁解㗎咋，請你大人有大量原諒佢啦。講講下個女跟班話：唔好意思張太，部𨋢到咗喇，我哋會比較趕時間。張太其實真係好人，佢話：唔緊要，等佢講埋先啦！

一夜狂歡

引用:

原帖由 一夜狂歡 於 2024-6-8 21:11 發表
欲速則不達，老陳急於求成講嘢冇嚟分寸，反而弄巧反黜，真係神仙都救唔番，唔知佢點樣升到呢個位，坐低已經一段日子，仲係食緊老本，一個新客都搵唔到，日日對住部電腦都唔知搞乜Q，打機至掛，咁搞法遲啲咪變咗細路仔玩周周，越玩越縮？不如 ...

張太跟住講：咁你即係幫你阿頭打完場？咩料呀？你有資格咩？張太一句得埋嚟真係瘀到震，冇辦法，搽面懵膏都要㗎喇，我厚住面皮再話：其實係咁嘅張太，我有個不情之請，我想問你….借啲錢。如此突如其來，張太掙眼問：我有冇聽錯？你問我借錢？唔係呀嘛？你知唔知你講緊乜嘢呀？問客仔老板娘借錢？仲喺呢啲場合。我作個故仔話：我真係鼓起最大勇氣先敢同你講，我最近唔小心俾人呃咗筆錢俾人追債，賒借無門，唯有硬住頭皮試吓向你開聲，不過如果你唔方便嘅話，就當我冇講過，好對唔住呀。張太由頭到腳將我打量咗一陣，然後問：做咩呀？還賭債呀？唔好以為喺電話度同我傾得兩咀，就倚熟賣熟搵我着數喎。張太問到我出晒汗，我極力解釋話：冇呀張太，你千祈唔好誤會呀！我從來唔賭錢㗎，只不過逼到埋身別無他法，唯有硬住頭皮向你開聲囉。張太快人快語，佢問我想借幾多錢，我答八萬蚊，張太話：你唔好俾我知道你係還賭債，你實死俾我睇，咁啦，今日我唔得閒，聽日啦，聽日打嚟我公司搵呢位陳小姐，佢會幫你安排。終於搵到救星，都唔知點多謝佢先好？