國內短篇集(3)
承言我之前講,港男其實係好多地方都幾受歡迎,不止國內佳麗喜歡,我認識既日本妹、台灣妹又或新加坡馬來西亞,佢地對港男都份外有好感,因為我地有風度有學識,亦較尊重女性同風趣細心,記得以前我地未出手,女生都會主動約我地去玩去食飯。但大家都知,好多港男係香港都搵唔到女朋友,呢個又係事實,其實以我所知,好多港男唔係唔想係香港搵女朋友,而係佢地真係搵唔到,咁退而求其次,就只能夠係其他地方搵女友,而國內,就係其中一個選擇。
有人說國內紙醉金迷,一句出trip工作,要過夜,果一夜可以係天堂。可能你會話,有無咁誇,我可以答你,你可以乖乖工作完就返酒店一個人瞓到第二日繼續努力工作,今輯短篇你亦可以睇到呢度就算,又或身邊人日復日工作後亦開始嘗試夜晚外出relax,咁唔同既路就等緊你去發掘,當然我唔打算夜遊心得去講點玩,因為我只打算分享自己所見所聞。
係未婚夫日誌裡我曾提起既一班老友,呢班人有個共通點,佢地都係香港人,上左年紀,8成都係年過40而部份係香港已結左婚,係國內,佢地大部份都會有”女友”,而且D女友你係唔會認得切,因為當中幾個港男換晝都換得快。飯局通常會係6~8個已有”女友”既人安排,而每次又多一兩個黎自香港既新人,放工後想relax黎一齊食飯飲野,當中”女友”又會帶佢地既女性朋友,咁就熱鬧地一齊食飯。講真呢D飯局我出席唔多,因為真係太吹水,同埋如果你係單身,就自然會被整古,一pair人就最鐘意整古新仔又或單身既人,呢D整古其實唔係惡意,而係製造機會俾單身既新仔同女仔一齊玩。講真,成人世界既男女無夾硬黎呢樣野,好多都係睇當時氣氛,兩個單身黎既男女一齊被人玩,一齊頂,飲下笑下,感覺良好就會有下文。
咁女生方面,水準又如何呢??我個人覺得,要絕對正既係有,當然亦一早被人揀左,但仍然有好多70分左右或以上既可以遇上,所以在男少女多既情況下,你一次遇唔上,唔緊要,純粹想自己人食飯好還是再去結識朋友飲酒輕鬆下都好,下次心郁郁就會來食飯多一回,接下來的,總會有一次揀上心水女友,這種生活感覺多少有點糜爛,其實也不盡然,因為大家都係你情我願,起初我看在眼裡感覺也是疑問處處的,但日子久了也明白情感世界可以好複雜,只要當事人沒問題其實就會變得好簡單就是。
前兩回都係講女人,不如今次講下男人,你認為咩男人最易有女友呢?香港黎既大老闆?黎做野過夜既高薪厚職?兩樣都唔係,其實最易有女友往往係每日都中港兩地送貨既阿叔,佢地人工唔低,但工作性質卻有點無聊,由於每星期總有一半日子係國內過夜,工作上左手之後好多時就會諗夜晚點過,所以佢地就可以識到唔同既女生,需知我地香港人搵過萬係家常便飯,但對國內女生已經係一個可觀又吸引既收入,而一個轉數快又會冒少少險既貨運月收入3萬更唔係問題,咁佢對女生就更疏爽,呢D叔叔,係國內亦算另類吃香。( 其實大家會想可悲嗎?因為有D大叔其實想係香港識番個正式女朋友都無人要,卻係國內多多選擇。) 而亦正如我之前講,咩野工種質素既人其實我都好樂意認識,因為在外靠朋友,佢地可以闖出一片天,總有其成功之處,而這種香港人在國內的聚會飯局,經疫情後亦被打亂,而家仲有無呢枝歌仔唱?我暫時唔知,因為就連出名既幾間夜總會都收左皮,但飲飽食醉玩係人既本性,開心既場面,總有機會再出現。
現在回想起一件有趣事,當年其中一位大老闆,佢係香港有老婆而國內無女友,卻都有出席飯局,因為佢見我都無,有次摸住酒杯底時就私下同我講。
大老闆: Dragon,睇唔中咩? ( 佢意思我無睇中邊個女仔啱做女朋友咩? )
我: 有架,好多都好靚又吸引。
大老闆: 咁你唔揀番個,佢地都有D唔係玩玩下,係正經人家黎架嘛。
我: 我搞唔清楚我吸引佢地係邊方面,因為我係香港人?定還是我既收入。
大老闆: 哈哈,要咁認真架咩?
我: 又係梁生你講佢地正經人家黎既,唔正經我反而放心去玩,正經人家睇中我喎,會唔會諗過人世架。 ( 大老闆叫梁生。 )
大老闆: 哈哈,你仲咁後生,我好奇你做咩唔開心左先。
我: 我開心唔使靠女人架,我仲有好多唔同既興趣,哈哈,梁生你又唔搵番個?
大老闆: 正如你講,因為我清楚自己賣點係咩,我亦知道埋我身既女人其實係想要D咩,所以我無興趣。 ( 大老闆舉起酒杯。 )
我: 如果遇上一個好正既女人主動呢?
大老闆: 哈哈,好正既女人會輪到我咩?仲要送上門添?記住一樣野,唔好當呢D誘惑你係抗拒緊,因為抗拒係會累積,總有一日會裝滿而心軟又或接受。你係唔”好”呢味野,就見到都唔會俾佢埋身就係,同你唔食煙一樣。
我: 明白。 ( 我同大老闆碰杯以表認同,印象中大老闆今時今日都係一個愛妻號,其實佢唔高大但都幾型,無女人埋身咩?我唔係好信,但佢鐘意釣魚同埋食野係真既,佢好鐘意捉埋我私下一齊呢度去果度去搵野食。 )
男人,已有女人之後再有既女人,係咸濕,定還是寂寞,我估兩者都可能有,有無想過他日你出埠,夜蘭人靜時係無人知道既情況下有艷遇,你會拒絕還是偷偷一試呢?我唔喜歡站於道德高地去睇返國內工作既男人入夜後就會唔正經,而國內既女人就更一定係貪慕虛榮等等,我只喜歡睇,振振有詞既人當遇上同樣誘惑時,係有食唔食而罪大惡極呢?定會清心寡慾地抗拒?還是不當一回事…… 今集可能有d悶,但正正反映好多港男係香港苦無女友,上國內卻好輕易就有機會,而行唔行呢一步既情況。