更新下先~
那些年,星星同學會 第33話
「俾阿星諗下先啦。」
其實今日好想問佢Joyce啲嘢,見佢成日叉開話題,始終問唔到問題嘅核心。阿星終於忍唔住再問佢:「你家姐去咗邊?去幾耐?幾時返?俾佢香港電話嚟?」
Grace靜咗一陣,望住阿星,同阿星講咗一番阿星20歲人諗爆頭都冇諗到嘅說話。
「姐姐返咗香港,唔返嚟啦,佢叫你以後唔使揾佢,叫你死心。」
太多問題喇,點解會咁?阿星做錯啲咩?係咪阿星唔夠好?
Grace望住阿星好耐,見阿星一路唔出聲,輕輕捉住阿星嘅右手講:「姐姐唔想我知你同佢,我知你從來冇同我郁手郁腳,剩係把口衰,唔似其他人會手多多。我同佢地玩,一路留意你,你只會同我講笑,又從來唔會望我身材。」其實阿星成日望㗎,係你冇留意啫,咁勁身材唔望邊對得住自己?
個腦空哂,一時之間都諗唔到咩。
Grace慢慢抱住阿星條頸,雖然架車係跑車,唔算好大,所以唔係好夠位,坐得有啲窄。
「姐姐話叫你唔好再諗佢,放低佢。你唔好唔開心啦。」條頸有啲濕濕地,推開佢,原來佢喊咗出嚟,有冇讀過咩梨花帶雨?阿星依家識解啦。
「好地地你喊乜?阿星都未喊你喊?」 喉嚨好乾,阿星依家把聲應該唔可以用磁性形容。
「早啲返去啦,阿星想去行下散步。」落咗車,向住屋企反方向行咗去。
行咗一陣,攞咗包煙出嚟諗住點煙,聽到腳步聲,擰轉頭,見到Grace企咗喺後面。嚇咗阿星一跳:「做乜你唔返屋企?」
佢話:「你唔返我都唔返,我陪你行下?」
「傻咩你,返到去幾點?唔使瞓?」
Grace追問:「咁你點呀?」
「咪行下囉,行攰咗咪返去瞓囉。」
「唔得呀!」Grace扭計。
冇佢符,阿星唯有話:「嗱咁啦,阿星行半個鐘就返去好唔好?」
「都唔得!」Grace仍然抗議。
「小姐,咁你想阿星點呢?半夜三更你咁大聲會唔會唔係幾好呢?」阿星都抗議啦,呢樣又唔俾果樣又唔准。
待續😬