再更新下先～
那些年，星星同學會 第90話
諗下諗下，夜班巴士又到逹，阿星都要落車，慢慢行返屋企。巴士站行返屋企，大大話話都要20分鐘，咁，仲要唔要諗下之前同Joyce發生咩事呢？諗下回味下，都係好嘅，雖然阿星同Joyce只係一齊唔夠半年，呢段短短嘅時間入面令到阿星回味嘅事真係有好多。
……………………
大約12月左右，Grace就放聖誕假返嚟屋企，阿星都信守承諾，喺Grace面前同Joyce保持距離，間唔中互窒下大家，都係點到即止。不過可能阿星真係太鹹濕唔識節制，不時會忍唔住望下Joyce睇下佢有冇望阿星，可惜嘅係，Joyce比起阿星嘅節制能力好，每次阿星偷偷地望佢，佢都從來冇望過阿星呢度。
就好似上次阿星同Joyce同埋Grace兩姊妹去唐人街飲茶咁，阿星都保持得好好㗎，一路都唔表露，係成日望住Joyce啫，估唔到咁都俾Grace發現。或者咁講，熱戀中嘅男仔，其實唔多睇到身邊周圍發生緊咩事，相信Grace其實全程都留意住阿星嘅一舉一動，係阿星自己懶醒，以為自己掩飾得好，諗住冇人知啫。
人就係咁，你留意人，人哋留意你，你以為自己好醒，原來螳螂捕蟬，黃雀在後；阿星就係果隻雄性螳螂，俾隻叫做Joyce嘅雌性螳螂捕食，而後面，仲有一隻叫Grace嘅黃雀。咦，咁阿星隻阿蟬呢，去咗邊樹？
待續😬
Grace大概就係咁嘅身型😬
