小插曲
今日,我同我嘅好閨密小魚一齊去咗XX廣場行街,
小魚係我由細玩到大嘅青梅竹馬,由於佢細細個就生得眉清目秀,白白淨,經典嘅一個小生樣,所以從小學到中學時期都有好好嘅女人緣,係學校中數一數二嘅校草,甚至乎聽過佢喺中四嗰年,竟然有位女老師喺情人節當日偷偷地送咗盒朱古力俾佢,呢件事當年哄動佢哋全級師生,更是傳至全校,成為學校歷年神話中嘅其中一件,
小魚大我一年,我記得喺我六歲嘅時候,我們一家遷居至新屋,小魚家就住喺我隔離,由於係隔離鄰舍,小朋友時期嘅我哋好快就熟絡咗,做咗好朋友, 小學中學都係同一所學校,相識至今已經十九個年頭,
小魚由細到大,基於生得靚仔,而且學業都係名列前矛,身邊總係有不少女生圍繞住佢,但往往最親密嗰個都只會係我,其他女仔佢都不放在眼內,而我本身樣貌身材亦絕對係校中嘅校花之列,郎才女貌,猶如天作之合,好多同學都會以為我哋係一對情侶,但偏偏我同佢嘅感情一直都只能係友達以上,戀人未滿,
直至到佢中學畢業嘅嗰一日,佢突然向我表白,說出佢心中一直埋藏已久嘅秘密,
當時嘅我聽完佢向我嘅徐徐道來,挖心掏肺,一字一句都震撼咗我個心,原來佢由細到大,除咗屋企人之外,一直隱瞞所有人至今都冇公開嘅秘密,佢今日將佢講咗俾佢認為最好嘅朋友(即係我)知,原來佢係同。性。戀。者,
佢屋企人一開始知道呢件事時都好難接受,但由於佢係獨子,變相屋企人都十分遷就佢,久而久之,就慢慢接受咗佢嘅情況,但佢自己本身都唔太想有人知佢有咁嘅問題,喺佢同屋企人嘅相量之下,喺佢完成中學課程之後,會帶佢到泰國最好嘅整形醫院,進行變性手術,
而當時佢就係想喺過去做手術之前,將呢件事話俾佢最信任嘅好朋友知,希望我會接受佢呢一個決定,而且可以繼續同佢做朋友,
我聽到呢件事嘅來龍去脈之後,一開始都表示有啲接受唔到,但同佢咁多年嘅感情,驅使我應該要去支持呢位朋友,知道佢明天就要上飛機,我同佢相擁而泣,好似一對好朋友將要永別一樣,佢話佢唔想我第二日去送機,希望喺佢有新嘅身份之前,呢一次係我哋最後見嘅一面,佢想我陪住佢,過完呢個最後的夜晚,我哋徹夜未眠,傾通頂,傾返好多有甜有苦嘅往事,直至天光嘅一刻,我哋喺屋企門口嚟咗個最後擁抱,給上我對佢最後的祝福之後,各自紅著眼返到自己嘅屋企,我倒睡床上,淚水不斷流出,已喊濕大半個枕頭,喺依依不捨嘅情緒下,哭累而睡,
時光飛逝,一年多時間過去,我中年畢業,升讀咗大學,喺呢一年多中,由於小魚嘅雙親陪佢過咗泰國,隔離小魚嘅家門都從未打開過,
有一日,課堂鐘響起,我早早坐喺課室中等上堂,隔離坐咗班男同學,
“喂,你哋知唔知啊?今日我哋有個插班生會嚟上堂喎,”,男同學A,
“我知啊,有聽講過,而且係個靚女嚟添喎,”,男同學B,
“真係?”,男同學C,“有幾靚女先!?有冇我哋阿敏咁靚先!?”男同學C含情脈脈望住我,
“咁就緊係冇你個阿敏咁靚啦,哈哈哈。。。”,男同學B,“邊個唔知你媾緊我哋系花阿敏丫,哈哈哈。。。”,其他幾個男同學都一齊哈哈大笑,
“阿敏就緊係最靚㗎啦,”,男同學C又對我單咗下眼,我就做返個鬼臉俾佢,
呢個時候,全班嘅目光,無論男男女女,都望住課室門口,皆因門口嚟咗個女仔,佢正回頭向身後嘅兩個男同學微微鞠咗個躬,輕聲講咗兩句,應該係嗰兩個人幫佢帶路,而向佢兩個道謝中,
嗰兩個人同佢道別後就走咗啦,佢轉回身走入課室,所有人嘅目光好似都冇離開過佢,如此清新嘅身影,束住一條整齊嘅小馬尾,秀長嘅眉毛,高挺嘅鼻樑,小嘴搭上尖下巴,加上一雙大眼睛,一米七左右嘅高佻身型,著住件貼身嘅T-Shirt,手臂纖幼,上圍卻豐滿,喺一條花花小短裙嘅襯托下,雙腳更顯修長,玲瓏浮凸嘅身材,行起路上嚟秀麗又帶有少少性感,如此完美嘅女仔,連我都望到有啲入神,
佢一路步入課室,一雙大眼睛就不停喺課室中搜索,好快地,我同佢就四目相投,
我知我係第一次見呢個女仔,但望住佢隻眼卻俾我有一種好親切嘅感覺,佢見到我望住佢,佢即刻俾咗一個歡欣嘅笑容我,而且快步行咗過嚟,
“阿敏,”,個女仔直接坐咗喺我隔離,而且叫得出我個名,就好似一早就識我咁,但我只係呆呆咁望住佢,腦海中完全回憶唔起佢係邊個,而佢亦冇再出聲,只係一直望住我嘅雙眼,
“你哋識㗎!?”,旁邊嘅男同學C疑惑咁問我,但我冇答佢,只係呆呆咁望住眼前嘅陌生人,
“阿敏,”,一把甜甜的可愛聲音由嗰個女仔口中發出,但佢又只係叫我個名,而冇下一句,但由佢眼中,我見到有些許淚水正慢慢湧出,
我開始意識到啲嘢,“你。。。你。。。”,我嘅雙眼唔知幾時,淚水亦已流出,“你。。。你。。。”,我開始啜泣而講唔到嘢,
見嗰個女仔只係點點頭,淚珠亦已滑下,
“你。。。你。。。”,淚水流下,滑過我帶著微笑但抖動著的嘴唇,
女仔點頭點得更激烈,淚水已崩潰,
我撲上,就是一個深深的擁抱,佢亦緊緊與我相擁,我哋兩個哭成淚人,但全班同學都唔知發生咗咩事,紛紛交頭接耳,
片刻過後,我哋先慢慢平復落嚟,
“阿敏,我返嚟啦!”,
“嗯,welcome back,”,我知眼前嘅人就係小魚,而且係全新嘅小魚,