慢嘗君

26. Lucy 的飯局
==========

話說女神 Athena 知道人渣 Simon 真係人渣，好後悔失身畀佢，我不斷開解佢...

我好期待見到 Athena，一早返公司等佢，點知佢仲早過我。

「早晨，Athena。」

「早晨。」

佢望住個 mon 同我講野。

Athena 今日著黑色衫，半身裙有好細嘅啡色花紋圖案不過主色又係黑色，加埋表情成個人好冰冷，睇嚟佢仲係好唔開心。

我部電話同銀包已經嚮我檯面。

「Athena，你點呀?」

「我冇野。」

佢繼續望住個 mon 答我，其實我地啲 project 仲 hold 住，邊有野做? 佢對住個 mon 其實只係唔想望我。

突然間 Athena 嘅冷淡令我覺得大家好陌生，我地好似從來冇開始過咁...

Athena，你唔好咁啦，你唔好封閉自己，你畀我幫下你啦。

我都唔知可以講咩打開話題，好無奈，唯有都係望住個 mon。

同我地第一次 OT 時一樣，我不斷偷望佢，當時佢好專心做野，好可愛，好吸引我，依家佢木無表情，好冷淡，只係逃避我。

我可以點做?

「嗨，Andy!」

「嗯? 邊個嗌我?」

「Lucy? Lucy 你怎麼會來?」

「哈哈! 好驚訝嗎? 我嘗試過找你，不過你的 whatsapp 連上不了。」

因為我 block 咗你吖嘛。

「你怎麼突然會來? 你來... 是為了那件事?」

我唔想嚮 Athena 面前提起人渣 Simon。

「對，我是為 Simon 事件來的，待會要跟 Grace 談談。」

頂你! 真係講出口。

「你是 Athena 嗎? 我是 Lucy，幸會。」

「Lucy 你好。」

Athena，你同 Lucy 講野就望住佢，同我講野就望住個 mon?

「Athena，一直只跟你 e-mail 聯絡，原來你是這麼可愛。」

「謝謝。」

笑? Athena 終於肯笑? 太好喇!

「吖， Grace 回來了，我去找她，不打擾你們了。」

「不打緊。」

Lucy 入咗 Grace 間房。

「Athena，頭先 Lucy 讚你可愛喎。」

我嘗試打開話題，但佢直情唔睬我，繼續望住個 mon，唉...

自從 Lucy 坐嚮 Grace 房，好多人嚮佢間房出面行來行去，班狗公聽到傳說中嘅超模 Lucy 嚟咗，個個特登兜路去昅佢，班港女亦唔執輸，要睇下佢點靚點巴閉。

唔知 Grace 係咪都頂唔順班八公八婆，佢同 Lucy 轉去另一間 conference room，跟住有三個其他部門嘅人入埋去，我唔識佢地，不過有一個好似係 legal department。

間 conference room 係全玻璃牆，班狗公港女睇得清楚好多，Lucy 好識著衫，今日落嚟係講數，所以著到成個行政人員咁，冇波冇籮畀佢地睇，但班狗公見到 model 長腿已經好滿足，班港女見到佢個靚樣又妒忌又羨慕。

唉... 等我話畀你地班井底之蛙知啦，其實嚮 Lucy 公司超模質素嘅仲有大把，只係你地眼光太窄啫，而且 Lucy 嘅全相我都差唔多睇晒，甚至幫過佢帶胸圍著底褲，你地唔恨得咁多!

不過雖然 Lucy 好索，我對佢已經冇晒性衝動，佢只係我嘅好朋友，最多只係知己，我嘅 focus 始終嚮 Athena 度...

Athena，你唔好唔睬我啦。

到食飯時間，Grace 請 Lucy 出去食，有幾隻狗公同港女跟住，我同 Athena 呢啲疑犯當然唔受歡迎。

「Athena，食飯喇，一齊?」

「我唔食。」

佢雙眼從來冇離開過個 mon，咁唔攰咩?

「咁好啦，我出去先。」

我去咗新記茶餐廳。

唉... 究竟 Athena 仲要唔開心幾耐? 點解你要收埋自己? 點解你唔同我講? 點解你唔畀我幫你分擔? 點解你唔畀我打開你嘅心窗?

Venus，如果女神繼續係咁，佢會唔會鑽牛角尖，會唔會諗埋一邊? 會唔會離開我? 你有冇方法?

食完飯，我買多份三文治...

「Athena，唔食野好傷胃架，不如食個三文治?」

「唔使，唔肚餓。」

「咁我放低，你肚餓就食啦。」

唉... 都係連一眼都唔望下我，我幾時變得咁討厭?

突然 Lucy 又出現...

「Andy，Athena 你們在忙什麼?」

乜都冇!

正確嚟講我忙緊點氹翻 Athena，Athena 就忙緊點避開我。

「Lucy，你們的會議怎樣? 順利嗎?」

我記得 Grace 話過你地要告我地喎...

「還可以，可是有些事我不能作主，要請示老總。」

咁又係，搞到咁大件事，梗係搵啲大粒嘅話事。

「哪麼你會留在香港多久?」

「我明天回去，對了，Andy，Athena，今晚我們一起吃飯，好嗎?」

我地三個? 同埋 Athena? 好呀! 雖然我只想同 Athena 食，不過佢依家唔睬我，如果加埋你，可能佢會制。

我望住 Athena... 去啦去啦，應承啦!

「我不去。」

吓? 唔好啦...

「來吧 Athena，我們好難得才有緣見面，這次之後恐怕也沒有合作機會了。」

「嗯?」

「那... 好吧。」

好野!

「去! Lucy，我也去! 你想去哪裡吃?」

「旺角，飯後可以血拼。」

「血拼不是廣東道?」

「我想看數碼產品。」

「OK，我訂檯。」

「那今晚見，我去找 Grace。」

「Athena，不如去翻上次間果韓國野囉?」

「是旦。」

雖然女神 Athena 啲回答未試過超過三個字，不過今晚可以同佢食飯我已經好開心，依家心情就好似當初追佢果時咁，只要畀小小機會我接近佢，我已經興奮好耐。

反正冇野做，我成個下晝都係計劃今晚食乜，講咩話題，搞咩爛 gag，有咩唔講得。

唔講得當然係人渣 Simon，不過 Lucy 嚮度好難避免提起佢，果然未食到一半已經講起...

艾官

開始覺得，Andy畀人成頂綠帽笠落腳都係抵撚死嘅。

bingbingk

九成手機比佢戈陣   佢吾小心按到香討見到篇文啦

慢嘗君

引用:

原帖由 艾官 於 2014-6-4 01:18 AM 發表
開始覺得，Andy畀人成頂綠帽笠落腳都係抵撚死嘅。

係，佢自己要負一部份責任

慢嘗君

引用:

原帖由 bingbingk 於 2014-6-4 03:10 AM 發表
九成手機比佢戈陣   佢吾小心按到香討見到篇文啦



http://n2.hk/d/images/r10/mobile.jpg

下一集就會知了

慢嘗君

27. 女神的眼淚
=========

話說 Lucy 嚟咗香港，我同女神 Athena 陪佢食晚飯，無可避免提起人渣 Simon...

「你們知道是怎樣揭發嗎? 原來創通打算在香港開分公司，請 Simon 過去，在上海期間他每晚跟創通的老總談細節。」

「他每晚很晚才回酒店，原來是這個原因。」

「創通的老總有一位助手，是個女生，跟我在大學同科，也是我的情敵，我不喜歡她，但她跟 Simon 搭上了。」

跟 Simon 搭上係忌言，我望一望 Athena，果然佢塊面即刻黑晒。

「那女生很天真，以為 Simon 很愛她，其實 Simon 只是口甜舌滑哄她吧...」

你仲咁講? Athena 塊面黑過墨汁。

「後來創通的事搞定了，Simon 返港就不找她，後來不知她怎樣打聽到 Simon 在香港有女朋友...」

佢返香港咪食咗 Athena 囉! 我塊面都黑埋。

「那女生跟我說其實 Simon 以前已經賣了幾個 project 給創通，只不過改頭換面沒有證據吧，本來我不想幫那女生，不過 Simon 太下流，我便告發他。」

原來係你爆大鑊，我都奇怪點解會有人知。

「那個賤傢伙這樣已經便宜了，真想閹割了他。」

「我們不要再提他。」

「也對，不要掃我們的雅興。」

食完野，埋緊單，Athena 真係好野，一眼都冇望過我，女神當我陌生人原來一樣比死更難受。

「Andy，Athena，其實... 你們是一對嗎?」

乜你突然咁問? 我地好尷尬。

「好登對啊! 不過你們的表情好趣怪，Andy 不斷偷望 Athena，Athena 又不斷迴避 Andy 的目光，你們炒架嗎? 好羨慕啊!」

羨慕? 你知唔知我地幾大鑊?

「Athena，我對你說，你好幸福啊，Andy 是好男生，當天我醉倒，Simon 趁機強姦我，幸好 Andy 阻止他，趕走他，否則我便慘了。」

唉，你仲提嚟做乜? 我救到你，但救唔到 Athena，你知唔知我幾痛苦? 唉...

「後來他怕 Simon 會折返，留下來保護我直到我清醒，他真是正人君子，如果我找到跟他一樣體貼的男生我什麼都不要了。」

Athena 望一下我，終於望咗我一眼，呢次係佢全日第一次望我，但眼神好複雜，佢認同 Lucy 我係好人? 定嬲我救 Lucy 唔救佢?

我估唔到 Lucy 會嚮 Athena 面前讚我，不過諗翻上嚟，我地嘅誤會係由 Lucy 引起，依家由 Lucy 補救都好應該，不過最重要都係 Athena 點諗。

「好了，Lucy，你想血拼數碼產品便向那邊走。」

「沒問題，我行了。」

「那麼，我們在這裡道別。」

「好高興認識你，Lucy。」

「我也很高興認識你，Athena，若果將來到上海，記得找我。」

「我會的。」

「Andy，我祝你早日蜜運成功。」

「謝謝，Lucy，再見。」

「再見。」

送走 Lucy 之後，Athena 收翻起笑容，唔望我向佢屋企方向行。

我唔敢問可唔可以送佢返去，反正佢實答唔可以，所以我只係靜靜地陪佢行。

佢冇加快腳步擺脫我，只係頭耷耷慢慢行，由得我跟住，咁你就畀我做你背後嘅男人，默默保護你。

我錯失咗一次，保護唔到你，我好內疚，但我發誓永遠唔會再錯。

雖然佢繼續木無表情，不過明顯同今朝有啲唔同，好憂鬱，同好似諗緊野...

諗緊咩? 諗緊頭先 Lucy 嘅說話? 諗緊點解 Lucy 幫我講好說話? Lucy 同我夾埋? 冇呀! 冇呀! 我唔知架，我冇同佢夾埋，如果夾埋，我更加唔畀佢講翻上海果件事。

冇幾耐我地去到砵蘭街，就快就到佢屋企。

突然佢停低，企嚮度唔郁...

「Athena?」

原來佢喊緊!

我即刻遞張 tissue 畀佢。

「對唔住。」

「嗯?」

「對唔住，對唔住，Andy，對唔住。」

「Athena...」

「Andy，對唔住，係我對你唔住... 你尋日講嘅唔啱，其實你冇錯，錯果個係我，係我任性，我本來想你呷醋，想你緊張我向我道歉先，唔知點解迷失咗...」

「Athena...」

「果次...」

「其實我唔想去，我唔知點解咁蠢被佢氹到，over 晒，我好亂，唔知點算，我好後悔，我對你唔住，你問我果陣，我唔知點面對你，我唔係鍾意佢，我冇再去過，我真係冇再去，但我覺得自己已經好汚糟，係我背叛咗你，係我傷害咗你，對唔住，對唔住，對唔住...」

「明明你對我好好，但係我唔識珍惜你，係我辜負咗你，係我...」

「我好驚，我好驚見到你，我甚至唔敢望住你，對唔住，對唔住...」

佢喊到失控。

「Athena...」

我突然嚮佢面前跪低，一邊膝頭跪嚮地度。

砵蘭街人來人往，突然有人跪低，當然好多人見到...

「咦? 果個男仔做咩跪嚮度? 求婚呀? 嚮砵蘭街求婚?」

Athena 都被我嚇親，停咗唔喊...

「你做咩? 企返起身先啦。」

佢伸手想扶起我，我捉住佢隻手。

「Athena，我愛你，我真心愛你，請你忘記晒唔開心嘅野，求你同翻我一齊，求你畀我繼續照顧你。」

「點解你依家仲... 我同過佢... 我地之間永遠會有條刺，你明唔明白? 你一定會介意。」

「Athena，無論你係點，無論你做過咩，我都唔會介意，我對月光發誓會一心一意愛你，保護你，我唔會再放開你。」

我捉實佢隻手。

「點解你對我咁好? 點解你要原諒我? 我好想你鬧我，我好想你憎我，我好想你同我講分手，你知唔知你對我愈好，我愈原諒唔到自己? 我覺得好痛苦。」

「Athena，我同你一樣痛苦過...」

「不過當我問自己心入面仲有冇你，我好清楚我仲好愛你，一直冇變過，如果我嘅世界冇咗你，我根本生存唔到...」

佢啲眼淚又開始流落嚟。

「Athena，我唔可以失去你，如果你仲愛我，請你將個心交畀我，請你畀我幫你掹咗條刺。」

「Andy，點解? 點解你對我咁好? 我搵唔到原因點解你要對我咁好，我唔值得你對我咁好...」

「Athena，愛唔係講值唔值得，如果你一定要原因，原因永遠只有一個...」

「因為...」

「Athena...」

「你係我嘅女神。」

我慢慢企翻起身，拉住佢隻手順勢攬住佢，佢雙手亦伸向我背脊攬住我，塊面埋嚮我條頸同膊頭之間喊，愈喊攬得我愈實。

「咁即係點? 個女仔應承咗? 我地使唔使拍手?」

當佢喊得細聲咗，平服咗啲，我細細聲嚮佢耳邊講...

「Athena，你願唔願意，以後無論富貴貧窮，快樂悲傷，健康疾病，每日都... 同我一齊食早餐?」

「傻瓜...」

「我願意!」

慢嘗君

無論看倌睇到眼火爆未都好, 今集嘅對白係我最鍾意

*************************************************************

...如果我嘅世界冇咗你，我根本生存唔到...

*************************************************************

...點解? 點解你對我咁好? 我搵唔到原因點解你要對我咁好，我唔值得你對我咁好

愛唔係講值唔值得，如果你一定要原因，原因永遠只有一個...

因為...

你係我嘅女神。

*************************************************************

...你願唔願意，以後無論富貴貧窮，快樂悲傷，健康疾病，每日都... 同我一齊食早餐?

傻瓜...

我願意!

[ 本帖最後由 慢嘗君 於 2014-6-5 11:01 PM 編輯 ]

loyanpai100

好！

喵靈王

投入立場真係對男主角冇晒好感
但另一個立場又覺得佢默默既忍耐終於得到回報
愛情就係咁.. 不問付出，不理他人眼光..
只係旁觀者唔會比自己更清楚自己想要乜..
哈... 個人觀點啦！呢集我好鍾意呢...
唔多唔少Lucy都有少少幫助吧！

kingofice

很精彩和感人的對白和表白  不枉追了這作品數週之久  其实坦白說中段有很多寫得不甚暢順  可幸這篇挽回不少讚賞   多謝大作