第三十二章．看到看不見的真相
段片係Max去外國公幹嘅時侯拍抵，嗰時佢重未同Arlena離婚，而拍攝地點喺佢入住酒店嘅泳池，當佢將個鏡頭掃過整個泳池，Arlena竟然睇到喺泳池遠處，有一個著住性感比基尼，正在晒太陽嘅女人係佢家姐。
Arlena冷靜落黎後自言:「如果唔係今次比較細心睇，真係留意唔到你無意中將家姐都拍埋入鏡。」漸漸諗返起以前Max耐唔耐就會好夜先返屋企，問佢點解咁夜返，佢就話要應酬，依家睇左段片就肯定佢嗰時一定係去左同Athena幽會。
佢又狠狠噉自己講:「Athena你個賤人，當日喺爸媽面前數落我偷食嘅時候，係如何義正詞嚴，其實自己亦都搞我老公，Max你個衰人，向我提出離婚嘅時候重扮晒理直氣壯，其實喺我偷食之前已經同個賤人搞埋一齊。」
再要去公司開會嘅時候，Arlena雖然好憎佢家姐，喺會議室內一直瞪住佢，心中卻又不斷諗:「點解Max會暗中同佢一齊?」佢家姐嘅外型因為比較硬朗，個性又倔強，冇噉討男人喜歡，所以Max先拒絕佢嘅追求，反而主動追求比較溫柔嘅Arlena，最後重結埋婚。
開會期間，財務部提交季度財務報告畀佢睇，報告中詳盡例出同其他公司交易或者合作所得嘅營利或者虧蝕，當中佢留意到有一間公司嘅交易次數出現特別多，就心諗:「家姐點解會頻密同呢間公司做交易?」不過佢見公司營運狀況已經有改善就冇追問。
第二日，Arlena如常返Newton嘅集團，Newton見到佢先問:「間公司最近點呀?」佢話:「營利有改善，不過...」Newton再問:「不過咩呀?」佢就將頻密交易嘅事講晒畀Newton知，Newton聽完之後話:「嗯，好似又係多左啲。」又問:「間公司叫咩名?」Arlena講出公司名之後，佢隨即攞起電話，打內線去一個部門，吩咐部門職員查下間公司嘅資料。
冇幾耐有職員打返內線畀Newton，將間公司嘅資話晒畀佢知，Newton點頭:「好，唔該你。」收線之後對Arlena講:「間公司幾年前係海外註冊，而公司嘅持有人你係估都估唔到。」Arlena十分好奇問:「係邊個?」Newton喺張Memo紙寫左個名畀佢睇，佢一睇頓時臉色一變:「原來係佢。」
有一日Arlena如常放工，去停車場攞車嘅時候，阿恆嘅前妻阿燕突然閃出黎，Arlena畀佢嚇左一跳，佢好緊張問佢:「你知唔知可阿恆去左邊呀?」Arlena鎮定返之後:「我唔知喎。」阿燕變得好激動:「你都佢咁好朋友，點會唔知呀?」
Arlena故意問:「究竟受發生左咩事?」阿燕喊左出黎:「佢要同我離婚。」Arlena扮晒意外:「點解會咁突然架?」阿燕搖頭又話:「我都唔知，有一日有個律師上門搵我，話阿恆要同我離婚，我梗係唔接受，重即刻打畀阿恆，但係佢已經唔接我手機，之後個戶口重取消埋。」
Arlena問:「噉個律師有咩解釋?」阿燕話:「佢攞份離婚協議書出黎要我簽，又話層樓已經轉左落我個名，其他資產佢律師樓整理好之後，會分一半畀我，我梗係唔肯簽啦，我只係想要返我老公。」
Arlena解釋:「但係律師應該有提你，就算你唔簽，兩年後律師都可以單方面申請離婚。」阿燕點頭話:「我知，不過我唔忿氣，已經聽晒佢話，佢話要玩性變態我就同佢，就算佢虐待我我亦都唔介意，噉都重要同我離婚。」
Arlena發揮以前社工本色去安慰佢:「感情嘅事就係噉，唔係話付出幾多就可以收返幾多。」阿燕好決絕話:「唔得，我一定要搵到佢，要佢解釋清楚。」Arlena睇住佢走，喺佢背嘆左口氣:「算你唔好彩，畀阿恆咁啱遇返個初戀情人，而且兩個人重仍然互相愛對方。」
幾個月後，Arlena有一日睇新聞報導，主播正在報導外國有一對華裔夫妻遭到一名同樣係華裔嘅女子鎗擊而受傷，幸好及後有人阻止佢再開鎗，先未有做成死亡，警方最後拘捕該名女子，該名女子被捕嘅時候不停用粵語大叫:「我要殺死你對狗男女...」佢睇完段報導之後非常震驚，自言:「佢終於都搵到佢地。」心中不其然想到Max同埋Athena，不過一切已經係後話。
[
本帖最後由 netsee 於 2018-10-2 02:16 AM 編輯 ]
