人妻講嘢
commitment phobia
人妻呢個名,都話咗俾你知係結咗婚嘅,先算係人妻㗎啦。啲BB 成日覺得,自己同自己條女以外嘅人偷食,咪同你個人妻告白嘅感覺差唔多囉,我可以話絕對唔係! 結婚係一個承諾,要平衡到一個承諾同自己嘅貪玩,一啲都唔易。而一紙婚書又係咪咁簡單呢? 你地試吓問吓啲結咗婚嘅男人,老婆同情人有咩唔同,你就知道結婚唔係一紙婚書咁兒戲。今時今日啲情侶成日話唔需要結婚,話只要愛對方就唔需要有咁多禮教上面嘅事。
我又要再提吓你地先,唔該唔好用嗰啲所謂道德高地嚟睇我啲嘢,因為我唔係喺學校教道德堂,所以未夠成熟嘅小朋友,唔該合埋眼。而家等我又嚟一啲過份嘅比喻先: 好似我之前講過,將唔同嘅工作out source 俾出面啲Vender 做,咁contact staff 同perm staff 又有咩唔同呢? 當然你可以話工作上其實係完全一樣,返工放工,一樣俾客屌。但係呢間公司係都唔俾個perm 位你呀,吹呀,你做唔做吖? 你唔做大把人做,而大前提係間公司仲有前途嘅話。咁perm 位呢? 當然係唔怕遲到早退,返工上鹹網啦,要炒我咪補返俾我囉,如果一個唔覺意間公司死咗,仲可以有遣散費收返添。咁你話有冇唔同吖。當然個staff 有個perm 位做吓又會安心啲嘅,有咩事捉佢出去傾吓計,頂個job 都方便啲嘛,perm 位喎,份糧包埋㗎啦,不過唔好俾我知你喺出面interview 緊喎!
我有個女性朋友,屋企應該都幾有錢,唔係好駛做,好聰明,廿幾歲女就有兩個間production 公司(有冇錢賺就唔知),一個人住兩萬幾蚊租嘅屋,出入坐的士,買親嘢都去連加罰同harby nicgo,講嘢成熟過我十倍,不過小姐脾氣到爆,所以冇乜人頂得佢順。眼見佢拍咗四五次拖,次次都係同啲結咗婚嘅男人一齊,仲要大佢至少十九幾年,我忍唔住問佢: 其實人夫有幾好呢,你又唔係level 低,你要嘅話,少年富豪,金融才俊,富二代,乜都有啦!
佢答我: 結咗婚,即係有人要啦! 有人要即係好嘢啦! 咁我唔駛自己搵得咁辛苦囉。
眼見佢有兩次都成功令個人夫為佢離婚,但最終佢都話條佬幫唔到手而飛咗佢,問你怕未! 其實最堅嘅係我睇住佢令一個八年嚟都唔得嘅男人重振雄風,仲日做夜做。我真係想知佢有咩特殊技能,令一個50歲嘅男人重拾年輕。當然而家條女仲未結婚啦。所以每當有wechat 友問我,佢地同自己條女好好,好想同而家個老婆離婚,我一定會叫佢地諗清楚先,要同老婆有共識,真係唔影響自己同家庭先,始終當初自己為咗呢個人做咗個承諾,係咪應該尊重返佢嘅意見先呢?