我執咗契哥屍
我執咗契哥屍
今日係我同男朋友Herry一齊咗一周年嘅紀念日，我哋約好咗今晚一齊食飯慶祝，佢話收咗工會嚟我屋企接我，再一齊去佢book好咗嘅餐廳食飯，
我盛裝打扮，喺屋企準備好，等佢嚟接我，
我今年廿三歲，係一個好普通嘅化妝品專櫃sales，由於平時工作甚少接觸到男性，當現時男朋友一開始到我專櫃搭訕，用咗唔駛一星期嘅時間，就成功溝到我，做咗我男朋友，佢點溝我，喺呢度就唔講啦，
我哋好穩定咁交往咗一年，但由一齊咗半年嘅蜜月期後，大家已經對對方冇乜熱情，Herry更是冇咗啱啱同我一齊嗰時嘅細心同痴纏，有時一星期都見唔到一次面，上次見佢，都已經係三日前嘅事，如果今日唔係紀念日，佢都未必會出嚟見我，
就喺我準備好晒可以出門口嘅時候，手機突然響起，個mon顯示係Herry打嚟，
“喂，到咗樓下啦？我依家可以落嚟啦，”，我接起電話，
“豬豬…”，Herry喺電話嗰頭親熱地叫我，“sorry啊！今晚老細要我哋趕project，我諗我趕唔切過去接你，同你食飯啦，”
“下！？咁即係點啊？”，我有啲愕然，有啲嬲，
“成team人都要留低啊，最多聽日同你補祝返，加送多份大禮物俾你，”，Herry怕我嬲，自動加碼，送大禮，
“唔駛啦，男人緊係工作緊要啲啦，你去做嘢啦，我今晚自己食得啦，”，我內心其實好嬲，但扮晒大方，
“真係㗎？”，Herry以為我真係冇嘢，“太好啦，我都知豬豬你最大方㗎啦，今晚book咗間餐廳，平時好難book㗎，唔好嘥咗個booking，其實你可以同朋友去食，嗰老細同我好熟，你哋食完張單我第二日先去埋，sorry啊豬豬，錫晒你，咁我去做嘢啦，”，Herry急急腳就收咗線啦，
心中一股悶氣，真係冇心情去食飯，但妝扮咗一番，無謂嘥咗佢，唯有自己出街行下買下嘢，舒緩下鬱悶嘅心情，
啱啱落到街，突然有人從後拍咗我一下，我當堂嚇一嚇，
“著到咁靚，去邊啊？”，
我回頭，原來拍我嗰個係我契哥，
“嚇死人咩？”，我大大力拍落佢心口，
“嘩嘩嘩…你個衰妹，重係咁粗魯㗎，唔怕冇人要你啊？”，阿哥一路搓住個心口，一臉痛苦咁講，
“咁耐冇見你，我重以為你死咗添啦，”，我嬲嬲哋又打咗佢一下，“一見面，你就姪鬼我，”，
話就話佢係我契哥，但只係以前讀中學時，童心未泯，義氣相稱，久而久之嘅兄妹關係，以前我倆經常玩埋一齊，感情甚好，自從佢搬離咗呢區後，久唔久先約到出嚟見一次，呢兩年甚至已冇見過面了，
“話時話，你點會喺呢度？”，我問佢，
“冇㗎，咁啱揸車嚟開呢頭，見咁耐冇返嚟，咪諗住入嚟行下之嘛，點知咁啱撞到你，”，阿哥，“係喎，你又去邊啊？”
“我今日本嚟係…………”，我將今日發生嘅事講咗俾佢聽，
“原來係咁，咁不如我陪你去食囉，呢個世界冇免費午餐，有免費晚餐食都唔錯丫，”，阿哥講到好認真咁，
“你講真㗎！？”，我回佢，
“你唔mind，我又點會介意呢？”，佢表現得有啲得戚，
“行咪行囉，怕你啊？”，
於是佢車埋我到咗餐廳，我哋叫咗好多嘢食，食得好開心，重飲咗兩支紅酒添，我諗呢餐都要四五千蚊埋單，諗起今日Herry放我飛機，呢餐飯錢就當係佢嘅小小懲罰啦(魔鬼奸笑樣)，
可能飲完酒個人high啲，我哋離開餐廳後，喺街上開始嬉鬧同行，
“上唔上我度坐下啊？”，阿哥問我，
“都好喎，”，我直接答應咗，“話掂好耐冇見契爺契媽啦，”，由於我同契哥嘅關係，佢阿爸阿媽就自自然做咗我契爺契媽，而且佢兩老對我都好似真契女咁，對我好好，好錫我，細個嗰時，我都成日上佢哋屋企玩，
“不如我哋去買啲嘢上去咯，兩手空空唔係咁好，”，咁耐冇見，我怕失禮，
“唔需要啦，唔駛㗎啦，你有心，佢哋會知㗎啦，”，阿哥講得有啲隱悔，
“哦，咁好啦，”，阿哥咁講，我唯有唔客氣啦，
好快，我哋到咗佢屋企，阿哥開門，帶我入屋，屋企冇開燈，
“咦…！？契爺契媽咁早瞓咗啦？”，我見屋企裡面靜英英，
“佢哋瞓咗好耐咯，舊年瞓到依家，我諗佢哋有排瞓，”，阿哥一路開燈一路講，
