星期一落雨濕濕，講下米雪第14話～

米雪 14

餐飯都叫做大家互相認識過，到最後梗係要人地Michelle俾錢啦，有大食大啦嘛，況且阿星地係潛在客户，唔係要阿星俾錢咁孤寒下話？喺阿Michelle俾完錢收好銀包之後繼續望住阿星同阿星面對面嘅果一刻，阿星同佢眨眨眼，Michelle一路睥住阿星，用啲好凌厲嘅眼神同阿星對望，查實阿星唔多怕俾人望，尤其是係女人，仲要係俾幾靚嘅女人望，真係完全唔介意。傾多陣偈，阿星同大家話阿星想行出去呼吸下清新但帶有尼古丁味嘅空氣，就攞埋個二胡盒行咗出去喇。

揹住個二胡，一路煲煙，一路喺度回味緊晏晝喺牛車水大厦啲街坊陶醉嘅表情，阿星又忍唔住喺個街度打開咗個二胡盒，企喺度準備拉二胡。大家梗係諗住阿星要揾地方坐啦？其實二胡唔一定要坐定定拉嘅，企喺度一樣可以拉得好輕鬆，秘訣就係其實二胡有個腰托，勾喺皮帶上面就可以將個二胡放上去，唔使坐低用大脾墊住都一樣可以拉喇。阿星周圍拉二胡都已經唔係啲咩咁少見嘅事，都要苦練㗎嘛，二胡係易學難精嘅其中一款中樂樂器，兩條弦啫，有幾難？難就難在點樣用兩條弦做出高低層次而且要哀怨有哀怨，要快樂有快樂，要激昂有激昂。阿星嘅琴音難脫愁苦，老師曾經告誡過阿星，音樂係令人快樂，阿星拉出愁苦，令人聽完之後愁雲慘霧，並非高手境界，高手就要喜怒哀樂七情六慾都收放自如。阿星自問都好努力去改善，但係就始終擺脫唔到音色間嘅愁苦味。不過呢啲都係題外話，依家講嘅，係企喺獅城高級商場門外拉二胡嘅阿星。

彈奏樂器又點少得一個打開咗嘅樂器存放盒放喺地上面呢？講到咁，大家都應該想像到，阿星就好似一個街頭賣藝嘅人，企喺街度賣藝，希望途人欣賞而努力演奏。Cassy同埋Shanie同Michelle都行咗出嚟企喺度望住阿星，Shanie表現得非常之興奮，一路捉住Cassy嘅手一路望住阿星拉二胡又一路同Cassy密密斟，而Michelle就保持佢雙手交叉放喺胸前嘅拒人於千里嘅動作。

喺阿星拉緊第三隻曲嘅時候，有人喺阿星嘅背後用純正嘅英語同阿星講：「先生，呢度係唔可以賣藝嘅，唔該身份證，我哋要發告票俾你！」吓？阿星唔係賣藝嘅囉，你幾時見過一碌杉會企喺街度賣藝呢？

正所謂：

用膳完畢外舒展
興之所至樂章起
二胡結構乃二弦
嗰中技巧藏竅門
抑揚頓挫高手也
上司陶醉音律中
突現人員來干涉

金翅俾人老屈鳥
（待續）😬

[ 本帖最後由 star_platina 於 2021-11-22 10:04 編輯 ]