引用:
原帖由 一夜狂歡 於 2024-3-24 01:49 發表
叫做執番身彩,走遲半步命都冇,俾四個人撳住砌,頭破血流不在話下,隨時入埋ICU 都唔出奇,認真牙煙!唔明嘅係,望兩條女幾眼啫,又冇索佢哋油又冇對佢地不敬,點解會搞到尋仇咁大件事,咁搞法仲邊有人敢望女仔呀?真係痴L線!好嘞班友揸車 ...
行去Peter間公司仲有一段路,但見過鬼怕黑,好驚班生番返兜逐條街刮友,俾佢地刮到隨時橫屍街頭都有之,所以保持警惕不停四圍望,有咩風吹草動即刻較腳為上,不過老實講,真係追逐起上嚟,人用車你用腳,走得甩成數好低,好彩最後無風無浪又到六點,安全抵達Peter 大廈,望過去先前條濕滯保安應該收咗工,代替佢嘅係一個白頭髮瘦保安, 以前見過嘅應該係根叔係嘛,我上前話:根叔你好!好耐冇見。根叔𢱑晒頭話:你…..你係邊位?我識你咩?我解釋話:呢上次我嚟搵Peter吹水,走嗰陣唔記得叫你開番部𨋢嗰個。根叔如夢初醒話:哦我醒起喇!你儍更更行落嚟,仲跌到一仆一碌成手損晒呀嘛,咁好又嚟探佢班呀?我答話:冇!今日咁啱行過,咪順便上去坐下囉,我之前嚟過,不過個保安唔俾我入。根叔話:乜你唔係同Peter約好嘅咩,依家我哋公司嚴好多㗎,你睇吓裝晒閘,冇預約冇得上㗎。我再解釋話:我知,收尾我咪嘗試搵Peter囉,點知搵唔到人。根叔話:你早嚟都冇用,Peter 哥同個女助手啱啱先返到,佢哋仲買埋外賣做晚餐,食完先再開工。根叔笑咪咪問:我想問你,個女助手係咪佢女朋友嚟㗎?我話點解咁問,根叔陰陰咀笑話:嘻嘻!有陣時佢哋都玩得幾開心㗎。我心諗你又知。