第十九章．姦殺令
「你唔好刪除個App。」Newton提議。
「點解，噉佢地咪繼續知道我嘅行蹤囉。」Arlena有啲唔接受。
「你一刪左個App，等於話畀佢地知你乜都知道晒，要報仇就比較難。」Newton講解。
「噉我應該點做?」Arlena問。
「虛與委蛇。」Newton教Arlena。
有一日Newton揸車返緊公司停車場，當佢落車嘅時候，有一個頭戴運動帽，臉戴口罩同埋大太陽眼鏡嘅女人衝出黎:「Newton，我想你幫我。」Newton一時間唔知個女人係邊個:「你係?」個女人唯有除左個口罩同埋大太陽眼鏡:「我係Joan。」
Newton有啲意外:「你唔係應該打理緊一個集團咩?」Joan要求:「可唔可以上你辦公室先講?」Newton見佢神色慌張就答應佢，一男一女去到Newton嘅辦公室，Newton先開口問:「你究竟發生左咩事?」Joan口震震話:「有人要殺我呀。」
Newton去倒杯酒畀佢:「你坐低慢慢講。」佢接過杯酒，微微飲左一啖再坐低，開始講自己打算點氹Eric啲股份，點知反而中左Eric嘅圈套，引致個毒販Thomas要殺佢，Joan最後講:「可能你會覺得係我自己攞黎，但係我真係唔想死。」
Newton先解釋:「可能你只係受Eric影響，先認定嗰個毒販要殺你。」Joan摇頭話:「唔係，因為我發覺成日有人跟蹤我。」Newton提議:「噉你可以請保鑣二十四小時保護你。」Joan再搖頭:「我怕啲保鑣會混左佢嘅人，到時更加危險。」
Newton問:「噉你想我點幫你?」Joan無奈話:「其實我都唔知，不過突然諗起你可能幫到我，我就知道你未必想見我，我唯有喺停車場等你。」Newton沉默左一刻再話:「我搵人先送你返你公司，再諗下點幫你。」Joan露出猶豫嘅眼神，Newton嘴角一笑:「你可以放心，我嘅人絕對唔會係Thomas派黎嘅。」
Joan走左之後，Newton用手機打畀喺佢娛樂公司嘅一個職員:「你過一過黎。」娛樂公司有時難免會畀黑社會社團找麻煩，而呢個職員同幾個黑社會社團嘅大哥都有交情，必要時可以幫公司解圍，可以等一切製作順利。
個職員入到Newton辦公室，Newton先招呼坐低，再倒一杯酒畀佢然後問:「你知唔知有一個叫Thomas嘅毒販?」個職員先定左一定，再轉頭問:「Newton，你點解噉問?」Newton話:「我有朋友可能得罪左佢。」個職員好認真話:「噉你朋友再好有咁遠走咁遠。」
Newton問:「佢真係噉可怕?」又話:「佢好似已經坐緊監喎。」個職員有啲緊張問:「唔係你個朋友攪到佢坐監下嗎?」Newton不置可否，只係問:「你有冇辦法打聽到佢依家喺獄中嘅情況?」個職員諗左一陣:「可以嘅，不過要使啲錢。」Newton一口答應:「冇問題，有消息即刻通知我。」
Joan返到公司都重係心慌，一整日都冇心機處理公司事務，直到放工時間，之前負責送佢返公司嘅人竟然行入佢辦公室:「Joan，你走得未?」Joan好奇問:「你點解會返黎嘅?」個人話:「係Newton吩咐我以後接送你返工放工，直到件事解決為止。」Joan攞起手機打畀Newton:「多謝你重肯關心我。」
過左幾日，娛樂公司嘅職員再見Newton，Newton先問:「有啲咩消息?」個職員話:「根據獄中消息，Thomas的確有落命令要殺一個女人，而且重要喺殺佢之前屌爆佢。」Newton再問:「有冇方法可以拆得掂?」個職員搖搖頭:「好難...」
Newton點點頭:「明白，我都知唔容易，麻煩晒你。」個職員話:「唔麻煩，我唔好意思就真，幫唔到你。」Newton話:「唔好噉講。」個職員就話:「噉我返娛樂公司先。」起身行到辦公室門口，正要推門行出去嘅時候，忽然轉身對Newton講:「我諗到一個辦法...」
