第10話～
Gina X
掉拳套掉頭套掉護腳落小星星度果個女仔，係早兩晚同Cassy去飲酒識嘅酒吧老闆娘Gina。阿星見Gina戴住頭套，真係睇唔到原來係佢，佢企喺阿星面前雙手叉住條非常之幼嘅纖腰，望住阿星話：「我企喺度咁耐，你都睇唔到我咩？」堅係睇唔到，阿星掛住望阿Cassy同Miss Tang，完全漠視咗Gina嘅存在。阿星望下Gina，真係有啲唔係幾好意思，唯有開聲道歉：「Well，係呀，掛住望Cassy同個朋友地，冇留意到你添。」原諒阿星咁簡單直接，因為阿星係唔講大話嘅，有睇到就有睇到，冇睇到就冇睇到；絕對唔會係冇睇到就話有，有睇到又話冇嘅。呢個，係阿星嘅優點，亦係阿星嘅缺點，要做到身心一致（congruence）係要付出好大代價嘅，因為真係要做到言行一致，先可以空出大腦嘅空間嚟思考其他嘅事。講咗咁耐，都係想講俾大家知，好多人心口不一，容易露出蛛絲馬跡俾人發現；而當你做到心口如一嘅時候，冇嘢隱瞞，就自然唔會咁容易俾人睇透喇。
Gina望住阿星，然後行埋嚟捉住阿星隻手，話：「你陪我練習吖，冇人陪我練呀。」吓，你講笑咋下話？阿星嚟睇咋喎。你硬係要俾啲星星眼阿星睇嘅？唉，好啦好啦，怕咗你，阿星戴番個頭套攞個墊陪你玩喇，唔係你一路星星眼對住阿星，一陣又俾Cassy地話阿星冇風度。大家唔好以為阿星高高瘦瘦唔多打得，查實阿星都叫做練過下拳嘅，雖然日子唔長。阿星揸住個拳墊俾阿Gina踢，左一腳右一腳咁，佢都幾好力水，下下踢到阿星手震，跟住Gina開始用組合技，左拳右拳左腳右腳咁，越打越快，越打越好力，喂喂，阿Gina，唔好打咁快…………阿星太耐冇練，俾啲咁多時間阿星適應……………………………………
阿星最後聽到嘅，係“嘭”一聲，跟住到阿星再望嘅時候，已經係望住Gina，Cassy同埋Miss Tang三個頭圍埋一齊望住阿星。咩呢？唔俾阿星太耐冇運動，反應生疏咗啲啲咁多多嘅？大家都知阿Gina都係非常健美，雖然冇阿Miss Tang咁勁有馬甲線咁犀利，但係都有健美嘅身材…………阿星當然知啦，有睇過相喎，而且瞓喺Gina大脾上面，頭下面墊住嘅係充滿彈性嘅一雙大腿，阿星想起身，但係點解個鼻咁痛嘅呢？好似對眼有啲矇，望人都望唔清嘅？個眼鏡呢？正喺阿星四圍摸想揾眼鏡嘅時候，Miss Tang交咗啲嘢喺阿星手度，阿星即刻起番身，望住手上面Miss Tang俾阿星嘅嘢，個眼鏡……………斷開兩截，發生咗咩事？
（待續）😬
[ 本帖最後由 star_platina 於 2021-8-9 06:53 編輯 ]
