食飽飯，出多一話先～
那些年，星星同學會 第31話
咁你都睇到？唔通你有天眼通？一路行出機舖，天都未黑，但都已經七點幾，見都有啲餓，就同Grace去咗唐人街一間出名嘅飯館食碟頭飯。呢間飯館出名咩？咪啲伙計服務差囉。Upstairs! Downstairs! 對啲客人呼呼喝喝㗎。啲伙記同阿星好熟㗎，次次見到阿星都問阿星：「喂，高佬，乜你仲喺度嘅？留班呀你？」阿星真係冇佢咁好氣，查實阿星已經冇讀書出咗嚟做嘢，唔通阿星識得如來神掌又講過你知咩？同Grace 行咗落地窂果層揾阿星啲熟人，有汽水同米缸送俾阿星送飯㗎。
食完飯意猶未盡，仲想打機，就想打發Grace走，點知佢跟到實一實，想跟阿星返機舖，Grace跟出跟入實在令人覺得有啲煩，但又唔好意思趕佢走，唯有同佢返入機舖打機。佢真係全程睇實實阿星打機喎，知道阿星出緊咩策略打人，雙手手踭伏喺阿星膊頭上面，塊面哄到阿星塊面好埋，又俾意見又盛咁，連佢個咀有陣香味都聞得一清二楚。見阿星一路打機一路食煙，仲叫阿星唔好食咁多，阿星話唔食煙冇嘢食，個口好寡，佢即刻唔知喺邊度遞咗粒糖埋阿星咀度，見你咁醒目，又好。之但係點解粒糖咁細粒，仲要係暖嘅呢？都係唔好理咁多，應戰要緊，一陣唔小心輸咗就肉酸。獅子搏兔都出～～～～盡全力啦，阿星都信呢樣嘢㗎，專心打機！
打到機舖關門，成十一點，阿星話返家啦，再傾啦。佢話都未玩夠，不如去打保齡？都好喎，不過唔好，返屋企點算？Grace話我有車嘛，怕咩喎。係喎，佢送阿星返去咪得囉。打保齡都冇咩好講，都係打到全中就俾個五果啲啦。不過老實講，你又短裙又tank top咁，真係唔怕走光嘅咩？一碌咗個波出去就即刻拉拉扯扯件衫同條裙，隔離左右啲單身男個個眼望望，又真係令到阿星唔多捨得。唔捨得啲乜？唔捨得佢俾人咁望呀，人地女仔嚟喎，原本都冇諗過去打保龄呢啲咁大動作嘅活動，一陣俾人睇到走光就唔好啦。所以最後阿星打到一半，一手捉住Grace 就同佢講都係走啦。佢額頭有少少汗，仲碌大雙眼望住阿星話：「吓，都未玩完，玩埋先啦。」唔好啦，阿星唔係咁想玩落去，一陣上車講你知咩事啦好冇？乖，聽話。
待續😬
[
本帖最後由 star_platina 於 2023-5-10 17:30 編輯 ]
