「慧,你老公已經放棄咗撫養你個女,正式分居協議一日內攞過嚟俾你簽名。」
Leonard唔使好多時間,喺我開出要求嘅第三日黃昏就俾電話通知我。
大致上準備好,我珍惜同囡囡一齊嘅每一秒,假期最後一日,我陪佢到好夜,先送佢番嫲嫲度。
「Mark,有無阻你瞓覺?」
我返到寫字樓,覺得夜晚我先可以冷靜啲講說話,所以漏夜俾電話阿Mark。
「我嚟緊去一次遠行,你可以幫我照顧囡囡嘛?」
「同你老闆?!你哋唔係去蜜月嘛?!」
阿Mark好失落,傷感。
認識我咁耐,知道我無經濟能力出外遠行,佢好愕然,以為係我同Leonard一齊。
「無咁嘅事。」
我唔可以同佢講得咁清楚,阿Mark雖然一肚疑問,佢都答應我。
「咁日後辛苦你喇!」
我忍眼淚忍得好辛苦,無論如何都唔可以露出一啲蛛絲馬跡。
「去幾耐呀?」
「⋯⋯未定⋯⋯如果我去耐少少,你會唔會改變主意?」
「當然唔會啦,不過⋯⋯唉,佢肯陪你去散吓心都好嘅。」
自從我同Leonard一齊之後,佢諸多阻止我見囡囡,囡囡學識咗同阿Mark傾電話,講心事,佢可能將屋企近嚟發生嘅事向阿Mark提過。
阿Mark仍然以為Leonard陪住我一齊,我唔想講個真相俾佢知,留返最後一刻先解釋。
[ 本帖最後由 Jindaoonline 於 2022-12-28 00:18 編輯 ]