同時我同囡囡相依為命,怕同師傅,又或者花小姐,三個人結伴落去,自己將會變成一個酗酒,啃藥嘅媽咪,所以我每次都推咗師傅佢。
我唔明師傅一向女朋友無數,從來唔想俾婚姻又或者固定伴侶束縛,理應唔在乎我,唔會三番四次邀約我。
「我想你俾我一個回憶!」
過咗幾日我先明白,令我愕然,師傅向公司遞咗辭職信,離開前想再同我多幾次接觸,當做留念。
我無明確拒絕,又無答應。
喺師傅最後一晚,我買咗個半磅裝蛋糕,約埋喺咖啡店兼職嘅大學生, 收咗舖之後同佢餞別。
無隆重儀式,無花巧食物,更加無名貴記念禮物,淨係三個傾得埋嘅同事坐埋食件西餅,多謝佢呢幾年嘅教導。